ޕެރިސް (ނޮވެމްބަރު 24) - ޗެމްޕިއަންސް ލީގުގައި މިރޭ މެންޗެސްޓާ ސިޓީއާ ދެކޮޅަށް ކުޅޭ މެޗަށް ޕީއެސްޖީން ނެގި ސްކޮޑުގައި ސްޕެއިނުގެ ޑިފެންޑަރު ސާޖިއޯ ރާމޯސް ހިމަނައިފި އެވެ.
އުމުރުން 35 އަހަރުގެ ރާމޯސް އަދި ރަސްމީކޮށް މެޗެއްގައި ޕީއެސްޖީ އަށް ނުކުޅެ އެވެ. ހިލޭ ޓްރާންސްފާއެއްގައި ރެެއާލް މެޑްރިޑް ދޫކޮށް މި ފަހަރު ޕީއެސްޖީއާ ގުޅުނު ރާމޯސްގެ ކުޑަކަޅުވާ އަށް ލިބުނު ސީރިއަސް އަނިޔާއަކާ ހެދި މިހާތަނަށް ހުރީ ކުޅުމާ ދުރުގަ އެވެ. އަނިޔާ އިން ރަނގަޅުވެ، ރާމޯސް މިހާރު ވަނީ ފިޓްވެފަ އެވެ.
ރާމޯސްގެ ފިޓްނަސް އެކަށީގެންވާ ލެވަލަކަށް ނެތް ކަމަށް ބުނެ، އޭނާއާ އެކު ހަދާފައިވާ ކޮންޓްރެކްޓް އުވާލަން ޕީއެސްޖީން މަޝްވަރާކުރި ކަމަށް ފްރާންސާއި ސްޕެއިނުގެ ނޫސްތަކުން ދާދި ފަހުން ރިޕޯޓްކުުރި އެވެ. ޕީއެސްޖީން ވަނީ އެ ވާހަކަތައް ދޮގުކޮށްފަ އެވެ.
މިދިޔަ ސީޒަނުގައި އަނިޔާގެ އެކި މައްސަަލަތަކުގެ ސަބަބުން ރާމޯސް އަށް ސްޕެނިޝް ލީގުގައި ކުޅެވުނީ 15 މެޗެެވެ. ފިޓްނަސް އެންމެ ރަނގަޅު ލެވަލެއްގައި ނެތް ކަމަށް ބުނެ، ސްޕެއިނުގެ ޔޫރޯ ސްކޮޑުން ވެސް ރާމޯސް އަށް ޖާގަނުދިނެވެ.
ރާމޯސް އަންނަނީ މި މަހު ފަސް ވަނަ ދުވަހު ފެށިގެން ޕީއެސްޖީ ޓްރެއިނިންގައި ބައިވެރިވާން ފަށައި މިވީ މުއްދަތުގެ ތެރޭގައި ބުރަކޮށް މަސައްކަތްކޮށް، ފިޓްނަސް ރަނގަޅު ލެވަލަކަށް ގެންނަން ގިނަ ކަންކަން ކޮށްފަ އެވެ.
ރާމޯސް ޕީއެސްޖީއާ ގުޅުނީ ދެ އަހަރުގެ ކޮންޓްރެކްޓެއްގަ އެވެ. ރެއާލަށް 671 މެޗު ކުޅެދިން ރާމޯސް ވަނީ އެ ޓީމާ އެކު ފަސް ލީގު ތަށްޓާއި ހަތަރު ޗެމްޕިއަންސް ލީގާއި، ހަތަރު ކްލަބް ވޯލްޑް ކަޕާއި އަދި ދެ ސްޕެނިޝް ކަޕް ކާމިޔާބުކޮށްފަ އެވެ.
ރެއާލާ އެކު ޖުމްލަ 22 ތަށި އުފުލާލި ރާމޯސް ވަނީ އެ ޓީމަށް 101 ގޯލު ޖަހައިފަ އެވެ. އަދި 40 ގޯލު ޖަހަން ފުރުސަތު ތަނަވަސްކޮށްދިނެވެ. މިއީ ޑިފެންޑަރަކަށް ބަލާއިރު، ހުރިހާ ގޮތަކުން ވެސް ރަނގަޅު ރެކޯޑެކެވެ.
ޕީއެސްޖީގައި ހުރެ ރަނގަޅު ކާމިޔާބީތަކެއް ހޯދަން ރާމޯސް އުއްމީދުކުރެ އެެވެ. މިރޭ މެންޗެސްޓާ ސިޓީ ދަނޑުގައި ޕީއެސްޖީން ކުޅޭ މެޗުގައި ރާމޯސް ފެނުމުގެ ފުރުސަތު އެބައޮތް ކަމަށް ޕީއެސްޖީގެ ކޯޗު މައުރީސިއޯ ޕޮޗެޓީނޯ ވަނީ ބުނެފަ އެވެ.
