ގައުމީ ކްރިކެޓް ޓީމުގެ ތަރި މުހައްމަދު ރިޝްވާން، ޕާކިސްތާންގެ ކްރިކެޓް ސުޕަ ލީގުގެ އަންނަ އަހަރުގެ މުބާރާތުގެ ޑްރާފްޓް ކުޅުންތެރިންގެ ލިސްޓުގައި ހިމެނި، ބޮޑު ފުރުސަތެއް ފަހިވެއްޖެ އެވެ.
ޕާކިސްތާން ސުޕަ ލީގަކީ އިންޑިއާގެ ބޮޑު ފްރޭންޗައިސް ކްރިކެޓް ލީގު، އިންޑިއަން ޕްރިމިއަ ލީގު (އައިޕީއެލް) ފެންވަރުގައި ޕާކިސްތާންގައި ކުޅޭ މުބާރާތެކެވެ. އެ މުބާރާތަށް ކަނޑައެޅި ބިދޭސީ ކުޅުންތެރިންގެ ޑްރާފްޓްގައި ރިޝްވާން ހިމެނެނީ ސިލްވާ ކެޓަގަރީގަ އެވެ. މުޅި ލިސްޓަށް ބަލާއިރު، ރިޝްވާން އޮތީ ބިދޭސީ 445 ކުޅުންތެރިންގެ ލިސްޓުގެ ތެރެއިން 352 ވަނައިގަ އެވެ.
ޕާކިސްތާން ސުޕަ ލީގުގެ ކުޅުންތެރިން ނެގުމުގެ އޯކްޝަން އޮތީ އަންނަ އާދިއްތަ ދުވަހު އެވެ. ކުޅުންތެރިން ލިސްޓު ކޮށްފައިވަނީ ބިދޭސީ ކުޅުންތެރިން މައިގަނޑު ގޮތެއްގައި ޑައިމަންޑް، ގޯލްޑް، އަދި ސިލްވާ ކެޓަގަރީގަ އެވެ.
ޕާކިސްތާން ސުޕަ ލީގުގައި ވާދަކުރާ ހަ ކްލަބުން އާދިއްތަ ދުވަހު އޯކްޝަނުގައި ބައިވެރިވެ، ޓީމަށް ކުޅުންތެރިން ނަގާނެ އެވެ. އެ ކްލަބްތަކުގެ އެ އޯކްޝަނުގައި ޓީމަކުން ބޭނުން ނަމަ ރިޝްވާން ޓީމަށް ނަގާނެ އެވެ.
ގައުމީ ޓީމުގެ މެޗެއްގެ ތެރެއިން ރިޝްވާން ބޯޅަ ފޮނުވާލަނީ.
ރިޝްވާނަށް މި ލިބުނު ބޮޑު ފުރުސަތާ ގުޅިގެން ކްރިކެޓް ބޯޑް އޮފް މޯލްޑިވްސް (ސީބީއެމް)ގެ ރައީސް މުހައްމަދު ފައިސަލް ވަނީ ރިޝްވާނަށް މަރުހަބާ ދަންނަވަައިފަ އެވެ.
ފައިސަލް ވިދާޅުވީ މިއީ ދިވެހި ކްރިކެޓަށް ލިބުނު އުފާވެރި ހަބަރެއް ކަމަށާއި އުއްމީދުކުރަނީ ރިޝްވާނަށް ޓީމަކުން ފުރުސަތު ލިބޭނެ ކަމަށެވެ.
ޕާކިސްތާން ސުޕަ ލީގުގައި ކުޅޭ ޓީމު ތަކަކީ އިސްލާމް އާބާދު ޔުނައިޓެޑް، ކަރާޗީ ކިންގްސް، ލާހޯރު ގަލަންޑާސް، މުލްޓާން ސުލްތާންސް، ޕެޝާވަރު ޒާލްމީ އަދި ކުއެއްޓާ ގްލޭޑިއޭޓާ އެވެ. ސުޕަ ލީގު ފަށާނީ އަންނަ މަހު 27 ވަނަ ދުވަހު އެވެ. ފައިނަލް އޮންނާނީ އަންނަ ފެބްރުއަރީ މަހުގެ 27 ވަނަ ދުވަހު އެވެ.
ބައިނަލްއަގުވާމީ ކްރިކެޓް މައިދާނުގައި މީގެ ކުރިން ވެސް ދިވެހި ކްރިކެޓް ކުޅުންތެރިން ވަނީ ފަހި ފުރުސަތުތަކެއް ހޯދައިފަ އެވެ. އެ ގޮތުން ގައުމީ ޓީމުގެ ހަސަން އިބްރާހިމް ވަނީ އޮސްޓްރޭލިއާގެ ބިގް ބޭޝްގައި ވާދަކުރާ މެލްބަން ރެނެގޭޑްސްގެ ސްކޮޑާ އެކު ތަމްރީން ހެދުމުގެ އިތުރުން އޮސްޓްރޭލިއާގެ ވިކްޓޯރިއާ ޕްރިމިއާ ލީގުގައި ކާލްޓަން ކްރިކެޓް ކްލަބަށް ކުޅެފަ އެވެ. އަދި ހަސަން ވަނީ މެލޭޝިއާގެ ސްޓޭޓް ލީގުގެ ޕިނޭންގް ޓީމަށް ވެސް ކުޅެފަ އެވެ.
