މެޑްރިޑް (ޑިސެމްބަރު 1) - ސްޕެނިޝް ލީގުގައި މިރޭ ކަރިމް ބެންޒެމާގެ ގޯލުން 1-0 އިން އެތުލެޓިކް ބިލްބާއޯ ބަލިކޮށް ލީގުގެ އެއް ވަނައިގައި ރެއާލް މެޑްރިޑުން ހަތް ޕޮއިންޓުގެ ލީޑެއް ނަގައިފި އެވެ.
ރެއާލް އެއް ވަނައިގައި އޮތީ 15 މެޗުން 36 ޕޮއިންޓާ އެކު އެވެ. އެންމެ ފަހުގެ ޗެމްޕިއަން އެތުލެޓިކޯ މެޑްރިޑް ދެ ވަނައިގައި އޮތީ 14 މެޗުން 29 ޕޮއިންޓާ އެކު އެވެ. އެތުލެޓިކޯ ދެން އެންމެ އަވަހަށް ކުޅޭ މެޗުގައި ހުކުރު ދުވަހުގެރޭ ކުޅޭ ރެއާލް މަޔޯކާއާ އެވެ.
މެޑްރިޑް ދަނޑުގައި މިރޭގެ މެޗު ފަށައިގެން ބިލްބާއޯ އިން ދިޔައީ ލިބޭ ފުރުސަތުތަކުގައި ރެއާލްގެ ޑިފެންސްލައިނަށް ބާރު ބޮޑުކުރަމުންނެވެ. އެ ގޮތުން ބިލްބާއޯގެ އެންމެ ކުރިއަށް ކުޅެމުންދިޔަ އިނާކީ ވިލިއަމްސް ވަނީ ނުރައްކާތެރި ދެ ހަމަލާއެއް ފޮނުވާލައިފަ އެވެ. ވިލިއަމްސް ޖެހި ދެ ބޯޅަ ގޯލާ ސީދާނުވެ ދިޔައިރު، އެ ޓީމުގެ ރައުލް ގާސިއާ މުޅިން ހުސްކޮށް ހުރެފައި ބޮލުން ޖެހި ބޯޅަ ރެއާލްގެ ކީޕަރު ތިބައު ކޯޓުއާ ވަނީ މަތަކޮށްފަ އެވެ.
ބިލްބާއޯ އަށް ލިބުނު ރަނުގެ ފުރުސަތުތައް ނަގާލިއިރު، ރެއާލުން މެޗުގައި ޖެހި ހަމައެކަނި ގޯލު ކާމިޔާބުކުރީ 40 ވަނަ މިނިޓްގަ އެވެ. ރެއާލްގެ މާކޯ އަސެންސިއޯ އޭރިއާބޭރުން ފޮނުވާލި ބޯޅަ ބިލްބާއޯގެ ކީޕަރު އުނާއި ސިމޯން އަތުގައި ޖެހިފައި ނުކުތް ވަގުތު ރެއާލްގެ ލޫކަ މޮޑްރިޗް ގޯލަށް ފޮނުވާލަން މަސައްކަތް ކުރި އެވެ. މޮޑްރިޗް ޖެހި ބޯޅަ މިސްރާބު ބަދަލުވެގެން ލިބުނީ ބެންޒެމާ އަށެވެ. އޭނާ ވަނީ ހަމަޖެހިލާފައި ގޯލުގެ ތެރެއަށް ބޯޅަ ފޮނުވާލައިފަ އެވެ.
މިއީ މި ފަހަރު ހުރިހާ މުބާރާތެއްގައި ބެންޒެމާ 24 މެޗުން ޖެހި 20 ވަނަ ގޯލެވެ. ފްރާންސް ފުޓްބޯލް އިން ހޮވި ބެލޮންޑިއޯ އެވޯޑަށް ވާދަކުރި ބެންޒެމާ ދިޔައީ ހަތަރު ވަނަ އެވެ. މިރޭގެ މެޗުގައި ބެންޒެމާ ގޯލު ޖެހުމުން ރެއާލްގެ ސަޕޯޓަރުން އޭނާ އަށް ތަރުހީބު ދިނުމުގެ ގޮތުން ގޮވީ "ކަރީމް ޑިއޯ" މިހެނެވެ.
ބިލްބާއޯ އިން މިރޭގެ މެޗުގެ ދެ ވަނަ ހާފުގައި ނަތީޖާ ހަމަހަމަކުރަން ފޮނުވާލި ހަމަލާތައް ހުއްޓުވުމުގައި ރެއާލްގެ ފަހަތަށް ކުޅޭ ކުޅުންތެރިން ވަނީ ރަނގަޅު ކުޅުމެއް ދައްކައިފަ އެވެ.
މެޗަށް ފަހު ރެއާލްގެ ކޯޗު ކާލޯ އަންޗެލޮޓީ ބުނީ ބެންޒެމާ އަށް ބެލޮންޑިއޯ ނުލިބުމަކީ ހުރިހާ ކަމެއްގެ ނިމުމެއް ނޫން ކަމަށާއި އެކަން މިރޭ ފެނުނު ތަރުހީބުން ވެސް އެގޭ ކަމަށެވެ.
