ލަންޑަން (ޑިސެމްބަރު 11) - ކޮވިޑް-19ގެ ކޭސްތައް އިނގިރޭސިވިލާތުގައި ގިނަވަމުން އަންނަ މި ދަނޑިވަޅުގައި ހާލަތު ގޯސްވެ، ޓީމެއްގެ މެޗު ފަސްކުރަން ޖެހޭނެ ސަބަބުތަކެއް އެނގޭނެހެން އުސޫލުތަކެއް ސާފުކޮށް ފެންނަން އޮންނަން ޖެހޭ ކަމަށް އާސެނަލްގެ ކޯޗު މިކޭލް އާޓެޓާ ބުނެފި އެވެ.
ކޮވިޑް-19ގެ ހާލަތު ގޯސްވެ، އާސެނަލްގެ އަވަށްޓެރި ކްލަބް، ޓޮޓެންހަމް އެންމެ ފަހުން ކުޅެން އޮތް ދެ މެޗު ވަނީ ފަސްކޮށްފަ އެވެ. އެއީ ޔުއެފާ ކޮންފަރެންސް ލީގުގައި ފްރާންސްގެ ރެނެސްއާ ކުޅެން އޮތް މެޗާއި މާދަމާރޭ އިނގިރޭސި ޕްރިމިއާ ލީގުގައި ބްރައިޓަން ދަނޑުގައި ކުޅެން އޮތް މެޗެވެ.
ލީގުގައި މިރޭ އާސެނަލުން ސައުތެމްޓަނާ ކުޅޭ މެޗުގެ ކުރިން އޮތް ނޫސްވެެރިންގެ ބައްދަލުވުމުގައި އާޓެޓާ ބުނީ މިހާރު ކަންތައްތައް ވަމުން އަންނަ ގޮތަށް ބަލާއިރު، މެޗު ކުޅެވޭނެ ހާލަތެއް ނުކުޅެވޭނެ ހާލަތެއް ބުނަން ނޭނގޭ ކަމަށާއި އެއީ ގޯހެއް ކަމަށެވެ.
މިދިޔަ އޮގަސްޓް މަހު އާސެނަލްގެ ކޭމްޕްގައި ކޮވިޑް-19ގެ ކޭސްތަކެއް ރިޕޯޓްކޮށްފައިވާ ދުވަސްވަރެއްގައި އާސެނަލުން ވަނީ ބްރެންޓްފޯޑް އަތުން 2-0 އިން ބަލިވެފަ އެވެ.
އާޓެޓާ ބުނީ ބްރެންޓްފޯޑް މެޗަކީ ވެސް ފަސްކުރަން ބަލާނަމަ އުސޫލަށް ފެތިދާނެ މެޗެއް ކަމަށާއި އެކަމަކު، އާސެނަލުން ކުޅެން ނިންމީ ކަން އޮތްގޮތް ސާފުނުވާތީ ކަމަށެވެ. މީގެ އެންމެ ރަނގަޅު ގޮތަކީ ޔުއެފާ އިން އަމަލުކުރަމުން އަންނަ ޕްރޮޓޮކޯލަށް އެންމެ ހަރުކަށިކޮށް އަމަލުކުރުން ކަމުގައި އާޓެޓާ ގަބޫލުކުރެ އެވެ.
"އަހަރެން ވެސް އެދެނީ އެންމެންގެ ރައްކާތެރިކަމަށް. އެއީ އެންމެ ފުރަތަމަ ކަންތައް. އެކަމަކު، އުސޫލެއްގެ ދަށުން ހިނގާ ކަމެއް ކަމުގައިވާނަމަ. އެ އުސޫލެއް އެބަޖެހޭ ސާފުވެފައި އޮންނަން،" ލީގުގެ ހަތް ވަނައިގައި އޮތް އާސެނަލްގެ ކޯޗު އާޓެޓާ ބުންޏެވެ.
ޔުއެފާ އިން އަމަލުކުރަމުން އަންނަ އުސޫލުގައިވާ ގޮތުން މަދުވެގެން 13 ކުޅުންތެރިން، ކީޕަރެއް ހިމެނޭ ގޮތަށް ކޮވިޑް-19 އަށް ޕޮޒިޓިވް ނުވެ، ޓީމެއްގައި ފިޓްކޮށް ހުރެފިނަމަ ޝެޑިއުލްގައިވާ މެޗު ކުޅެން ޖެހޭނެ އެވެ. އެކަމަކު، ކޮވިޑް ކޭސްތައް ގިނަ ކްލަބެއްގައި ފުރަތަމަ ޓީމުގައި ރަޖިސްޓްރީކޮށްފައިވާ ކީޕަރެއް ނެތިއްޖެ ހާލަތެއްގައި ނޫނީ ފިޓްކޮށް ތިބި 13 ކުޅުންތެރިން ވެސް އެ ޓީމެއްގައި ހަމަނުވާނަމަ މެޗު ޖެހޭނީ ފަސްކުރާށެވެ.
ޔޫރަޕްގެ ގިނަ ގައުމުތަކުން އަމަލުކުރަމުން އަންނަނީ ޔުއެފާ ޕްރޮޓޮކޯލަށެވެ. އިންގްލެންޑްގައި ވެސް ޔުއެފާ ޕްރޮޓޮކޯލަށް އަމަލުކުރާ ކަމަށް ބުނި ނަމަވެސް ގިނަ ފަހަރު އެކަން ކުރަނީ މެޗު ފަސްކުރަން ކްލަބަކުން ހުށަހަޅާ ގޮތަށާއި ހާލަތަށް ލީގު ބޯޑުން ބެލުމަށް ފަހު އެވެ.
