މިލާން (ޑިސެމްބަރު 8) - ޗެމްޕިއަންސް ލީގުގައި މިރޭ އޭސީ މިލާން ދަނޑުގައި 2-1 އިން މޮޅުވެ، މުބާރާތުގެ ތާރީހުގައި ގްރޫޕް ސްޓޭޖުގެ ހަ މެޗުން ވެސް މޮޅުވި އިނގިރޭސި ހަމައެކަނި ޓީމުގެ ރެކޯޑް ލިވަޕޫލުން ގާއިމްކޮށްފި އެވެ.
ބާކީ ދެ މެޗު އޮއްވައި މުބާރާތުގެ ގަދަ 16 ޓީމުގެ ބުރުން ޖާގަ ޔަގީންކުރި ލިވަޕޫލުން އެންމެ ފަހުން މުބާރާތުގައި ކުޅުނު ދެ މެޗުގައި ކުޅުނީ ގިނަ ބަދަލުތަކެއް ގެނެސްގެންނެވެ. އެއީ އާންމުކޮށް ފުރަތަމަ އެގާރައިގައި ހިމެނޭ ކުޅުންތެރިން ނުލަ އެވެ. އެކަމަކު، އެ ދެ މެޗުން ވެސް މޮޅުވެ، ރެކޯޑް ހެދީ އެވެ.
ގްރޫޕް އޭގެ އެއް ވަނަ ޓީމުގެ ގޮތުގައި ލިވަޕޫލް އަނެއް ބުރުން ފުރުސަތު ހޯދީ 18 ޕޮއިންޓާ އެކު އެވެ. ދެ ވަނަ އަށް ދިޔައީ މިރޭ ޕޯޓޯ ދަނޑުގައި 3-1 އިން މޮޅުވި އެތުލެޓިކޯ މެޑްރިޑް އެވެ. އެތުލެޓިކޯ އަށް ވަނީ ހަތް ޕޮއިންޓް ލިބިފަ އެވެ. ތިން ވަނަ އަށް ދިޔަ ޕޯޓޯ އަށް ފަސް ޕޮއިންޓް ލިބުނުއިރު، މިލާން ގްރޫޕް ސްޓޭޖު ނިންމާލީ ހަތަރު ޕޮއިންޓާ އެކު އެވެ.
މިލާންގެ ސެން ސީރޯ ސްޓޭޑިއަމްގައި މިރޭ ކުޅުނު މެޗުން އެ ޓީމު މޮޅުވެ، އެތުލެޓިކޯ އާއި ޕޯޓޯ އެއްވަރުވިނަމަ ދެ ވަނަ ޓީމުގެ ގޮތުގައި މިލާނަށް އަނެއް ބުރަށް ދެވެން އޮތެވެ. އެ އަޒުމުގައި މިލާނުން މެޗަށް ނުކުމެ ފުރަތަމަ ލީޑުނެގި އެވެ. މެޗުގެ 29 ވަނަ މިނިޓްގައި މިލާނަށް ލީޑުނަގައިދިނީ އިނގިރޭސި ޑިފެންޑަރު ފިކާޔޯ ޓޮމޯރީ އެވެ.
މިލާނުން ލީޑުނެގިތާ ހަތް މިނިޓް ފަހުން ލިވަޕޫލަށް އެއްވަރުކޮށްދިނީ މުހައްމަދު ސަލާހު އެވެ. މެޗުގެ 36 ވަނަ މިނިޓްގައި އަލެކްސް އޮކްސްލޭޑް ޗަމްބަލެއިން ޖެހި ބޯޅައެއް މިލާން ކީޕަރު މައިކް މައިންގްނަން އަތުގައި ޖެހިފައި ނުކުތް ވަގުތު ސަލާހު ވަނީ ގޯލުގެ ތެރެއަށް ބޯޅަ ފޮނުވާލައި ސީޒަނުގައި އޭނާގެ 20 ވަނަ ގޯލު ޖަހައިފަ އެވެ. ސަލާހަކީ ޗެމްޕިއަންސް ލީގުގެ ގްރޫޕް ސްޓޭޖުގައި ލިވަޕޫލަށް ހަތް ގޯލު ޖަހައިދިން ފުރަތަމަ ކުޅުންތެރިޔާ އެވެ.
