ކްލަބް މޯލްޑިވްސް ކަޕްގައި މިރޭ ކުޅުނު މެޗުތަކުން މޮޅުވެ، އުރީދޫ މޯލްޑިވްސް އާއި ޕޮލިސް ކްލަބުން މުބާރާތުގެ ދެ ވަނަ ބުރުގެ ފުރުސަތު ބޮޑުކޮށްފި އެވެ.
ރެހެންދި ފުޓްސަލް ދެ ދަނޑުގައި މިރޭ ކުޅުނު މެޗުތަކުގެ ތެރެއިން، އުރީދޫ އިން ވަނީ 2-1 އިން މީޑިއާނެޓް ބަލިކޮށްފަ އެވެ. ޕޮލިހުން ވަނީ ފަހަތުން އަރައި 4-2 އިން ޓްރޭޑް ކްލަބް ބަލިކޮށްފަ އެވެ. އުރީދޫ އާއި ޕޮލިހުގެ އިތުރުން ފުރަތަމަ ދެ މެޗުން މޮޅުވީ އެޗްޑީސީ އެވެ.
މިރޭގެ މެޗުގައި އުރީދޫގެ ދެ ގޯލު ވެސް ޖެހީ ހުސެއިން އާތިފް އެވެ. މީގެ ތެރެއިން ދެ ވަނަ ހާފުގައި ޖެހި ގޯލަކީ މީޑިއާނެޓްގެ ގޯލްކީޕަރު މުހައްމަދު ރަޝީދަށް ހެދުނު ގޯހެއްގެ ފައިދާނަގައި ހަނި އޭންގަލުން އާތިފް ކާމިޔާބުކުރި ގޯލެކެވެ. މެޗުގެ ފަހު ވަގުތު މީޑިއާނެޓްގެ ގޯލު ޖެހީ އެ ޓީމަށް ކުޅޭ 23 އަހަރުން ދަށުގެ ގައުމީ ޓީމުގެ ކުޅުންތެރިޔާ މޫސާ އަޒީމް ހަސަން އެވެ.
އުރީދޫ ވަނީ ފުރަތަމަ މެޗުން ކަސްޓަމްސް ބަލިކޮށްފަ އެވެ. މިރޭ މީޑިއާނެޓް އަތުން މި ހޯދި މޮޅާ އެކު އެ ޓީމު ގްރޫޕް އޭގެ އެއް ވަނައިގައި އޮތީ ދެ މެޗުން ހަ ޕޮއިންޓާ އެކު އެވެ. ދެ ވަނައިގައި އޮތީ ދެ މެޗުން ތިން ޕޮއިންޓް ހޯދި މީޑިއާނެޓް އެވެ. ތިން ވަނައިގައި އޮތް އެމްއޭސީއެލް އާއި ހަތަރެއްގައި އޮތް ކަސްޓަމްސް އަށް އެއް މެޗު ކުޅުނުއިރު، އަދި ޕޮއިންޓެއް ނުލިބެ އެވެ.
ފުރަތަމަ މެޗުގައި އެލައިޑް އަތުން ފަސޭހައިން މޮޅުވި ނަމަވެސް ޕޮލިހަށް މިރޭ ޓްރޭޑް ކްލަބްގެ މައްޗަށް ކުރިހޯދުނީ އުނދަގުލުންނެވެ. މި މެޗުގައި ފުރަތަމަ ދެ ގޯލު ޖެހީ ޓްރޭޑް ކްލަބުންނެވެ. ސައިފާން އަހުމަދު މަނިކާއި ޖުމައިލް ޖަލީލް (ޖުމްބެ)ގެ ގޯލުތަކުން ޓްރޭޑް ކްލަބް ދެ ގޯލުގެ ލީޑެއް ނެގި އެވެ. ކޯޗު ހަސަން ހަމީދު (ޑަކޭ)ގެ އިރުޝާދުގެ ދަށުން ކުޅޭ ޕޮލިހުން ވަނީ ފަހަތުން އަރައި ހަތަރު ގޯލު ޖަހައިފަ އެވެ.
