ކްލަބް މޯލްޑިވްސް ކަޕްގެ ކުއާޓާ ފައިނަލުގައި މިރޭ އެފްއެސްއެމް އިން ޕެނަލްޓީ ޖަހައިގެން ވަރުގަދަ ފޯމެއްގައި އޮތް ކްލަބް އެޗްޑީސީ ކަޓުވާލައި ސެމީ ފައިނަލުގެ ޖާގަ ހޯދައިފި އެވެ.
ސެމީގައި އެފްއެސްއެމް ކުޅޭނީ މިރޭ ކުއާޓާ ފައިނަލްގެ ފުރަތަމަ މެޗުގައި ޕެނަލްޓީ ޖަހައިގެން އެމްއޭސީއެލް ބަލިކުރި ޕްރިޒަން ކްލަބާ ދެކޮޅަށެވެ.
މުބާރާތުގެ ދެ ވަނަ ބުުރުގައި އެފްއެސްއެމް އިން ވަނީ މަޝްހޫރު ގިނަ ކުޅުންތެރިންނާ އެކު ނުކުތް ކްލަބް ވެމްކޯ ކަޓުވާލައިފަ އެވެ. މިރޭ އެޗްޑީސީ ވެސް އެފްއެސްއެމް އަތުން ބަލިވިއިރު، އެ ޓީމުން މި ވަނީ މުބާރާތުގެ ފޭވަރިޓެއްގެ ގޮތުގައި ނުކުތް ވެމްކޯ އާއި އެޗްޑީސީ ދެ ޓީމު ވެސް ކަޓުވާލައިފަ އެވެ.
އެޗްޑީސީއާ ދެކޮޅަށް މިރޭ އެފްއެސްއެމް އިން ކުޅުނު މެޗުގެ ފުރިހަމަ ވަގުތު ހަމަވިއިރު، ދެ ޓީމު އޮތީ 2-2 އިން އެއްވަރުވެފަ އެވެ. ޕެނަލްޓީ ޖަހައިގެން އެފްއެސްއެމް މޮޅުވީ 6-7 އިންނެވެ.
މިރޭ ކުޅުނު ކުއާޓާ ފައިނަލުގެ ފުރަތަމަ ދެ މެޗަކީ ރޭ ކުޅެން ރޭވި މެޗުތަކެކެވެ. އެކަމަކު، އިއްޔެ ކުރި ވިއްސާރައިގެ ސަބަބުން މިރެއަށް ފަސްކުރީ އެވެ. މިރޭ އެޗްޑީސީ އާއި އެފްއެސްއެމްގެ މެޗުގެ ބޮޑުބައި ކުޅުނީ ބޯ ވިއްސާރައިގެ ތެރޭގަ އެވެ.
ރެހެންދި އެއް ވަނަ ދަނޑުގައި މިރޭ ކުޅުނު މެޗު ފަށައިގެން އަށް ވަނަ މިނިޓްގައި އެފްއެސްއެމްގެ ކެޕްޓަން މުހައްމަދު ނާފިއު (ނާއްޕެ) އެ ޓީމަށް ލީޑުނަގައިދިނެވެ. އަރިމަތިން ބޯޅަ ހިފައިގެން ގޮސް ނާއްޕެ މި ގޯލު ޖެހީ އެޗްޑީސީގެ ކީޕަރު ފައްޔާޒު ފަޔާޒް (ފައިއްޓެ) ކައިރިން ވެސް ނައްޓާފަ އެވެ. ފުރަތަމަ ހާފުގެ ފަހު ކޮޅު ދެ މިނިޓް ތެރޭގައި ދެ ގޯލު ޖަހައި އެޗްޑީސީން ނަތީޖާ އަނބުރާލި އެވެ. މި ގޯލުތައް ޖެހީ އަހުމަދު ސިޒާން އާއި އަބްދުﷲ ޝާފިއު (ޝާއްޕެ) އެވެ.
އެކަމަކު، އެޗްޑީސީން ލީޑުނަގައި ހަމަޖެހިނުލެވެނިސް އެފްއެސްއެމް އިން އެއްވަރުކުރި އެވެ. މި ގޯލު ޖެހީ މި ފަހަރުގެ މުބާރާތުގައި މޮޅު ކުޅުމެއް ދައްކަމުން އަންނަ އަހުމަދު ވިޖުދާން (ވިޖުއްކޮ) އެވެ. ވިއްސާރައިގެ ސަބަބުން ދެ ޓީމަށް ވެސް ދެ ވަނަ ހާފުގައި ގޯލެއް ޖެހޭގޮތް ނުވެ ދިޔައީ ޕެނަލްޓީ އަށެވެ.
