ރާއްޖޭގައި ބޭއްވޭ އެންމެ ފޯރިގަަދަ ފުޓްސަލް މުބާރާތް ކަމަށްވާ ކްލަބް މޯލްޑިވްސް ކަޕްގެ ސެމީ ފައިނަލުގެ ފަހު ޖާގަތައް ރޯޑް ރެކްރިއޭޝަން ކްލަބް (އާރްއާރްސީ) އާއި ޓީމު ފެނަަކަ އިން ހޯދައިފި އެވެ.
މިރޭ ކުޅުނު ކުއާޓާ ފައިނަލުގެ ފުރަތަމަ މެޗުގައި އާރްއާރްސީން ވަނީ އެމްޕީއެލް އަތުން 3-2 އިން މޮޅުވެފަ އެވެ. ކުއާޓާގެ ފަހު މެޗު ފުރިހަމަ ވަގުތު ހަމަވިއިރު، ފެނަކަ އާއި އެސްޓީއޯ އޮތީ 4-4 އިން އެއްވަރުވެފަ އެވެ. ނަތީޖާ ނެރެން ޕެނަލްޓީ ޖެހިއިރު، ޕެނަލްޓީގައި ފެނަކަ މޮޅުވީ 5-4 އިންނެވެ.
ބުރާސްފަތި ދުވަހުގެރޭ ކުޅޭ ސެމީ ފައިނަލުގެ ފުރަތަމަ މެޗުގައި އެފްއެސްއެމް ކުޅޭނީ ޕްރިޒަން ކްލަބާ އެވެ. ދެ ވަނަ ސެމީގައި މިރޭ މޮޅުވި އާރްއާރްސީ އާއި ފެނަކަ ބައްދަލުކުރާނެ އެވެ.
ރެހެންދި ފުޓްސަލް އެއް ވަނަ ދަނޑުގައި މިރޭ ކުޅުނު މެޗު ފަށައިގެން ދެ ވަނަ މިނިޓްގައި އާރްއާރްސީން ލީޑުނެގީ އެމްޕީއެލްގެ ނާއިހް މުފީދު ފައިގައި ޖެހިފައި ބައިކޮޅަށް ވަން ގޯލުންނެވެ. މެޗުގެ 32 ވަނަ މިނިޓްގައި އަބްދުﷲ މިދުހަތު ފަހުމީ (ބިޗަޑް) ހުސްކޮށްލާފައި ދިން ބޯޅައަކުން އާދަމް ނާސިހު (އާދަންނާ) ވަނީ އާރްއާރްސީގެ ދެ ވަނަ ގޯލު ޖަހައިފަ އެވެ. އޭގެ ފަހުން ބަދަލެއްގެ ގޮތުގައި ކުޅެން އަރައި އެމްޕީއެލްގެ އަހުމަދު ނިޒާމް (ނިޒާމްބެ) ދުރުދުރުން ފޮނުވާލި ބޯޅައިން އެ ޓީމަށް ގޯލެއް ޖަހައިދިނެވެ. އެކަމަކު، އާދަންނާ އިތުރު ގޯލެއް ޖަހައި އާރްއާރްސީގެ ލީޑުފުޅާކޮށްދިނެވެ. މިއީ އެމްޕީއެލްގެ ފަސް ފައުލު ހަމަވެގެން އާރްއާރްސީ އަށް ލިބުނު ދެ ވަނަ ޕެނަލްޓީން އާދަންނާ ޖެހި ގޯލެކެވެ. ފަސް ފައުލު ހަމަވެގެން ލިބުނު ފުރަތަމަ ޕެނަލްޓީ ބިޗަޑަށް ކާމިޔާބު ނުކުރެވުނެވެ.
އޭގެ ފަހުން އާރްއާރްސީގެ ފަސް ފައުލު ހަމަވެ، ނިޒާމްބެ ފޮނުވާލި ދުރު ޕެނަލްޓީ ނާކާމިޔާބުވިއިރު، ފަހުން މުހައްމަދު ޔަފާއު (ޔާ) އެމްޕީއެލް އަށް ގޯލެއް ޖަހައިދިން ނަމަވެސް އިތުރު ގޯލެއް ނުޖެހި، އާރްއާރްސީ މެޗުން މޮޅުވީ އެވެ.
