މެންޗެސްޓާ (ނޮވެމްބަރު 30) - މެންޗެސްޓާ ޔުނައިޓެޑްގެ ކޯޗުގެ މަގާމާ ހަވާލުވި ޖަރުމަނުގެ މަޝްހޫރު ކޯޗު ރަލްފް ރަންގްނިކް، ބުރާސްފަތި ދުވަހުގެރޭ އާސެނަލާ ދެކޮޅަށް ޔުނައިޓެޑް ކުޅޭ މެޗުގައި ޓީމަށް އިރުޝާދު ނުދޭނެ ކަމަށް އެ ކްލަބުން ބުނެފި އެވެ.
ހަ މަސް ދުވަހުގެ ކޮންޓްރެކްޓެއްގައި ރަންގްނިކް، ޔުނައިޓެޑާ ހަވާލުވި ކަމަށް އިއްޔެ އެ ކްލަބުން ވަނީ ރަސްމީކޮށް އިއުލާނުކޮށްފަ އެވެ. އެއާ އެކު ރަންގްނިކް ޔުނައިޓެޑަށް ކޯޗުކޮށްދޭ ފުރަތަމަ މެޗަކީ ބުރާސްފަތި ދުވަހުގެރޭ އިނގިރޭސި ޕްރިމިއާ ލީގުގައި ޔުނައިޓެޑުން އާސެނަލާ ކުޅޭ މެޗު ކަމަށް ބެލެވުނެވެ. އެކަމަކު، ޔުނައިޓެޑުން މިއަދު ބުނީ އާސެނަލް މެޗުގެ ތައްޔާރީތަކުގައި ބައިވެރިވެވޭހާ ތަނަށް ރަންގްނިކްގެ ވޯކްޕާމިޓްގެ ކަންކަން އެއްކޮށް ހަމަނުޖެހޭ ކަމަށެވެ.
އިނގިރޭސި މީޑިއާ އަށް ޔުނައިޓެޑްގެ އޮފިޝަަލަކު ދިން އިންޓަވިއުއެއްގައި ބުނީ ރަންގްނިކް މިއަދުގެ ވަގުތެއްގައި އިންގްލެންޑަށް އައިސް ރަސްމީކޮށް ވޯކްޕާމިޓްގެ ކަންކަން ކުރިއަށް ގެންދިއުމުގެ ހުރިހާ ކަމެއް ފަށާނެ ކަމަށެވެ. އަދި ކުރިއަށް އޮތް ދެ ދުވަހެއްގެ ތެރޭގައި އެ ހުރިހާ ކަމެއް ނިމޭނެ ކަމަށާއި އެއާ އެކު އަންނަ އާދިއްތަ ދުވަހު އިިނގިރޭސި ޕްރިމިއާ ލީގުގައި ޔުނައިޓެޑުން ކްރިސްޓަލް ޕެލަސްއާ ކުޅޭ މެޗުގައި ރަންގްނިކް އަށް ޓީމަށް އިރުޝާދުދެވޭނެ ކަމަށް ގަބޫލުކުރާ ކަމަށެވެ.
އާސެނަލް މެޗުގައި ވެސް ޔުނައިޓެޑްގެ ކުޅުންތެރިންނަށް އިރުޝާދުދޭނީ ކެރިކް.-- ފޮޓޯ: އޭއެފްޕީ
ކުރިން ޝާލްކާ އާއި އާރްބީ ލައިޕްޒިގު އަދި ހޮފެންހައިމަށް ކޯޗުކޮށްދިން ރަންގްނިކް ޔުނައިޓެޑް ކޯޗަކަށް ގެނައީ ރަޝިއާގެ ލޮކޮމޯޓިވް މޮސްކޯގެ ހެޑް އޮފް ފުޓްބޯލްގެ މަގާމުގަ އެވެ. ޔުނައިޓެޑަށް އަންނަ އަހަރުގެ މެއި މަހުގެ ނިޔަލަށް ރަންގްނިކް ކޯޗުކޮށްދޭނެ އެވެ. އޭގެ ފަހުން އޭނާ ދެ އަހަރުގެ މުއްދަތަކަށް ޔުނައިޓެޑްގެ ކޮންސަލްޓަންޓެއްގެ ގޮތުގައި މަސައްކަތްކުރާނެ އެވެ. އެ މުއްދަތުގައި ޔުނައިޓެޑަށް އާ ކޯޗެއް ގެނައުމާއި ކުޅުންތެރިން ރެކްރޫޓް ކުރުމުގެ މަޝްވަރާތަކުގައި ރަންްގްނިކް ބައިވެރިވާނެ އެވެ.
އާސެނަލާ ދެކޮޅަށް ކުޅޭ މެޗުގައި ޔުނައިޓެޑްގެ ކޯޗަކަށް ހުންނާނީ އެންމެ ފަހުން ދެ މެޗުގައި އެ ޓީމުގެ ހެޑް ކޯޗުގެ ޒިންމާ ނެގި މައިކަލް ކެރިކް އެވެ.
ޔުނައިޓެޑްގެ ދާއިމީ ކޯޗަކަށް އެންމެ ފަހުން މަސައްކަތް ކުރި އޮލެ ގުނަ ސޯލްޝެއާގެ އެސިސްޓަންޓް ކޮޗަކަށް ހުރި ކެރިކްގެ ކޯޗުކަމުގައި ޔުނައިޓެޑުން ވަނީ ޗެމްޕިއަންސް ލީގުގައި ވިޔަރެއާލް ދަނޑުގައި 2-0 އިން މޮޅުވެފަ އެވެ. އަދި ޕްރިމިއާ ލީގުގައި ވަނީ ޗެލްސީއާ 1-1 އިން އެއްވަރުވެފަ އެވެ. މިހާރު އޮތްގޮތުން އާސެނަލް މެޗަކީ ޔުނައިޓެޑް ދަނޑުގައި ކެރިކް ހެޑް ކޯޗެއްގެ ގޮތުގައި ފެންނާނެ ފުރަތަމަ އަދި ފަހު މެޗެވެ.
