މިއުނިކް (ޑިސެމްބަރު 4) - ޖަރުމަނު ލީގުގައި މިރޭ ރޮބަޓް ލެވަންޑޯސްކީގެ ގޯލުތަކާ އެކު 3-2 އިން ބޮރޫޝިއާ ޑޯޓްމަންޑް ބަލިކޮށް ބަޔާން މިއުނިކުން ލީގުގެ އެއް ވަނައިގައި ހަތަރު ޕޮއިންޓަށް ލީޑުފުޅާކޮށްފި އެވެ.
އެންމެ ފަހުގެ ޗެމްޕިއަން ބަޔާން، ލީގުގެ އެއް ވަނައިގައި އޮތީ 14 މެޗުން 34 ޕޮއިންޓާ އެކު އެވެ. ދެ ވަނައިގައި އޮތް ޑޯޓްމަންޑަށް ވަނީ 14 މެޗުން 30 ޕޮއިންޓް ލިބިފަ އެވެ.
ޑޯޓްމަންޑްގެ ސިގްނަލް އިޑޫނާ ޕާކުގައި މިރޭގެ މެޗު ކުޅުނީ ނިސްބަތުން މަދު އަަދަދެއްގެ ސަޕޯޓަރުންގެ ކުރިމަތީގަ އެވެ. އެއީ ކޮވިޑް-19ގެ އާ ވޭރިއަންޓް އޮމިކްރޯންގެ ނުރައްކާ ޖަރުމަނަށް ބޮޑުވެފައިވާތީ އެވެ. ވައިރަހުގެ ސަބަބުން ދަނޑުތަކަށް ހުއްދަދީފައިވަނީ ދަނޑުގެ ޖާގައިގެ ވަކި އިންސައްތަ އަކަށް ސަޕޯޓަރުން ވެއްދުމަށެވެ.
މިރޭ ލީޑުނެގީ އަމިއްލަ ދަނޑުގައި ކުޅުނު ޑޯޓްމަންޑުންނެވެ. އެ ޓީމުގެ ހޫލިއަން ބްރަންޑްޓް މެޗުގެ ފަސް ވަނަ މިނިޓްގައި ވަނީ އޭރިއާތެރެއިން ކޮންޓްރޯލް ކުރުމަށް ފަހު ގޯލުގެ މަތީ ކަނަށް ބޯޅަ އަމާޒުކޮށްލައިފަ އެވެ. ޑޯޓްމަންޑަށް ލީޑު ހިފަހައްޓައިލެވުނީ ހަތަރު މިނިޓް އެވެ. ލެވަންޑޯސްކީ ވަނީ މެޗުގެ ނުވަ ވަނަ މިނިޓްގައި ގޯލެއް ޖަހައި ބަޔާނަށް އެއްވަރުކޮށްދީފަ އެވެ.
ލަނޑު ޖެހުމަށް ފަހު ބަޔާންގެ މުލާ (ކ) އާއި ކޯމަން އުފާފާޅުކުރަނީ.
ފުރަތަމަ ހާފު ނިމުމުގެ ކުރިން ބަޔާނުން ލީޑުނެގީ 44 ވަނަ މިނިޓްގައި ކިންގްސްލީ ކޯމަން ވައްދާލި ގޯލުންނެވެ. އެކަމަކު، ދެ ވަނަ ހާފްގެ ކުޅުން ފެށިގެން ތިން މިނިޓް ތެރޭ ޖޫޑް ބެލިންހަމް ދިން ބޯޅައަކުން ޑޯޓްމަންޑްގެ ހުނަރުވެރި ފޯވާޑް، އާލިން ބްރައުޓް ހާލަންޑް ވަނީ އެ ޓީމަށް އެއްވަރުކޮށްދީފަ އެވެ.
ބަޔާން މޮޅުކޮށްދިން ލަނޑު މެޗުގެ 77 ވަނަ މިނިޓްގައި ޕެނަލްޓީ އަކުން ޖެހީ ލެވަންޑޯސްކީ އެވެ. ޑޯޓްމަންޑްގެ މާކޯ ރޯސް އަށް ދެ ވަނަ ރީނދޫ ކާޑާ އެކު ރަތް ކާޑެއް ދެއްކިއިރު، ޑޯޓްމަންޑްގެ އެއް ކުޅުންތެރިއަކު މަދުުވުމުގެ ފައިދާނަގައި ބަޔާންގެ ކޮރެންޓިން ޓޮލީސޯ އަށް ގޯލު ޖަހަން ލިބުނު ފުރުސަތުގެ ބޭނުން ނުހިފުނެވެ.
ޖަރުމަނު ލީގުގެ ތިން ވަނައިގައި އޮތް ބަޔާ ލެވަކޫސަނުން ވަނީ އަމިއްލަ ދަނޑުގައި 7-1 އިން ފާތު ބަލިކޮށްފަ އެވެ. ލެވަކޫސަން އަށް ވަނީ 14 މެޗުން 27 ޕޮއިންޓް ލިބިފަ އެވެ.