ލަނޑު ޖެހުމަށް ފަހު އާރްއާރްސީގެ އާދަންނާ އުފާފާޅުކުރަނީ.-- ފޮޓޯ: މުހައްމަދު ޝާބިން/ އަދަދު
ކުއާޓާގެ ފަހު މެޗުގައި މިރޭ ފެނަކަ އިން ވަނީ ފުރަތަމަ ހާފުގައި ތިން ގޯލުގެ ލީޑެއް ނަގައިފަ އެވެ. އަހުމަދު އަޔާޒް (އަޔާ) ޖެހި ބޯޅައެއް އަހުމަދު އަޖުވަދު (އަޖޭ) ގައިގައި ޖެހިފައި ގޯލަށް ބޯޅަ ވަދެ، ފެނަކަ އިން ލީޑުނެގި އެވެ. އޭގެ ފަހުން އޭރިއާބޭރުން އަޔާ ތިރިތިރިން ފޮނުވާލި ބޯޅައެއް ގޯލަށް ވަދެ، ފެނަކަ އިން ލީޑުފުޅާކުރި އެވެ. އަދި ރިހާމް އަބްދުލް ގަނީ (ބޮބީ) ދިން ބޯޅައަކުން އަޔާ އިތުރު ގޯލެއް ޖެހި އެވެ. ފުރަތަަމަ ހާފު ނިމުމުގެ ކުރިން އެސްޓީއޯގެ އަލީ އިފާޒް އެ ޓީމަށް ގޯލެއް ޖަހައިދީ އުއްމީދެއް ހޯދައިދިނެވެ.
އެސްޓީއޯ އިން ދެ ވަނަ ހާފުގައި ނުކުމެ ވަރުގަދަ ރޫހެއް ދައްކައި ދެ ގޯލު ޖަހައި ނަތީޖާ ހަމަހަމަކުރި އެވެ. އިސްމާއިލް ވަޖީހު (ވައްޖެ) ޖެހި ބޯޅަ ފެނަކަ ޓީމުގެ ކެޕްޓަން ހުސެއިން ޝަރީފް (އޮންލީ) ފައިގައި ޖެހިފައި ވަނީ ގޯލަށެވެ. އޭގެ ފަހުން ވައްޖޭ ހުސްކޮށްލާފައި ދިން ބޯޅަ އެސްޓީއޯގެ ކެޕްޓަން މުހައްމަދު ޝާހު ވަނީ ގޯލުގެ ތެެރެއަށް ފޮނުވާލައި ނަތީޖާ ހަމަހަމަކޮށްފަ އެވެ.
މެޗު ނިމެން ކައިރިވެފައި ވަނިކޮށް އަޔާ ހެޓްރިކް ފުރިހަމަކޮށް ފެނަކަ އަށް އަލުން ލީޑުނަގައިދިނެވެ. މި ގޯލު ޖަހާފައި އަޔާ އެސްޓީއޯ ބެންޗު ކައިރީގައި ހުރެ އުފާފާޅުކުރި ގޮތުން ރެފްރީ އޭނާ އަށް ރީނދޫ ކާޑެއް ދެއްކި އެވެ. މި ކާޑާ އެކު އަޔާ އަށް ދެ ރީނދޫ ކާޑު ހަމަވެ، ސެމީ ފައިނަލް މެޗަށް ސަސްޕެންޑްވީ އެވެ. އެހެންވެ، ފެނަކަ ބެންޗުން ރެފްރީގެ ނިންމުމަށް ވަރަށް ބޮޑަށް ހިތްހަމަ ނުޖެހުން ފާޅުކުރި އެވެ.
