މެޑްރިޑް (ނޮވެމްބަރު 22) - ހުސްވެފައިވާ މެންޗެސްޓާ ޔުނައިޓެޑްގެ ކޯޗުގެ މަގާމަށް ސްޕެއިނު ގައުމީ ޓީމުގައި ހުރި ކޯޗު ލުއިސް އެންރީކޭ ގެންނަން އުޅޭ ވާހަކައިގައި އެއްވެސް ހަގީގަތެއް ނެތް ކަމަށް އޭނާ ބުނެފި އެވެ.
ޔުނައިޓެޑްގެ ކޯޗަކަށް ހުރި އޮލެ ގުނަ ސޯލްޝެއާ ވަނީ މަގާމުން ވަކިވެފަ އެވެ. އެންމެ ފަހުން ކުޅުނު މެޗުތަކުގައި ޔުނައިޓެޑްގެ ނަތީޖާތައް ދަށްވިއިރު، ސޯލްޝެއާ މަގާމުން ދުރުކުރީ އިނގިރޭސި ޕްރިމިއާ ލީގުގައި ވަޓްފޯޑް އަތުން ޔުނައިޓެޑް 4-1 އިން ބަލިވިތާ އެއް ދުވަސް ފަހުންނެވެ.
އާ ކޯޗެއް ގެންނަންދެން ޔުނައިޓެޑްގެ ކޯޗުކަމާ ހަވާލުވީ ސޯލްޝެއާގެ އެސިސްޓަންޓަކަށް ހުރި ކުރީގެ މިޑްފީލްޑަރު މައިކަލް ކެރިކް އެވެ. ޔުނައިޓެޑުން ގެންނަން ބޭނުންވާ ކޯޗުންގެ ލިސްޓުގައި އެންރީކޭ އާއި ޒިނެދިން ޒިދާން، ޕީއެސްޖީގެ މައުރީސިއޯ ޕޮޗެޓީނޯ، ލެސްޓާ ސިޓީގެ ބްރެންޑަން ރޮޖާސް އަދި އަޔަކްސްގެ އެރިކް ޓެން ހާގް ހިމެެނެ އެވެ.
އިއްޔެ ބޭއްވި ޗެރިޓީ އިވެންޓެއްގެ ތެރެއިން ސްޕެއިނުގެ ކޯޗު އެންރީކޭ ގާތުގައި ޔުނައިޓެޑްގެ ކޯޗުކަމުގެ ވަޒީފާއާ ހަވާލުވާން އުޅޭ ކަމަށް ދެކެވޭ ވާހަކައާ ބެހޭގޮތުން ސުވާލުކުރުމުން އެންރީކޭ ވެސް ޖަވާބުގައި ކުރީ ސުވާލެކެވެ. އެންރީކޭ އެހީ "މިއީ އޭޕްރީލް ފޫލްސް ޑޭ" ތޯ އެވެ. އެ އަށް ފަހު އެންރީކޭ ވަނީ އޭނާ ސްޕެއިން ޓީމުގައި ހުރީ ވަރަށް އުފަލުން ކަމަށް ބުނެފަ އެވެ.
"އަހަރެންގެ ވިސްނުން މި ވަގުތު މި ހުރީ ސްޕެއިން ގައުމީ ޓީމު ގޮވައިގެން ގަތަރު ވޯލްޑް ކަޕަށް ތައްޔާރުވާން. ކްލަބަކާ ހަވާލުވުމުގެ ޝައުގެއް ނެތް،" އެންރީކޭ ބުންޏެވެ.
އެންރީކޭގެ ކޯޗިން ކެރިއަރު ފެށީ 2008 ވަނަ އަހަރު ބާސެލޯނާ ބީ ޓީމުންނެވެ. ދެން އޭނާ ހަވާލުވީ 2011 ވަނަ އަހަރު އިޓަލީގެ ރޯމާއާ އެވެ. ރޯމާ އަށް ކޯޗުކޮށްދިނުމަށް ފަހު 2013 ވަނަ އަހަރު ސްޕެއިނުގެ ސެލްޓާގައި ވެސް ސީޒަނެއް ހޭދަކުރި އެވެ. އެންރީކޭގެ ކޯޗިން ކެރިއަރުގައި އެންމެ ވިދުން ގަދަވީ 2014 އިން 2017 އަށް ބާސެލޯނާގައި ހުރިއިރު އެެވެ. އެ ޓީމާ އެކު ނުވަ ތަށި ހޯދި އެވެ.
