ބަންގްލަދޭޝްގައި މި މަހު ކުރިއަށްދާ ސެންޓްރަލް ޒޯން މެންސް ސީނިއާ ވޮލީބޯޅަ މުބާރާތަށް ތައްޔާރުވުމަށް ގައުމީ ފިރިހެން ވޮލީބޯޅަ ޓީމުން ސްރީލަންކާގެ ގައުމީ ވޮލީ ޓީމާ ދެކޮޅަށް ރާއްޖޭގައި ތިން މެޗެއް ކުޅޭ ގޮތަށް ހަމަޖެހިއްޖެ އެވެ.
މިއީ ދާދި ފަހުން ޔޫތު މިނިސްޓަރު އަހުމަދު މަހުލޫފް، މަހިންދަ ރާޖަޕަކްސަ ފޯ ނޭޝަންސް ކަޕަށް ކުރެއްވި ދަތުރުފުޅުގައި ލަންކާއާ އެކު މަޝްވަރާ ކުރެވުނު މެޗުތަކެކެވެ. މީގެ ކުރިން 2019 ވަނަ އަހަރު ވެސް މިނިސްޓަރު މަހުލޫފްގެ ދައުވަތަކަށް ސެންޓްރަލް ޒޯން މުބާރާތުގެ ކުރިން ލަންކާ އަށް ދައުވަތުދީގެން މާލޭގައި ތިން މެޗެއް ކުޅުނެވެ.
ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)ގެ ރައީސް މުހައްމަދު ރަނޭޝް (ރަނޭ)، މިއަދު "އަދަދު" އަށް ވިދާޅުވީ މިހާރު ހަމަޖެހިފައިވާ ގޮތުން މި މަހު އަށް ވަަނަ ދުވަހު ލަންކާ ޓީމު ރާއްޖެ އަންނާނެ އެވެ. އެ އަށް ފަހު މެޗުތައް ކުޅެން ހަމަޖެހިފައިވަނީ މި މަހު 9 އާއި 10 އަދި 12 ވަނަ ދުވަހު ކަމަށް ރަނޭ ވިދާޅުވި އެވެ.
"މީގެ އަސްލު ބޮޑު މެޗަކީ 12 ވަނަ ދުވަހު މި އޮތް މެޗު. އަޅުގަނޑުމެން މި އަންނަނީ މި މެޗުތައް ފޯރިގަދަ ކުރުމުގެ ގޮތުން ގިނަ ކަންތައްތަކެއް ރާވަމުން،" ރަނޭ ވިދާޅުވި އެވެ.
ލަންކާއާ ދެކޮޅަށް ގައުމީ ވޮލީ ޓީމުން ވަނީ 2019 ވަނަ އަހަރު އޮގަސްޓް މަހު މާލޭގައި ތިން މެޗެއް ކުޅެފަ އެވެ. ތިން މެޗުން ވެސް ގައުމީ ޓީމު ބަލިވިއިރު، މެޗަކަށް ފަހު މެޗެއް ރަނގަޅަށް ކުޅުނެވެ.
ފުރަތަމަ މެޗުން ރާއްޖެ ބަލިވީ ސީދާ ތިން ސެޓުންނެވެ. އެކަމަކު، ދެން ކުޅުނު ދެ މެޗުން ވެސް ލަންކާ އިން ރާއްޖެ ބަލިކުރީ 3-1 ސެޓުންނެވެ. މި ތިން މެޗަށް ވެސް ނިސްބަތުން ގިނަ ސަޕޯޓަރުންތަކެއް ވަނެވެ.
ސެންޓްރަލް ޒޯން މުބާރާތަށް ގައުމީ ވޮލީ ޓީމުން ތައްޔާރުވަމުން އަންނަނީ މުހައްމަދު ސާޖިދު (ކާއްޓޭ)ގެ ކޯޗުކަމުގަ އެވެ. މިއީ ކާއްޓޭ ގައުމީ ފިރިހެން ވޮލީ ޓީމުގެ ކޯޗުގެ މަގާމު އަދާކުރާ ތިން ވަނަ ފަހަރެވެ. ލަންކާއާ ދެކޮޅަށް 2019 ވަނަ އަހަރު މާލޭގައި މެޗުތައް ކުޅުނުއިރު ވެސް ގައުމީ ޓީމާ ހަވާލުވެހުރީ ކާއްޓޭ އެވެ.
ގައުމީ ޓީމުން އެންމެ ފަހުން ވާދަކުރި މުބާރާތަކީ 2019 ވަނަ އަހަރު ނޭޕާލްގެ ކަތުމަންޑޫގައި ބޭއްވީ ސައުތު އޭޝިއަން ގޭމްސް އެވެ. އެ މުބާރާތުގައި ގައުމީ ޓީމަށް އިރުޝާދުދިނީ ދުނިޔޭގެ ފެންވަރުގެ ކޯޗު ސާބިއާގެ މިލޮރަޑް ކިޔާޗް އެވެ. ކޮވިޑް-19ގެ ތެރޭގައި މިލޮރަޑްގެ ކޮންޓްރެކްޓް މިދިޔަ އަހަރު ހަމަވުމުން އޭނާ ވަނީ ޓީމު ދޫކޮށްލައިފަ އެވެ.
ވީއޭއެމްގެ މިހާރު އޮތް ލީޑަޝިޕުން އަންނަނީ ބިދޭސީ ކޯޗަކާ ގައުމީ ފިރިހެން ވޮލީ ޓީމު ހަވާލުކުރުމުގެ މަސައްކަތް ކުރަމުންނެވެ.
ގައުމީ ޓީމަށް ކޯޗެއް ހަމަޖެއްސުމުގެ މަސައްކަތުގައި ވީއޭއެމަށް ދުނިޔޭގެ ވޮލީ ބޯޅައިގެ ޖަމިއްޔާ، އެފްއައިވީބީގެ އެހީ ލިބޭނެ އެވެ. ވީއޭއެމުން ބުނީ ގައުމީ ޓީމަށް ގެންނަން މަސައްކަތް ކުރަނީ މަތީ ފެންވަރުގެ ރަނގަޅު ކޯޗެއް ކަމަށެވެ.
މި މަހު 21-29 އަށް ކުރިއަށްދާ ސެންޓްރަލް ޒޯން މުބާރާތަށް ތައްޔާރުވުމުގެ ގޮތުން ގައުމީ ފިރިހެން ވޮލީ ޓީމުން ޓްރެއިނިން ކޭމްޕެއް ޖެހުމުގެ މަސައްކަތް ވެސް އަންނަނީ ކުރަމުންނެވެ. މިހާރު އޮތްގޮތުން އެންމެ ފުރުސަތު ބޮޑީ ގަތަރުގައި ޓްރެއިނިން ކޭމްޕެއް ފުރިހަމަކުރުމުގެ އެވެ. ބަހްރޭނުގައި ޓްރެއިނިން ކޭމްޕެއް ކުރިއަށް ގެންދެވޭތޯ ވެސް ވީއޭއެމުން މަސައްކަތްކުރި އެވެ.