ލިވަޕޫލް މޮޅުވި ގޯލު ޖެހީ މެޗުގެ 55 ވަަނަ މިނިޓްގައި ޑިވޮކް އޮރީގީ އެވެ. މިއީ 2019 ވަނަ އަހަރުގެ ފައިނަލުގައި ޓޮޓެންހަމް ކޮޅަށް ގޯލު ޖެހި ފަހުން ޗެމްޕިއަންސް ލީގުގައި އޮރީގީގެ ފުރަތަމަ ގޯލެވެ. މިލާނަށް އެއްވަރުކޮށްދޭން ކެސީ އަށް ލިބުނު ފުރުސަތުން އޭނާ ޖެހި ބޯޅަ ލިވަޕޫލްގެ ކީޕަރު އެލިސަން ބެކާ ވަނީ މަތަކޮށްފަ އެވެ.
ޕޯޓޯ ދަނޑުގައި މިރޭ ކުޅުނު މެޗު ފަށައިގެން މާގިނައިރެއް ނުވެ އެތުލެޓިކޯގެ ލުއިސް ސުއަރޭޒަށް އަނިޔާވެ ބަދަލުކުރަން ޖެހުނެވެ. އެތުލެޓިކޯ އަށް މެޗުގެ 56 ވަނަ މިނިޓްގައި ލީޑުނަގައިދިނީ ސަސްޕެންޝަނަށް ފަހު އެނބުރި އައި އެންޓޮއިން ގްރީޒްމަން އެވެ. އެކަމަކު، އޭގެ ފަހުން އެތުލެޓިކޯގެ ޔަނިކް ކަރާސްކޯ އަށް ވަނީ ރަތް ކާޑެއް ދައްކައިފަ އެވެ. އޭގެ ތިން މިނިޓް ފަހުން ޕޯޓޯގެ ވެންޑެލް އަށް ވެސް ރަތް ކާޑެއް ދެއްކި އެވެ.
އިތުރު ވަގުތުގައި ޕޯޓޯގެ އެންހެލް ކޮރޭއާ އާއި ރޮޑްރީގޯ ޑެ ޕޯލް ވަނީ އިތުރު ގޯލުތަކެއް ޖަހައިފަ އެވެ. އަދި ޕޯޓޯގެ ސާޖިއޯ އޮލިވޭރާ ވެސް ވަނީ އެ ޓީމަށް ގޯލެއް ކާމިޔާބުކޮށްދީފަ އެވެ. ޑެ ޕޯލް އާއި އޮލިވޭރާ ގޯލު ޖެހީ ޕެނަލްޓީންނެވެ.
އަޔަކްސް ވެސް އަނެއް ބުރުން ފުރުސަތު ހޯދީ ސައްތަ އިން ސައްތަ ރެކޯޑަކާ އެކު ހަ މެޗުން މޮޅުވެގެންނެވެ. ގްރޫޕްގެ ފަހު މެޗުގައި މިރޭ އަޔަކްސް އިން ވަނީ 4-2 އިން ސްޕޯޓިން ބަލިކޮށްފަ އެެވެ. މި މެޗުގައި ގޯލު ޖަހައި އަޔަކްސްގެ ސަބެސްޓިއަން އަލެއާ ވަނީ ގްރޫޕް ސްޓޭޖުގައި 10 ގޯލު ހަމަކޮށް ކްރިސްޓިއާނޯ ރޮނާލްޑޯގެ ރެކޯޑަކާ ހަމަކޮށްފަ އެވެ.
މި ގްރޫޕްގެ އަނެއް މެޗުން ބެސިކްޓާސް އަތުން ބޮރޫޝިއާ ޑޯޓްމަންޑް ވަނީ 5-0 އިން މޮޅުވެފަ އެވެ. ދެ ވަނަ ހާފް އެއްކޮށް އެއް ކުޅުންތެރިއަކު މަދުކޮށް ކުޅުނު ބެސިކްޓާސް ކޮޅަށް ޑޯޓްމަންޑްގެ އާލިން ބްރައުޓް ހާލަންޑާއި މާކޯ ރެއުސް، ކޮންމެ ކުޅުންތެރިއަކު ވަނީ ދެ ގޯލު ޖަހައިފަ އެވެ. އަނެއް ގޯލު ޖެހީ ޑޮންޔެލް މާލެން އެވެ.
ގްރޫޕް ސީގެ އެއް ވަނަ އަޔަކްސް އިން ހޯދީ 18 ޕޮއިންޓާ އެކު އެވެ. ދެ ވަނަ އަށް ދިޔަ ސްޕޯޓިން އާއި ތިން ވަނަ ހޯދި ޑޯޓްމަންޑަށް ވެސް ލިބުނީ ނުވަ ޕޮއިންޓެވެ. ހެޑް ޓު ހެޑް އިން ސްޕޯޓިން ކުރި ހޯދައި އަނެއް ބުރަށް ދިޔައީ އެވެ. ގްރޫޕްގެ ފުލަށްދިޔަ ބެސިކްޓާސް އަށް ޕޮއިންޓެއް ނުލިބެ އެވެ.
