ކްލަބް މޯލްޑިވްސް ކަޕްގެ އަންހެން ޑިވިޝަން، 18/30 ފުޓްސަލް ފިއެސްޓާގައި ރޭ ކުޅުނު މެޗުގައި ޕޮލިސް ކްލަބުން 8-0 އިން ޓްރޭޑް ކްލަބް ބަލިކުރިއިރު، ކްލަބް ވެމްކޯ ކުޅުނު ދެ ވަނަ މެޗުން އެމްޕީއެލްއާ 1-1 އިން އެއްވަރުވެއްޖެ އެވެ.
ރެހެންދި ފުޓްސަލް އެއް ވަނަ ދަނޑުގައި ރޭ ކުޅުނު މެޗުގައި އެމްޕީއެލް އިން ލީޑުނެގީ މެޗުގެ 14 ވަނަ މިނިޓްގައި އެ ޓީމަށް ކުޅޭ ތަޖިކިސްތާނުގެ މަދީނާ ފަޒިލޯވާ ދިން ބޯޅައަކުން އައިމިނަތު ޝާމިލާ ޖެހި ގޯލަކުންނެވެ. އޭގެ ތިން މިނިޓް ފަހުން ވެމްކޯ އަށް ކުޅޭ ތައިލެންޑްގެ ކުޅުންތެރިޔާ ޑަރިކާ ވަނީ ނަތީޖާ ހަމަހަމަކޮށްދީފަ އެވެ. ވެމްކޯގެ ކެޕްޓަން ޝަހުލާ ތައުފީގު ހުސްކޮށްލާފައި ދިން ބޯޅަ ޑަރިކާ ވަނީ ގޯލުގެ ތެރެއަށް ބޯޅަ ފޮނުވާލައިފަ އެވެ.
ރެހެންދި ފުޓްސަލް ދެ ވަނަ ދަނޑުގައި ކުޅުނު މެޗުގައި ޓްރޭޑް ކްލަބް ކޮޅަށް ޕޮލިހަށް ކުޅޭ ގައުމީ ޓީމުގެ ފޯވާޑް ފާތިމަތު ތީބާ ވަނީ ހެޓްރިކެއް ހަދައިފަ އެވެ. ޕޮލިހަށް ކުޅޭ ލެބަނަންގެ ނާންސީ ޗޭލިއަން ދެ ގޯލު ޖެހިއިރު، އަނެއް ތިން ގޯލު ކާމިޔާބުކުރީ ގައުމީ ޓީމުގެ ކުރީގެ ކެޕްޓަން ފަދުވާ ޒާހިރާއި ފާތިމަތު ސައިނާ އަދި ލެބަނަންގެ ސެލީން އަލް ހައްދާދު އެވެ.
ކްލަބް މޯލްޑިވްސް ކަޕްގެ އަންހެން ޑިވިޝަނުގައި ހަ ޓީމެއް ވާދަކުރާއިރު، މުބާރާތް ކުރިއަށްދާނީ ތިން ޓީމުގެ ދެ ގްރޫޕެއްގެ މެދުގަ އެވެ. ކޮންމެ ޓީމެއް ކޮންމެ ޓީމަކާ ދެ ބުރު ކުޅޭ ގޮތަށް ގްރޫޕް ސްޓޭޖު ރޭވިފައިވާއިރު، ގްރޫޕަކުން ފުރަތަމަ ކަޓާނީ އެ ޓީމެކެވެ.
ގްރޫޕް އެކެެއްގެ އެއް ވަނައިގައި ކުޅުނު ދެ މެޗުން ވެސް މޮޅުވެގެން ހަ ޕޮއިންޓާ އެކު އޮތީ ދިވެހި ސިފައިންގެ ކްލަބް އެވެ. އެ ޓީމަށް ވަނީ ގާތްގަނޑަކަށް ސެމީގެ ޖާގަ ޔަގީންވެފަ އެވެ. ރޭގެ މޮޅާ އެކު ޕޮލިހަށް ވަނީ ދެ މެޗުން ތިން ޕޮއިންޓް ލިބިފަ އެވެ. ފުލުގައި އޮތް ޓްރޭޑް ކްލަބަށް އަދި ޕޮއިންޓެއް ނުލިބެ އެވެ.
ގްރޫޕް ދޭއްގެ އެއް ވަނައިގައި އޮތީ އެންމެ ފަހުގެ ޗެމްޕިއަން އެމްޕީއެލް އެވެ. އެމްޕީއެލަށް ދެ މެޗުން ވަނީ ހަތަރު ޕޮއިންޓް ލިބިފަ އެވެ. ދެ ވަނައިގައި އޮތް ވެމްކޯ އަށް ދެ މެޗުން ދެ ޕޮއިންޓް ލިބިފައިވާއިރު، ފުލުގައި އޮތް ފެނަކަ އަށް ވެސް ވަނީ ޕޮއިންޓެއް ލިބިފަ އެވެ.
އަންހެން ޑިވިޝަނުގެ ދެ މެޗެއް މާދަމާރޭ ކުޅޭނެ އެވެ. އެމްޕީއެލް ކުޅޭނީ ފެނަކައާ އެވެ. އަދި ޕޮލިސް ކުޅޭނީ ދިވެހި ސިފައިންގެ ކްލަބާ އެވެ.