ޕޮލިހުގެ ފުރަތަަމަ ދެ ގޯލު ޖެހީ ކެޕްޓަން އަލީ ރިޝްވާން އަހުމަދު (ރިޝޭ) އެވެ. އަނެއް ދެ ގޯލު ޖެހީ ބަދަލަކަށް އަރައި މުހައްމަދު ޝިފާން އެވެ. ޝިފާން ދެ ވަނަ ގޯލު ޖެހީ މަތީ ކަނަށް ބޯޅަ އަމާޒުކޮށްލައިގެންނެވެ.
ކުޅުނު ދެ މެޗުން ވެސް މޮޅުވެ، ޕޮލިސް ގްރޫޕް ބީގެ އެއް ވަނައިގައި އޮތީ ހަ ޕޮއިންޓާ އެކު އެވެ. ދެ ވަނައިގައި އޮތް ޓްރޭޑް ކްލަބަށް ވަނީ ދެ މެޗުން ތިން ޕޮއިންޓް ލިބިފަ އެވެ. ތިން ވަނައިގައި އޮތް ހުޅުމާލެ ހޮސްޕިޓަލާއި ހަތަރެއްގައި އޮތް އެލައިޑަށް އެއް މެޗު ކުޅުނުއިރު އޮތީ ޕޮއިންޓެއް ނުލިބި އެވެ.
ފުރަތަމަ މެޗުގައި ވެމްކޯ އަތުން ބަލިވި ސްޓެލްކޯ އިން މިރޭ ވަނީ 2-1 އިން ސިޓީ ކައުންސިލް ބަލިކޮށްފަ އެވެ. ސިޓީ ކައުންސިލް ވަނީ ފުރަތަމަ މެޗުގައި ޔޫތު މިނިސްޓްރީގެ މައްޗަށް ކުރިހޯދައިފަ އެވެ. ގައުމީ ޓީމުގެ ކުރީގެ ކެޕްޓަން އައްސަދު އަބްދުލް ގަނީގެ ކޯޗުކަމުގައި ކުޅޭ ސްޓެލްކޯގެ ގޯލުތައް ޖެހީ އިސްމާއިލް ނަސީމް އާއި އަހުމަދު ޖައިލަމް (ޖައި) އެވެ. ސިޓީ ކައުންސިލްގެ ހަމައެކަނި ގޯލު ޖެހީ 23 އަހަރުން ދަށުގެ ގައުމީ ޓީމުގެ މިޑްފީލްޑަރު ހުސެއިން އަހުސާމް މޫސާ (ތިއްތޭ) އެވެ.
ގްރޫޕް ސީގަައި ވެމްކޯ، ސިޓީ ކައުންސިލް އަދި ސްޓެލްކޯ ކޮންމެ ޓީމަކުން ތިން ޕޮއިންޓް ހޯދާފައިވާއިރު، ޔޫތު މިނިސްޓްރީ އަށް އަދި ޕޮއިންޓެއް ނުލިބެ އެވެ. ޔޫތު މިނިސްޓްރީ އާއި ވެމްކޯ އަދި ކުޅުނީ އެންމެ މެޗެކެވެ.
ގްރޫޕް އެޗްގައި އެސްޓީއޯ އަތުން 1-0 އިން ފުރަތަމަ މެޗުގައި ބަލިވި އެމްޓީސީސީން ވަނީ މިރޭ މޯލްޑިވްގޭސް އަތުން 3-0 އިން މޮޅުވެފަ އެވެ. އެސްޓީއޯގެ ގޯލުތައް ޖެހީ އަލީ ނާފިއު (ކަޅޭ) އާއި ހުސެއިން އަލީ (އަޗޭ) އަދި ހަސަން މިފްރާހް އެވެ.
މި ގްރޫޕްގައި އެސްޓީއޯ އާއި އެމްޓީސީސީ އަދި މޯލްޑިވްގޭސް ކޮންމެ ޓީމެއް ތިން ޕޮއިންޓް ހޯދިއިރު، ފުލުގައި އޮތް އެމްއެމްއޭ އަށް އަދި ޕޮއިންޓެއް ނުލިބެ އެވެ. އެސްޓީއޯ އާއި އެމްއެމްއޭ ކުޅުނީ އެންމެ މެޗެކެވެ.
މުބާރާތުގެ މެޗުތައް ދެން އޮންނާނީ އަންނަ ހޯމަ ދުވަހުގެރޭގަ އެވެ. އެ ރޭ ހަތަރު މެޗެއް ކުޅޭނެ އެވެ.
