ލަންޑަން (ނޮވެމްބަރު 27) - ސައުދީގެ ޕަބްލިކް އިންވެސްޓްމަންޓް ފަންޑް (ޕީއައިއެފް) އިން އިނގިރޭސި ކްލަބް، ނިއުކާސަލް ޔުނައިޓެޑް ގަތް ނަމަވެސް، އެ ޓީމުގެ ކަންކަމުގައި ސައުދީ ސަރުކާރުން ނުފޫޒުނުފޯރުވާނެ ކަމުގެ ޔަގީންކަން އެބައޮތް ކަމަށް އިނގިރޭސި ޕްރިމިއާ ލީގުން ބުނެފި އެވެ.
މީގެ މަހެއްހާ ދުވަސް ކުރިން ސައުދީން އިސްވެ، ނިއުކާސަލް ގަތީ އުސޫލުތަކާ ހިލާފަށް ކަމަށް ބުނެ، ޕްރިމިއާ ލީގުގެ ބޯޑަށް ވަނީ ވަރަށް ބޮޑަށް ޕްރެޝަރު ބޮޑުވެފަ އެވެ. އެ ޑީލާ ހެދި ކްލަބްތަކާއި ސިޔާސީ ފަރާތްތަކުގެ ފަރާތުން ކުރިމަތިވި ޕްރެޝަރުތަކާ ހެދި ޕްރިމިއާ ލީގުގެ ޗެއާމަން ގެރީ ހޮފްމަން އިސްތިއުފާ ދިނުމަށް ނިންމައިފި ކަމަށް މީޑިއާތަކުން ރިޕޯޓްކުރި އެވެ.
ދާދި ފަހުން ބީބީސީ އަށް ޕްރިމިއާ ލީގުގެ ޗީފް އެގްޒެކްޓިވް ރިޗާޑް މާސްޓާސް ދެެއްވި އިންޓަވިއުއެއްގައި ވިދާޅުވީ އިނގިރޭސި ކްލަބްތަކުން ކަންބޮޑުވާ ފަދަ ކަންތައްތަކެއް ނިއުކާސަލް މެދުވެރިކޮށް ކުރިއަށް ނުގެންދެވޭނެ ކަމަށެވެ. އަދި ނިއުކާސަލް ގަންނަން ސައުދީގެ ޕީއައިއެފް އާއި ވިޔަފާރިވެރިޔާ އަމަންޑާ ސްޓަވީލީސްގެ ކުންފުނިން ކަންތައްތައް ގެންދިޔައީ އޮންނަ އުސޫލުތަކުގެ ތެރެއިން ކަމަށް މާސްޓާސް ވަނީ ވިދާޅުވެފަ އެވެ.
"މީގެ ހަނދާން ކުރަން ޖެހޭ ފައިނޭންޝިއަލް ފެއާޕްލޭ (އެފްއެފްޕީ) ގަވައިދެއް އެބައޮތް. ޕީއައިއެފް އަކީ ސައުދީ ސަރުކާރުގެ ބާރު ހިންގާ ފަންޑެއް ނަމަވެސް އޭގެ ހިއްސާވެގެން ހިންގާ ކްލަބަކަށް ބާރެއް ނުފޯރުވޭނެ. އެއީ ނުކުރެވޭނެ ކަމެއް،" މާސްޓާސް ވިދާޅުވި އެވެ.
"ޕީއައިއެފްގައި ކިތަންމެ ފައިސާއެއް ހުއްޓަސް ހަރަދުކުރެވެނީ އޮންނަ އުސޫލުން އެ ކްލަބް ހިންގަން ގާއިމްކުރެވޭ ވަކި ބަޖެޓަކުން. ޕީއައިއެފްގެ ހުރިހާ ފައިސާ އަކީ ނިއުކާސަލްގެ އެއްޗެއް ނޫން،"
ނިއުކާސަލް ގަންނަން ޕީއައިއެފް އާއި އަމަަންޑާ ސްޓަވީލީސްގެ ޕާޓްނަޝިޕުން ޖުމްލަ 408 މިލިއަން ޑޮލަރު ހޭދަކުރި އެވެ. ނިއުކާސަލްގެ މެޖޯރިޓީ ހިއްސާ މިހާރު އޮތް ޕީއައިއެފްގެ މިލްކިއްޔާތުގައި 434 ބިލިއަން ޑޮލަރު އެބަހުއްޓެވެ. މިއީ ފުޓްބޯޅަ ކްލަބެއް ހިންގާ ބައެއްގެ އެންމެ ބޮޑު މިލްކިއްޔާތެވެ. ދެން އެ ޓީމާ އެންމެ ކައިރި ކުރަނީ މެންޗެސްޓާ ސިޓީ ހިންގަމުން އަންނަ ސިޓީ ފުޓްބޯލް ގްރޫޕްގެ ވެރިޔާ ޔޫއޭއީގެ ޝެއިހް މަންސޫރެވެ. އޭނާގެ މިލްކިއްޔާތުގައި 32 ބިލިއަން ޑޮލަރު އެބަހުއްޓެވެ.
ޕްރިމިއާ ލީގުގެ ކްލަބްތަކުން ދެން ކަންބޮޑުވުން ފާޅުކޮށްފައިވާ ކަމަކީ ސައުދީ ސަރުކާރުން ހިންގާ ލާއިންސާނީ އަމަލުތައް ފޮރުވަން ފުޓްބޯޅަ ތެރެއިން ކުރާ މަސައްކަތުގައި ޕްރިމިއާ ލީގުން ބައިވެރިވީ ކަމަށް ބުނެ ފަތުރަމުން އަންނަ ވާހަކަތަކާ ހެދި އެވެ.
ސައުދީން އެންމެ ފުރަތަމަ މީގެ އެއް އަހަރު ކުރިން ނިއުކާސަލް ގަންނަން ކުރި މަަސައްކަތް ކާމިޔާބެއްނުވީ ގިނަ ޕްރެޝަރުތަކެއްގެ ސަބަބުންނެވެ.
މިދިޔަ އަހަރު ސައުދީން ނިއުކާސަލް ގަންނަން މަސައްކަތްކުރިއިރު، އިންސާނީ ހައްގުތަކަށް މަސައްކަތްކުރާ ޖަމިއްޔާ އެމްނެސްޓީ އިންޓަނޭޝަަނަލް އިން ވަނީ އެ ޑީލާ ދެކޮޅަށް އިންޒާރެއް ދީފަ އެވެ. އެ ޖަމިއްޔާ އިން ތުހުމަތުކުރާ ގޮތުގައި ސައުދީން އިސްވެ ކުޅިވަރު ހަރަކާތްތަކަށް އިންވެސްޓްކުރަނީ އެ ގައުމުން އިންސާނިއްޔަތާ ހިލާފަށް ހިންގާ އަމަލުތައް ފޮރުވުމުގެ ގޮތުން ކަމަށެވެ. އެކަމަކު، މި ފަހަރު ނިއުކާސަލްގެ ޑީލް ސައުދީގެ ޕީއައިފް އިން ނިންމާލިއިރު، އެމްނެސްޓީން މީޑިއާގައި ވާހަކައެއް ނުދައްކަ އެވެ.
