ރޯމް (ޑިސެމްބަރު 6) - އިޓާލިއަން ލީގުގައި ރޭ ޖެނޯއާ އަތުން އަމިއްލަ ދަނޑުގައި 2-0 އިން މޮޅުވެ، ޔުވެންޓަސް ތާވަލްގެ ފަސް ވަނަ އަށް ޖެހިލައިފި އެވެ.
މެޗުގެ ނުވަ ވަނަ މިނިޓުގައި ޔުވެންޓަސް އިން ލީޑު ނެގީ ކޮލަމްބިއާގެ ވިންގް، ހުއާން ކުއަޑްރާޑޯ ޖެހި ލަނޑުންނެވެ. ޔުވެންޓަސް އަށް ލިބުނު ކޯނަރަކުން ކުއަޑްރާޑޯ ހުރަސްކޮށްލި ބޯޅަ އަމާޒުވީ ގޯލުގެ ތެރެއަށެވެ.
މެޗުގެ 82 ވަނަ މިނިޓުގައި ޔުވެންޓަސްގެ ދެ ވަނަ ލަނޑު ޖެހީ އާޖެންޓީނާގެ މިޑްފީލްޑަރު ޕައުލޯ ޑިބާލާ އެވެ.
މިއީ އިޓާލިއަން ލީގުގައި އެންމެ ފަހުން ޔުވެންޓަސް ކުޅުނު ފަސް މެޗުގެ ތެރެއިން، އެ ޓީމު މޮޅުވި ހަތަރު ވަނަ މެޗެވެ. ޔުވެންޓަސް ތާވަލްގެ ފަސް ވަނަ އަށް އެރިއިރު، އެ ޓީމުގެ ކޯޗު މަސިމޯ އެލެގްރީގެ އުންމީދަކަށް ވާނީ ކުރިއަށް އޮތް މެޗުތަކުން ރަނގަޅު ނަތީޖާތަކެއް ނެރި، އެހެން ޓީމުތަކާ އޮތް ފަރަގު ކުޑަކުރުމަށެވެ.
ތާވަލްގެ އެއް ވަނައިގައި އޮތް އޭސީ މިލާނާއި ޔުވެންޓަސްއާ ދެމެދު 11 ޕޮއިންޓްގެ ތަފާތެއް އެބައޮތެވެ.
ޔުވެންޓަސްގެ މިޑްފީލްޑަރު ޑިބާލާ ބުނީ ކުރިއަށް އޮތް މެޗުތަކުގައި ވެސް ޔުވެންޓަސްގެ ފޯމު ހިފަހައްޓަން ބުރަކޮށް މަސައްކަތް ކުރަންޖެހޭ ކަމަށެވެ.
މި ސީޒަންގައި ޖެނޯއާ ކުޅުނު 16 މެޗުގެ ތެރެއިން އެ ޓީމު މޮޅުވީ އެންމެ މެޗަކުންނެވެ. މިލާންގެ ކުރީގެ ފޯވަޑް އަންްދްރޭ ޝެވްޗެންކޯ އެ ޓީމުގެ ކޯޗުކަމާ ހަވާލުވި ފަހުން ކުޅުނު ހަތަރު މެޗުން އެ ޓީމަށް ލިބުނީ އެންމެ ޕޮއިންޓެކެވެ. ޝެވްޗެންކޯ އެ ޓީމާ ހަވާލުވި ފަހުން، އެ ޓީމުން އަދި ގޯލެއް ވެސް ނުޖަހަ އެވެ.
އިޓާލިއަން ލީގުގައި ރޭ ބޮލޯންޔާ އަތުން 3-2 އިން މޮޅުވެ، ފިއޮރެންޓީނާ ވަނީ ފަސް ވަނައިގައި އޮތް ޔުވެންޓާސްއާ ޕޮއިންޓްގެ ގޮތުން އެއްވަރުކޮށްފަ އެވެ. -- އޭއެފްޕީ