ޕެނަލްޓީގައި އެފްއެސްއެމް އިން ފަސް ޕެނަލްޓީ ކާމިޔާބުކުރިއިރު، އެޗްޑީސީން ޖެހި ފަސް ޕެނަލްޓީން ކާމިޔާބުވީ ހަތަރު ޕެނަލްޓީ އެވެ. އެފްއެސްއެމް އިން މުހައްމަދު ތޯހިިރު، ވިޖުއްކޮ، މުހައްމަދު ޝިމްހާން، މުހައްމަދު އަމްޖަދު (އަމްޖޭ) ފުރަތަމަ ހަތަރު ޕެނަލްޓީ ކާމިޔާބުކުރި އެވެ. އެޗްޑީސީގެ އިބްރާހިމް ރިމާހު (ރިމޭ)، ޔާމިން މުހައްމަދު (ޔާންޓެ)، އަލީ ޝައިހާން އަދި މުހައްމަދު ސުޖާން ޕެނަލްޓީ ކާމިޔާބު ކޮށްފައިވަނިކޮށް އެ ޓީމުގެ ސިޒާން ޖެހި ޕެނަލްޓީ އެފްއެސްއެމްގެ ކީޕަރު އަބްދުﷲ ފަޔާޒް (ފަޔާ) މަތަކުރި އެވެ. އެފްއެސްއެމް މޮޅުވާން ލިބުނު ޕެނަލްޓީ ނާއިފް ޝަފީގް (ސީއާރް3) ކާމިޔާބުކޮށް އެ ޓީމަށް ސެމީގެ ޖާހަ ހޯދައިދިނީ އެވެ.
އެފްއެސްއެމް ސަޕޯޓަރުންނާ އެކު އެ ޓީމު ކުޅުންތެރިން ވަނީ ބޯ ވިއްސާރައިގެ ތެރޭގައި އުފާފާޅުކޮށްފަ އެވެ.
ޕްރިޒަން ކްލަބްގެ ކުޅުންތެރިން ޕެނަލްޓީ ޖަހައިގެން މޮޅުވުމުން އުފާފާޅުކުރަނީ.-- ފޮޓޯ: އިމޭޖަސް.އެމްވީ
ކުއާޓާގެ ފުރަތަމަ މެޗުގައި މިރޭ އެމްއޭސީއެލް އިން ދެ ގޯލުގެ ލީޑެއް ނެގި އެވެ. އަހުމަދު ހަމީދު (އައްމަޑޭ) އާއި އަޒްޔާން އިބްރާހިމްގެ ގޯލުތަކުން އެމްއޭސީއެލް އިން ލީޑުނަގާފައިވަނިކޮށް ޕްރިޒަން އިން ވަނީ ފަހަތުން އަރައި އެއްވަރުކޮށްފަ އެވެ. ދެ ވަނަ ހާފުގެ ފަހުކޮޅުގައި މި ގޯލުތައް ޖެހީ އާދަމް މަންސޫރާއި ސަނީމް ސަމާއިލް އެވެ. މި މެޗު 2-2 އިން އެއްވަރުވެ، ޕެނަލްޓީގައި ޕްރިޒަން މޮޅުވީ 7-6 އިންނެވެ.
ޕްރިޒަން އިން ވަނީ ހަ ޕެނަލްޓީން ފަސް ޕެނަލްޓީ ކާމިޔާބު ކޮށްފަ އެވެ. އެ ޓީމުގެ ސަނީމް ޖެހި ޕެނަލްޓީ ނާކާމިޔާބުވިއިރު، މަންސޫރް، މުރުތަޖާ މުހައްމަދު، ސާޖިދު ރަޝީދު، އަހުމަދު ޝަމާލް އަދި ހުސެއިން ނަބީހް ވަނީ ޕެނަލްޓީ ކާމިޔާބުކޮށްފަ އެވެ. އެމްއޭސީއެލްގެ ހަ ޕެނަލްޓީ ތެެރެއިން އަލީ ޝާފިއު އާއި އަބްދުﷲ ސުޒޭރު ޖެހި ޕެނަލްޓީ ކާމިޔާބެއްނުވި އެވެ. އެމްއޭސީއެލް އިން ޕެނަލްޓީ ޖެހީ ސައްޔާހު އައްބާސް، މުހައްމަދު މުސްތަފާ، އަޒްޔާން އަދި ހުސެއިން ސަމްހާން އެވެ.
ސެމީގައި އެފްއެސްއެމް ބައްދަލުކުރާނީ ޕްރިޒަންއާ އެވެ. މުބާރާތުގައި މާދަމާރޭ އޮންނާނީ ކުއާޓާ ފައިނަލްގެ ފަހު ދެ މެޗެވެ. އާރްއާރްސީ ކުޅޭނީ އެމްޕީއެލްއާ އެވެ. އަދި އެސްޓީއޯ ބައްދަލުކުރާނީ ޓީމު ފެނަކައާ އެވެ. ދެ ވަނަ ސެމީގައި ކުޅޭނީ މާދަމާރޭ ދެ މެޗުން މޮޅުވާ ދެ ޓީމެވެ.
