ކްލަބް މޯލްޑިވްސް ކަޕްގެ އަންހެން ޑިވިޝަން، 18/30 ފުޓްސަލް ފިއެސްޓާގައި މިއަދު ހަވީރު ކުޅުނު މެޗުތަކުން މޮޅުވެ، އެންމެ ފަހުގެ ޗެމްޕިއަން އެމްޕީއެލް އާއި ދިވެހި ސިފައިންގެ ކްލަބުން މުބާރާތުގެ ސެމީގެ ފުރުސަތު ހޯދައިފި އެވެ.
ސިފައިން ވަނީ މިއަދު ކުޅުނު މެޗުން ޕޮލިސް ކްލަބް އަތުން 1-0 އިން މޮޅުވެ، ސައްތަ އިން ސައްތަ ރެކޯޑް ދަމަހައްޓައިފަ އެވެ. އަނެއް މެޗުގައި ޓީމު ފެނަކައިގެ މައްޗަށް އެމްޕީއެލް އިން ކުރިހޯދީ 3-0 އިންނެވެ. ސިފައިންނާއި އެމްޕީއެލް އިން ސެމީގެ ޖާގަ ކަށަވަރުކުރީ ބާކީ މެޗެއް އޮއްވަ އެވެ.
ރެހެންދި ފުޓްސަލް ދެ ވަނަ ދަނޑުގައި މިއަދު ހަވީރު ކުޅުނު މެޗުގައި ސިފައިންގެ ހަމައެކަނި ގޯލު ޖެހީ ކެޕްޓަން މަރިޔަމް ރިފާ އެވެ. ސިފައިންގެ ޓީމަށް ކުޅޭ ބަންގްލަދޭޝްގެ މަޓްސުޝިމާ ސުމައްޔާ ހުސްކޮށްލާފައި ދިން ބޯޅަ ރިފާ ވަނީ ތިރިތިރިން ގޯލުގެ ތެރެއަށް ފޮނުވާލައިފަ އެވެ.
ޕޮލިސް ޓީމުގެ ކެޕްޓަން ބޭންޑް އަޅައިގެން ކުޅުނު ފަދުވާ ޒާހިރަށް ފުރަތަމަ ހާފުގައި އަނިޔާވެގެން ވަނީ ބަދަލުކޮށްފަ އެވެ.
ޕޮލިސް ޓީމުގެ ތީބާ އާއި ލެބަނަންގެ ދެ ކުޅުންތެރިން ކަމަށްވާ ނާންސީ ޗޭލިއަން އާއި ސެލީން އަލް ހައްދާދުގެ އިތުރުން ރާއްޖޭގެ ގައުމީ ޓީމަށް ކުޅޭ ފާތިމަތު ތީބާ އަށް ލިބުނު ފުރުސަތުތަކުގެ ބޭނުމެއް ނުހިފުނެވެ. ޕޮލިހުން ފޮނުވާލި ހަމަލާތައް ހުއްޓުވުމުގައި ސިފައިންގެ ގޯލުގައި ހުރި ސާއިގާ ހުސެއިން ވެސް ވަނީ ރަނގަޅު ސޭވްތަކެއް ކޮށްފަ އެވެ.
މިއަދުގެ މެޗުގެ ތެރެއިން ސިފައިންގެ ޓީމުގެ ކީޕަރު ސާއިގާ: އޭނާ ވަނީ ރަނގަޅު ސޭވްތަކެއް ކޮށްފައި.-- ފޮޓޯ: އާއިމް ޒަމީރު/ އަދަދު
ސިފައިން ޓީމަށް ދެ ވަނަ ގޯލެއް ޖަހައިދޭން އެ ޓީމުގެ ބަންގްލަދޭޝް ތަރި ސަބީނާ ހަތުން ޖެހި ބޯޅަ ޕޮލިހުގެ ކީޕަރު އައިމިނަތު ލީޒާ އަތުގައި ޖެހިފައި އަމާޒުވީ ގޯލުގެ ދަނޑިއަށެވެ. ފަހު ވަގުތާ ޖެހެންދެން ވެސް ޕޮލިހުން ނަތީޖާ ހަމަހަމަކުރެވޭތޯ މަސައްކަތް ކުރި ނަމަވެސް ސިފައިންގެ ޑިފެންސް ފެނުނީ އެ އަށް ވުރެ ވަރުގަދަކޮށެވެ.
ސިފައިން ސެމީގެ ޖާގަ ޔަގީންކުރީ ކުޅުނު ތިން މެޗުން ވެސް މޮޅުވެ، ނުވަ ޕޮއިންޓް ހަަމަކޮށްގެންނެވެ. ދެ ވަނައިގައި އޮތީ ތިން މެޗުން ތިން ޕޮއިންޓާ އެކު ޕޮލިހެވެ. ދެން މި ގްރޫޕްގައި އޮތް ޓްރޭޑް ކްލަބަށް ޕޮއިންޓެއް ނުލިބެ އެވެ.
ރެހެންދި އެއް ވަނަ ދަނޑުގައި ކުޅުނު މެޗުގައި ފެނަކަ ކޮޅަށް އެމްޕީއެލްގެ ތަޖިކިސްތާން ފޯވާޑް މަދީނާ ފަޒިލޯވާ ދެ ގޯލު ޖެހިއިރު، އެ ޓީމުގެ އަނެއް ގޯލު ކާމިޔާބުކުރީ ފާތިމަތު ޖޫޒާން ޒަރީރް އެވެ. ޖޫޒާން އަކީ ގައުމީ އަންހެން ވޮލީ ޓީމުގެ ކުޅުންތެރިއެކެވެ.
އެމްޕީއެލް ގްރޫޕް ދޭއްގެ އެއް ވަނައިގައި އޮތީ ތިން މެޗުން ހަތް ޕޮއިންޓާ އެކު އެވެ. ދެ ވަނައިގައި އޮތް ވެމްކޯ އަށް ވަނީ ދެ މެޗުން ދެ ޕޮއިންޓް ލިބިފަ އެވެ. ފުލުގައި އޮތް ފެނަކަ އަށް ވެސް ވަނީ ޕޮއިންޓެއް ލިބިފަ އެވެ.
މިރޭ ކްލަބް މޯލްޑިވްސް ކަޕްގެ، ފިރިހެން ޑިވިޝަނުގައި ހަތަރު މެޗެއް ކުޅޭނެ އެވެ. އުރީދޫ އާއި މީޑިއާނެޓް ބައްދަލުކުރާއިރު، ކްލަބް އެމްޓީސީސީ ކުޅޭނީ މޯލްޑިވްގޭސްއާ އެވެ. ޕޮލިހުން ޓްރޭޑް ކްލަބާ ކުޅޭއިރު، ސްޓެލްކޯ ކުޅޭނީ މާލެ ސިޓީ ކައުންސިލްއާ އެވެ.
