ބާލިން (ޑިސެމްބަރު 7) - ޖަރުމަނު ލީގުގައި ބަޔާން މިއުނިކް އަތުން ބޮރޫޝިއާ ޑޯޓްމަންޑް ބަލިވި މެޗުގައި ހުރި ރެފްރީ ފީލިކްސް ޒްވޯޔާއާ ބެހޭގޮތުން ޑޯޓްމަންޑްގެ ޒުވާން މިޑްފީލްޑަރު ޖޫޑް ބެލިންހަމް ދެއްކި ވާހަކައިގެ މައްސަލަ ޖަރުމަނު އެފްއޭ އިން ބަލަން ފަށައިފި އެވެ.
މެޗު ފިކްސިން މައްސަލައެއްގައި ރެފްރީ ޒްވޯޔާ ވަނީ 2005 ވަނަ އަހަރު ހަ މަހަށް ސަސްޕެންޑްކޮށްފަ އެވެ.
ބަޔާނުން 3-2 އިން ޑޯޓްމަންޑް ބަލިކުރި މެޗުގައި ޑޯޓްމަންޑުން އެޕީލްކުރި ޕެނަލްޓީ ނުދިނުމަށް ފަހު ޒްވޯޔާ ވަނީ ޑޯޓްމަންޑްގެ މެޓް ހަމެލްސް އަތުގައި ބޯޅަ ޖެހުނު ކަމަށް ނިންމައި ބަޔާނަށް ޕެނަލްޓީ ދީފަ އެެވެ. އެ ޕެނަލްޓީ ކާމިޔާބުކޮށް ބަޔާން މެޗުން މޮޅުވީ އެވެ.
މެޗަށް ފަހު ބެލިންހަމް ބުނީ މެޗު ފިކްސިން މައްސަލައެއްގައި ކުރިން ބައިވެރިވެފައި ހުރި ރެފްރީއަކާ ޖަރުމަނު ފުޓްބޯޅައިގެ އެންމެ ބޮޑު މެޗު އިންސާފުކުރަން ހަވާލުކުރުމުން ފެންނާނެ މަންޒަރު އެ މެޗުގައި ފެނުނު ކަމަށެވެ.
ބަޔާނަށް ދިން ޕެނަލްޓީ އަކީ އެއްވެސް ގޮތަކަށް ޕެނަލްޓީއެއް ދެވޭނެ ކަމެއް ނޫން ކަމަށް ވެސް ބެލިންހަމް ވަނީ ބުނެފަ އެވެ. ހަމެލްސް އަތުގައި ބޯޅައިން ޖެހުނު ގޮތަށް ބަލާއިރު، އެއީ މިހާރު ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިގެން ގޮތެއް ނިންމާ ޒަމާނެއްގައި ދެވޭނެ ޕެނަލްޓީއެއް ނޫން ކަމަށް ބެލިންހަމް ބުނެފައިވެ އެވެ.
ޖަރުމަނު އެފްއޭ އިން ބެލިންހަމްގެ މައްސަލަ ބަލަން ފަށައި އޭނާ އަށް ވަނީ ޖަވާބުދާރީވާން މުއްދަތެއް ދީފަ އެވެ. ބެލިންހަމް ދެއްކި ވާހަކަތަކާ ބެހޭގޮތުން އޭނާ ޖަރުމަނު އެފްއޭގެ ކޮންޓްރޯލް ކޮމިޓީ އަށް ޖަވާބުދާރީވުމާ އެކު އަޅާ ފިޔަވަޅެއް އިއުލާނުކުރާނެ އެވެ.
ޑޯޓްމަންޑްގެ ސްޕޯޓިން ޑިރެކްޓަރު މައިކަލް ޒޯކް ބުނީ މި މައްސަލައިގައި އެ ކްލަބުން އޮތީ "100 ޕަސެންޓް" ބެލިންހަމާ އެކު ކަމަށެވެ.
މެޗު ނިމުނުތާ ކުޑަ ހިނދުކޮޅެއްގެ ތެރޭގައި ބެލިންހަމް އެ ގޮތަށް ވާހަަކަ ދެއްކީ އެނގެން ހުރި މައުލޫމާތަށް ބަލައިގެން ކަމަށާއި އެއީ މެޗުން ބަލިވުމުގެ ޖަޒުބާތުގައި ހުރެގެން ދެކެވުނު ވާހަކަ އަކަށް ވެދާނެ ކަމަށް ޒޯކް ގަބޫލުކުރެ އެވެ.
ޒޯކް ބުނީ އެއީ ދައްކަން ޖެހޭ ވާހަކައެއް ނޫން ކަމަށާއި އެކަމަކު، އެ ވާހަކަތަކުގައި ދޮގެއް ވެސް ނެތް ކަމަށެވެ. އެހެން ކަމުން ބެލިންހަމަށް އަދަބެއް އަންނަން ޖެހޭނެ ކަމަށް ނުދެކޭ ކަމަށް ޒޯކް ބުނެފައިވެ އެވެ.
އިނގިރޭސި ގައުމީ ޓީމުގައި ވެސް ހިމެނޭ އުމުރުން 18 އަހަރުގެ ބެލިންހަމްގެ އިތުރުން ބަޔާން-ޑޯޓްމަންޑް މެޗުގެ ރެފްރީ ޒޯޔާއާ މެދު ސޯޝަލް މީޑިއާގައި ޑޯޓްމަންޑްގެ ފޯވާޑް އާލިން ބްރައުޓް ހާލަންޑް ވެސް ވަނީ ހިތްހަމަ ނުޖެހުން ފާޅުކޮށްފަ އެވެ.
