ޕެރިސް (ނޮވެމްބަރު 30) - ފްރާންސް ލީގުގައި މިދިޔަ އާދިއްތަ ދުވަހު ސެއިންޓް-އެޓިއެންއާ ދެކޮޅަށް ކުޅެނިކޮށް ލިބުނު އަނިޔާއަކާ ގުޅިގެން ޕީއެސްޖީ އަށް ކުޅެމުންދާ ބްރެޒިލްގެ ފޯވަޑް ނޭމާ އަށް އަށް ހަފްތާގެ މުއްދަތަަކަށް ކުޅުމާ ދުރުގައި ހުންނަންޖެހިދާނެ ކަމަށް އެ ކްލަބުން ބުނެފި އެވެ.
ސެއިންޓް-އެޓިއެން އަތުން 3-1 އިން ޕީއެސްޖީ މޮޅުވި މެޗުގެ 84 ވަނަ މިނިތްގައި، ނޭމާ އަށް އަނިޔާގެ، އޭނާ ވަނީ ދަނޑުން ބާލައިފަ އެވެ. ނޭމާ އަށް އަނިޔާވީ ސެއިންޓް-އެޓިއެންގެ ކުޅުންތެރިއަކު ކައިރިން ބޯޅަ ހިފައިގެން ދަނިކޮށް ފައި އެޅުނު ގޮތަކުން ކުޑަހުޅަށް ވަރަށް ބޮޑަށް އަނިޔާވެގެންނެވެ. އަށިގަނޑުގައި ދަނޑުން ބޭލިއިރު، ނޭމާ އަށް ހުރީ ރޮވިފަ އެވެ.
ޕީއެސްޖީން ބުނީ އެ މެޗުގައި ނޭމާގެ ވާތު ފައިގެ ކުޑަހުޅަށް ލިބުނު އަނިޔާއާ ގުޅިގެން އޭނާ އަށް އަލުން ދެން ކުޅެން ނުކުމެވޭނީ އަށް ހަފުތާ ފަހުން ކަމަށެވެ. މިއީ ޕީއެސްޖީގައި ނޭމާގެ އަނިޔާގެ ރެކޯޑަށް ބަލާއިރު، އަނެއްކާ ވެސް ދިމާވި ހާސްކަމެކެވެ. ދުނިޔޭގެ ރެކޯޑް އަގަކަށް ބާސެލޯނާ ދޫކޮށް 2017 ވަނަ އަހަރު ޕީއެސްޖީ އަށް ބަދަލުވި ނޭމާ އަށް އެ ކްލަބްގައި އެންމެ މޮޅު ކުޅުން ނުދެއްކެނީ އަނިޔާގެ މައްސަަލަތައް ތަކުރާރުކޮށް ދިމާވާތީ އެވެ.
ޕީއެސްޖީން ނޭމާގެ އަނިޔާގެ ފުރިހަމަ މައުލޫމާތު ކުރިއަށް އޮތް ދެ ދުވަހެއްގެ ތެރޭގައި މީޑިއާއާ ހިއްސާކުރާނެ އެވެ. މިހާރު އޮތްގޮތުން މި އަނިޔާއާ ގުޅިގެން ނޭމާ އަށް ފްރާންސް ލީގުގެ ހަތް މެޗާޢި ޗެމްޕިއަންސް ލީގުގެ މެޗެއް ގެއްލޭނެ އެވެ.
ފްރާންސް ލީގުގެ އެއްވަނައިގައި ޕީއެސްޖީ އޮތީ 12 ޕޮއިންޓްގެ ލީޑަކާ އެކު އެވެ. އަދި ޗެމްޕިއަންސް ލީގުގެ ދެވަނަ ބުރުގެ ޖާގައެއް ވެސް އޮތީ ޕީއެސްޖީ އަށް ކަށަވަރުވެފަ އެވެ. -- ބީބީސީ
