ބާލިން (ޑިސެމްބަރު 7) - ޖަރުމަނު ލީގުގައި ބަޔާން މިއުނިކް އަތުން ބޮރޫޝިއާ ޑޯޓްމަންޑް ބަލިވި މެޗުގައި ހުރި ރެފްރީ ފީލިކްސް ޒްވޯޔާ އަށް ރައްދުވާ ގޮތަށް ޑޯޓްމަންޑްގެ ޒުވާން މިޑްފީލްޑަރު ޖޫޑް ބެލިންހަމް ފާޑުކިޔުމާ ގުޅިގެން އޭނާ ޖޫރިމަނާކުރަން ނިންމައިފި އެވެ.
ބަޔާނުން 3-2 އިން ޑޯޓްމަންޑް ބަލިކުރި މެޗުގައި ޑޯޓްމަންޑުން އެޕީލްކުރި ޕެނަލްޓީ ނުދިނުމަށް ފަހު ޒްވޯޔާ ވަނީ ޑޯޓްމަންޑްގެ މެޓް ހަމެލްސް އަތުގައި ބޯޅަ ޖެހުނު ކަމަށް ނިންމައި ބަޔާނަށް ޕެނަލްޓީ ދީފަ އެެވެ. އެ ޕެނަލްޓީ ކާމިޔާބުކޮށް ބަޔާން މެޗުން މޮޅުވީ އެވެ.
މެޗު ފިކްސިން މައްސަލައެއްގައި ރެފްރީ ޒްވޯޔާ ވަނީ 2005 ވަނަ އަހަރު ހަ މަހަށް ސަސްޕެންޑްކޮށްފަ އެވެ. ބެލިންހަމް ބުނީ މެޗު ފިކްސިން މައްސަލައެއްގައި ކުރިން ބައިވެރިވެފައި ހުރި ރެފްރީއަކާ ޖަރުމަނު ފުޓްބޯޅައިގެ އެންމެ ބޮޑު މެޗު އިންސާފުކުރަން ހަވާލުކުރުމުން ފެންނާނެ މަންޒަރު އެ މެޗުގައި ފެނުނު ކަމަށެވެ.
ބެލިންހަމް ދެއްކި އެ ވާހަކަތަކުގެ މައްސަލަ ބެލުމަށް ފަހު ޖަރުމަނު އެފްއޭ އިން ނިންމީ ބެލިންހަމް 40،000 ޔޫރޯ (ގާތްގަނޑަކަށް 45،000 ޑޮލަރު) އިން ޖޫރިމަނާ ކުރާށެވެ. އުމުރުން 18 އަހަރުގެ ބެލިންހަމަށް ސަސްޕެންޝަނެއް އަންނާނެ ކަމަށް ބެލެވުނު ނަމަވެސް ކޮންޓްރޯލް ކޮމިޓީން ނިންމީ އަދަބު ޖޫރިމަނާއަކާ ހަމައިން ދޫކޮށްލާށެވެ. އެ ފަދަ ކަމެއް ތަކުރާރުކޮށްފިނަމަ ބެލިންހަމަަށް ދޭ އަދަބު ބޮޑުވާނެ އެވެ.
ޑޯޓްމަންޑުން ވަނީ ބެލިންހަމަށް މި ދިން އަދަބާ ދެކޮޅަށް އެޕީލް ނުކުރަން ނިންމައިފަ އެވެ.
އިނގިރޭސި ގައުމީ ޓީމުން ވެސް ފުރުސަތު ހޯދާފައިވާ ބެލިންހަމް އަކީ ޑޯޓްމަންޑް ޓީމުގެ މުހިއްމު ކުޅުންތެރިއެކެވެ. މެންޗެސްޓާ ޔުނައިޓެޑުން ގަންނަން ޝައުގުވެރިކަން ފާޅުކޮށްފައިވަނިކޮށް މިދިޔަ އަހަރު ޖެނުއަރީ މަހު ޑޯޓްމަންޑުން ބެލިންހަމްގެ ސޮއި ހޯދީ އޭނާ އޭރު ކުޅެމުން އައި ބާމިންހަމް ސިޓީ އަށް 40 މިލިއަން ޑޮލަރުގެ ޓްރާންސްފާ ފީއެއް ދައްކައިފަ އެވެ.
