ރާއްޖޭގެ ފުޓްސަލްގައި މި ވަގުތު ހުރި އެންމެ ނަގާކިޔާ ކުޅުންތެރިންގެ ލިސްޓެއް ހަދާނަމަ އެންމެ ކުރިން ޖާގަ ހޯދާނެ އެއް ކުޅުންތެރިއަކީ އަލީ ހާފިޒް (ހާއްޕެ) އެވެ. ރާއްޖޭގެ އެކި ރަށްރަށުގައި ބާއްވާ ވަރުގަދަ ފުޓްސަލް މުބާރާތްތަކުގައި ތަފާތު މޮޅު ކުޅުމެއް ދައްކަމުން އަންނަ ހާއްޕެ އަކީ އެންމެ ފަހުން 2019 ވަނަ އަހަރު ބޭއްވި ކްލަބް މޯލްޑިވްސް ކަޕް އިން ހޮވި "ފުޓްސަލް ކިންގް" އެވެ.
ދެ އަހަރެއްހާ ދުވަހުގެ މެދުކެނޑުމަށް ފަހު މި ފަހަރުގެ ކްލަބް މޯލްޑިވްސް ކަޕް ކުޅޭއިރު، މި މުބާރާތުގައި ވެސް ހާއްޕެ އަންނަނީ އޭނާގެ އެންމެ ރަނގަޅު ފޯމުގައި ކުޅެމުންނެވެ.
ހާއްޕެ، 2019 ވަނަ އަހަރު ކްލަބް މޯލްޑިވްސް ކަޕްގައި ކުޅުނީ މުބާރާތުގެ ޗެމްޕިއަންކަން ހޯދި ޔުނައިޓެޑް ބީއެމްއެލް އަށެވެ. މި ފަހަރުގެ މުބާރާތުގައި ހާއްޕެ، ކްލަބް ވެމްކޯ އަށް ކުޅޭއިރު، ގްރޫޕް ސްޓޭޖުގައި ކުޅުނު ތިން މެޗުގައި ވެސް ހާއްޕެ ވަނީ ވެމްކޯ މޮޅުކޮށްދިނުމުގައި އެހީތެރިވެދީ މެޗުގެ މޮޅު ކުޅުންތެރިޔާގެ މަގާމު ހޯދައިފަ އެވެ. މި ފަހަރުގެ މުބާރާތުގެ ގްރޫޕް ސްޓޭޖުގައި ކުޅުނު ކޮންމެ މެޗެއްގެ މޮޅު ކުޅުންތެރިޔާ ނެގުމުގެ ރެކޯޑް އޮތީ ހާއްޕެ އަތުގަ އެވެ.
ވެމްކޯ އިން ގްރޫޕް ސްޓޭޖުގައި ކުުޅުނީ ސްޓެލްކޯ، ޔޫތު މިނިސްޓްރީ އަދި ސިޓީ ކައުންސިލާ ދެކޮޅަށެވެ. ތިން މެޗުގައި ހާއްޕެ ވަނީ ފަސް ގޯލު ޖަހައި ހަ ގޯލު ޖަހަން އެހީތެރިވެދީފަ އެވެ. މެޗުތަކުގެ މޮޅު ކުޅުންތެރިޔާގެ މަގާމު ހާއްޕެ އަށް ލިބިފައިވަނީ ގޯލު ޖެހުމުގެ އިތުރުން ޓީމު މޮޅުކޮށްދޭން އޭނާ އަދާކުރި މުހިއްމު ރޯލުގެ ސަބަބުންނެވެ.
ފުރަތަމަ ޑިވިޝަނުގައި ޓީސީ ސްޕޯޓްސް ކްލަބަށް ކުރިން ކުޅުނު ހާއްޕެ، މިހާތަނަށް މި ވަނީ ކްލަބް މޯލްޑިވްސް ކަޕްގައި ފަސް އަހަރު ކުޅެފަ އެވެ.
ރާއްޖޭގައި ބޭއްވޭ އެންމެ ދުވަސްވީ އަދި އެންމެ ފޯރިގަދަ ފުޓްސަލް މުބާރާތުގައި ހާއްޕެ އެންމެ ފުރަތަމަ ކުޅުނީ 2015 ވަނަ އަހަރު އެވެ. ފުރަތަމަ ތިން އަހަރު ހާއްޕެ ފެނުނީ ފުޓްސަލްގައި ވަރުގަދަ ނަމެއް ކަމަށްވާ އެމްޕީއެލް ޓީމުންނެވެ. އެމްޕީއެލްއާ އެކު ހާއްޕެ ވަނީ 2017 ވަނަ އަހަރުގެ ފައިނަލުގައި ކުޅެ، އެމްއާރްޑީސީ އަތުން ބަލިވެފަ އެވެ.
ޖެހިގެން އައި އަހަރު ހާއްޕެ ކުޅުނީ ކްލަބް ވެމްކޯ އަށެވެ. ވެމްކޯއާ އެކު ދެ ވަނަ ބުރުން މުބާރާތުން ކެޓިއިރު، އޭނާ ދެން ފެނުނީ 2016 ވަނަ އަހަރު ފުރަތަމަ ފަހަރަށް ކްލަބް މޯލްޑިވްސް ކާމިޔާބުކުރި ބީއެމްއެލް ޓީމުންނެވެ. އެންމެ ފަހުން ބޭއްވި ކްލަބް މޯލްޑިވްސް ކަޕްގެ ތަށި ބީއެމްއެލް އިން އުފުލާލިިއިރު، ހާއްޕެ ވަނީ އެ މުބާރާތުގައި 13 ގޯލު ޖަހައި 10 ގޯލު ޖަހަން ފުރުސަތު ތަނަވަސްކޮށްދީފަ އެވެ.
އެންމެ ފަހުން ކްލަބް މޯލްޑިވްސް ކަޕް ފައިނަލުގައި ބަލިވި ވެމްކޯ އިން މި ފަހަރު މުބާރާތުގެ ތަށި ހޯދުމުގެ އަމާޒުގައި ވަރުގަދަ ޓީމެއް ވަނީ އެކުލަވާލައިފަ އެވެ. ވެމްކޯ އަށް ފުރަތަމަ ފަހަރަށް ކްލަބް މޯލްޑިވްސް ކަޕް ހޯދޭނީ ހާއްޕެ ރަނގަޅު ފޯމެއްގައި ބަހައްޓައިގެންނެވެ. އެކަން މުބާރާތުގައި ވެމްކޯ މިހާތަނަށް ކުޅުނު މެޗުތަކުން ފެނުނު ކުޅުމަށް ބަލާއިރު ސާބިތުވެ އެވެ.
ކްލަބް މޯލްޑިވްސް ކަޕްގެ ދެ ވަނަ ބުރުގައި މާދަމާރޭ ވެމްކޯ ކުޅޭ މެޗުގައި ނުކުންނާނީ އެފްއެސްއެމްއާ ދެކޮޅަށެވެ.