ލީޑުފުޅާކުރަން ފެނަކަ ޓީމަށް ރަނުގެ ފުރުސަތެއް ލިބުނެވެ. އެސްޓީއޯގެ ފަސް ފައުލު ހަމަވެ، ލިބުނު ދުރު ޕެނަލްޓީ ޖަހަން ބެންޗުގައި ހުރެފައި އެރި އަހުމަދު ހަލީމް (އައްމަޑޭ) ޖެހި ބޯޅަ ދިޔައީ ހުރަސްދަނޑިމަތިންނެވެ.
ފެނަކަ ޓީމުގެ އަޔާ ގޯލު ޖެހުމަށް ފަހު އުފާފާޅުކުރަނީ.-- ފޮޓޯ: އިމޭޖަސް.އެމްވީ
އޭގެ ފަހުން ފެނަަކަ ޓީމުގެ ފަސް ފައުލު ހަމަވެ، އެސްޓީއޯ އަށް ލިބުނު ޕެނަލްޓީ ޖަހަން ބެންޗުން އެރި އަމީން އިބްރާހިމް ވަނީ ޕެނަލްޓީ ވައްދާލައި ނަތީޖާ ހަމަހަމަކޮށްފަ އެވެ. އެކަމަކު، އޭގެ ފަހުން އެސްޓީއޯ މޮޅުކޮށްދޭން ލިބުނު ޕެނަލްޓީ ޖަހަން ވެސް އަމީން ބެންޗުން އެރި އެވެ. އެކަމަކު މި ފަހަރު ބެންޗުން އަރައި އަމީން ފޮނުވާލި ބޯޅަ ދިޔައީ ހުރަސްދަނޑިމަތިންނެވެ.
ފުރިހަމަ ވަގުތު ހަމަވިިއިރު ދެ ޓީމު 4-4 އިން އެއްވަރުވެފައި އޮތުމުން ޕެނަލްޓީ ޖެހިއިރު، ދެ ޓީމުން ވެސް ފުރަތަމަ ޕެނަލްޓީ ވީ ނާކާމިޔާބެވެ. ފެނަަކަ ޓީމުގެ އައްމަޑޭ ޖެހި ޕެނަލްޓީ އެސްޓީއޯ ކީޕަރު އަބްދުﷲ ނާސިހު ވަނީ މަތަކޮށްފަ އެވެ. ލީޑުނަގަން އެސްޓީއޯގެ އަމީން ޖެހި ޕެނަލްޓީ ދިޔައީ ބޭރުންނެވެ.
އޭގެ ފަހުން ފެނަކަ އިން ޖެހި ފަސް ޕެނަލްޓީ ކާމިޔާބުކުރި އެވެ. އެ ޓީމުން ޕެނަލްޓީ ކާމިޔާބުކުރީ ޔަސްފާދު ހަބީބު (މުލަކޭ)، އިބްރާހިމް އަރީޝް (އަރިއްޓެ)، އޮންލީ، ބޮބީ އަދި އާދަމް ޝަހީމް (އާނާ) އެވެ. އެސްޓީއޯގެ އިޔާން އަހުމަދު ރަޝީދު، ޝާހު، މުހައްމަދު ސަނީމް، އިބްރާހިމް މާޒް ޖެހި ޕެނަލްޓީ ކާމިޔާބުވި ނަމަވެސް އިފާޒް ޖެހި ޕެނަލްޓީ ނާކާމިޔާބުވެ، އެސްޓީއޯ ކެޓީ އެވެ.
މުބާރާތުގައި މާދަމާރޭ ކުޅޭނީ ކްލަބް މޯލްޑިވްސް ކަޕްގެ އަންހެން ޑިވިޝަން 18/30 ވިމެންސް ފުޓްސަލް ފިއެސްޓާ އެވެ. ސިފައިންގެ ކްލަބް ކުޅޭނީ ކްލަބް ވެމްކޯއާ އެވެ. އަދި އެންމެ ފަހުގެ ޗެމްޕިއަން އެމްޕީއެލް ވާދަކުރާނީ ޕޮލިސް ކްލަބާ އެވެ.
