ހަތް އަހަރު ވަންދެން ޓީރެކްސް ބާސްކެޓްބޯޅަ ކްލަބްގެ ވަރުގަދަ ތަރިއެއްގެ ގޮތުގައި ހުރި ގައުމީ ޓީމުގެ ބާސްކެޓްބޯޅަ ޓީމުގެ އިބްރާހިމް ރަޝްވާން (ޗިކު)، ކިންގްސް ބާސްކެޓްބޯލް ކްލަބަށް ސޮއިކޮށްފި އެވެ.
ދާދި ފަހުން ސާބާ ޗެމްޕިއަންޝިޕްގައި ވާދަކުރި ގައުމީ ބާސްކެޓް ބޯޅަ ޓީމުގައި ހިމެނިގެން ކުޅުނު ޗިކު ވަނީ ޖޫނިއާ ކުޅުންތެރިއެއްގެ ގޮތުގައި ޓީރެކްސް ޓީމަށް ނުކުމެ، ފަހުން އެ ކްލަބްގެ ލީޑަރުންގެ ތެރޭގައި ހިމެނިފަ އެވެ. އޭނާ ކުރިއަށް އޮތް ސީޒަނަށް، އެއް އަހަރުގެ ކޮންޓްރެކްޓެއްގައި ވަނީ ކިންގްސް އަށް ސޮއިކޮށްފަ އެވެ.
"ހަވީރު" އިން ހޮވި 2015 ވަނަ އަހަރުގެ ރާްއްޖޭގެ އެންމެ މޮޅު ބާސްކެޓްބޯޅަ ކުޅުންތެރިޔާގެ މަގާމު ހޯދި ޗިކު ކިންގްސް އަށް ބަދަލުވުމަކީ އެ ޓީމަށް ލިބިގެންދާނެ ފުރިހަމަ ކަމެކެވެ. ކިންގްސް އިން ވަނީ ކުރިއަށް އޮތް ސީޒަނަށް ޓީމު ވަރުގަދަ ކުރުމުގެ ގޮތުން އަހުމަދު ހުޝާމްގެ ސޮއި ވެސް ހޯދައިފަ އެވެ.
ރެޑްބުލްގެ ބްރޭންޑް އެމްބަސަޑަރަކަށް ކުރިން ހުރި ޗިކު، 26، އަކީ ރާއްޖޭގެ ބާސްކެޓްބޯޅައިގައި މިދިޔަ 10 ވަރަކަށް އަހަރު ތެރޭގައި ގިނަ ކުރިއެރުންތަކެއް ހޯދި ކުޅުންތެރިއެކެވެ.
މިދިޔަ ސީޒަނުގެ މެޗެއްގެ ތެރެއިން ޗިކު.-- ފޮޓޯ: އަބްދުﷲ އަބީދު
ޗިކުގެ ހުނަރު އެންމެ ފުރަތަމަ ފާހަގަވީ 2011 ގައި ސްރީ ލަންކާގައި އޮތް ސްކޫލް ބާސްކެޓްބޯޅަ މުބާރާތެއްގެ ޗެމްޕިއަންކަން ރާއްޖޭގެ ޖޫނިއަ ޓީމުން ހޯދުމުންނެވެ. އެ މުބާރާތުގެ މޮޅު ކުޅުންތެރިޔާއަށް ހޮވުނީ ޗިކު އެވެ. އަދި އެ ފަހަރު "ހަވީރު"ގެ އެންމެ މޮޅު ޒުވާން ބާސްކެޓްބޯޅަ ކުޅުންތެރިޔާގެ އެވޯޑް ވެސް ޗިކު ހާސިލްކުރި އެވެ. އޭގެ ހަތަރު އަހަރު ފަހުން އޭނާ ވަނީ ރާއްޖޭގެ އެންމެ މޮޅު ބާސްކެޓްބޯޅަ ކުޅުންތެރިޔާގެ މަގާމު ހޯދައިފަ އެވެ. އެއީ ވެސް ހަމަ "ހަވީރު" އެވޯޑްގަ އެވެ.
ޓީރެކްސްއާ އެކު ޗިކު ރާއްޖޭގެ ހުރިހާ މުބާރާތެއް ކާމިޔާބުކުރި އެވެ. ކިންގްސްއާ އެކު ވެސް އޭނާގެ އަޒުމަކީ އެ ފަދަ ކާމިޔާބީތައް ތަކުރާރުކުރުމެވެ.
މި ފަހަރުގެ ސާބާ މުބާރާތުގެ ސްކޮޑަށް ޗިކު އައީ ކަކުލުގެ ސީރިއަސް އަނިޔާއެއްގެ ސަބަބުން ކުޅުމާ ދުރަށް ދާން ޖެހި، އެ އަނިޔާއިން އެއްކޮށް ރިކަވާވެގެންނެވެ. ޗިކޫގެ ކަކުލަށް 2018 ވަނަ އަހަރު ސީރިއަސް އަނިޔާއެއް ދިމާވީ ސްރީ ލަންކާގައި ކުޅުނު ތުރީއޮންތުރީ މުބާރާތެއްގެ ތެރެއިންނެވެ.
ޗިކޫ ވަނީ ރިހެބިލިޓޭޝަނަށް ފޯކަސްކޮށްގެން އަލުން ކުރީގެ ފޯމަށް އަންނަން މަސައްކަތްކޮށް އެއްކޮށް ފިޓްވެގެން އައިސް ލޯކަލް މުބާރާތްތަކުގައި ފަހުން ވާދަކޮށްފަ އެވެ. އަލުން ގައުމީ ޓީމަށް އަރަން ޗިކު ދެއްކި ހިތްވަރަށް ގައުމީ ޓީމުގެ ކޯޗުން ވެސް ވަނީ ތައުރީފުކޮށްފަ އެވެ.
