މެޑްރިޑް (ޑިސެމްބަރު 14) - ޓެކްނިކަލް މައްސަަލައެއް ދިމާވެގެން އޮޅުންތަކެއް އެރި ކަމަށް ބުނެ، ޔުއެފާ ޗެމްޕިއަންސް ލީގުގެ ގުރުއަތުލުން އަލުން ބޭއްވުމަކީ "އޮޅުވާލުމެއް" ކަމަށް މުބާރާތުގެ އެންމެ ކާމިޔާބު ޓީމު ރެއާލް މެޑްރިޑުން ބުނެފި އެެވެ.
މެންޗެސްޓާ ޔުނައިޓެޑާއި އެތުލެޓިކޯ މެޑްރިޑުން އިސްނަގައިގެން އަލުން ގުރުއަތުލުން ބާއްވަން ގިނަ ޓީމުތަކުން ޕްރެޝަރު ކުރުމުން ޔުއެފާ އިން ނިންމީ އަލުން ގުރުއަތުލުން ކުރިއަށް ގެންދާށެވެ. ފާހަގަކުރެވުނު މައްސަލަތަކަށް ބަލާއިރު، ފުރަތަމަ ޔުނައިޓެޑާއި ވިޔަރެއާލް ކުޅެން ޖެހޭގޮތަށް ގުރުއަތުން ދިމާވިއިރު، މި ދެ ޓީމަކީ އެއް ގްރޫޕެއްގައި ހިމެނޭ ދެ ޓީމު ކަމަށްވާއިރު، ގަވާއިދުގައި އޮންނަ ގޮތުން ނޮކައުޓް ފުރަތަމަ ބުރުގައި އެ ދެ ޓީމު ކުޅެން ނުޖެހޭނެ އެވެ. ދެން ފާހަގަކުރެވުނު މައްސަލަ އަކީ ލިވަޕޫލާއި އެތުލެޓިކޯއާ ކުޅެން ޖެހޭ ގުރުއަތުލުން ގެންދިއުމެވެ. އެތުލެޓިކޯ އާއި ލިވަޕޫލް އެއް ގްރޫޕެއްގައި ކުޅެފައިވާއިރު، މި ދެ ޓީމު ދެ ވަނަ ބުުރުގައި ބައްދަލުނުކުރެވޭނެ އެވެ. ދެން ފާހަގަވި މައްސަލަ އަކީ އެތުލެޓިކޯގެ ގުރުއަތުލުމުގައި ޔުނައިޓެޑް ހިމަނާފައިނުވުމެވެ.
ގުރުއަތުލުން އަލުން ބޭއްވިއިރު، ޗެލްސީ އާއި ލޮސްކް ލިލް ކުޅޭ މެޗު ފިޔަވައި ދެން އޮތް ހަތް މެޗު ވެސް ވަނީ ބަދަލުވެފަ އެވެ. ފުރަތަމަ ނެގި ގުރުއަތުލުމުގައި ރެއާލް ކުޅެން ޖެހުނީ ބެންފީކާއާ އެވެ. އެކަމަކު، އަލުން ގުރުއަތުލުމުން ރެއާލް ކުޅެން ޖެހުނީ ޕީއެސްޖީއާ އެވެ.
މެޑްރިޑްގެ ރޭޑިއޯ އަކަށް ރެއާލްގެ އޮފިޝަލަކު ދިން އިންޓަވިއުއެއްގައި ބުނީ ގިނަ ކްލަބްތަކުން އެދުނީ މައްސަލަ ޖެހުނު ހިސާބުން ފެށިގެން ގުރުއަތުލުން ބާއްވަން ކަމަށެެވެ. އެކަމަކު، ޓެކްނިކަލް މައްސަލައެއް ކަމަށް ބުނެ، ފުރަތަމަ ލީ ގުރުއަތުލުން އެއްކޮށް އުވާލައި، އަލުން ގުރުއަތުލުން ކުރިއަށް ގެންދިއުމަކީ ޔުއެފާ އިން އޮޅުވާލުމެއްގެ ތެރެއިން ކުރި ކަމެއް ކަމަށް ރެއާލުން ތުހުމަތުކުރެ އެވެ.
ރެއާލްގެ ރައީސް ފްލޮރެންޓީނޯ ޕެރޭޒާ ހަވާލާދީ މެޑްރިޑްގެ ނޫސްތަކުން ރިޕޯޓްކުރާ ގޮތުގައި އެ ކްލަބްގެ ލީޑަޝިޕްގެ އޮތީ މުޅި ގުރުއަތުލުން އަލުން ބޭއްވުމާ ދެކޮޅު ވިސްނުމެކެވެ.
ޕީއެސްޖީ އާއި ރެއާލް ކުޅޭ މެޗު ހާއްސަވާނެ ދެ ކުޅުންތެރިއަކީ ކުރިން ބާސެލޯނާގައި ހުރެ ރެއާލް ކޮޅަށް ގިނަ ގޯލު ޖެހި ލިއޮނަލް މެސީ އާއި އަންނަ ސީޒަނުގައި ރެއާލަށް ބަދަލުވާނެ ކަމަށް އަޑުފެތުރިފައިވާ ކީލިއަން އެމްބާޕޭ އަށެވެ.
އަނެއްކޮޅުން މި ސީޒަނުގައި ރެއާލް ދޫކޮށްފައި ޕީއެސްޖީ އަށް ބަދަލުވި ސާޖިއޯ ރާމޯސް ފުރަތަމަ ފަހަރަށް ކުރީގެ ކްލަބާ ކުޅެން ޖެހޭނެ އެވެ. ރާމޯސް އެންމެ ފަހުން ހުރީ ރެއާލްގެ ކެޕްޓަނެއްގެ ގޮތުގަ އެވެ. އޭނާ ވަނީ އެ ޓީމާ އެކު ހަތަރު ފަހަރު ޗެމްޕިއަންސް ލީގު ކާމިޔާބުކޮށްފަ އެވެ.
ރެއާލާއި ޕީއެސްޖީ ކުޅޭ މެޗުގެ ފުރަތަމަ ލެގު އޮންނާނީ ޕެރިހުގައި އަންނަ ފެބްރުއަރީ މަހުގެ 15 ވަނަ ދުވަހު އެވެ. އަދި މެޑްރިޑްގައި ދެ ވަނަ ލެގު ކުޅޭނީ މާޗް މަހު ނުވަ ވަނަ ދުވަހު އެވެ.
