ލަންޑަން (ނޮވެމްބަރު 22) - އިނގިރޭސި ޕްރިމިއާ ލީގުގައި މިރޭ އެވަޓަން އަތުން 3-0 އިން މޮޅުވެ، މެންޗެސްޓާ ސިޓީ ލީގުގެ ދެ ވަނަ އަށް އަލުން ޖެހިލިއިރު، ފަހަތުން އަރައި 2-1 އިން ލީޑްސް ޔުނައިޓެޑް ބަލިކޮށް އެންޓޯނިއޯ ކޮންޓޭގެ ކޯޗުކަމުގައި ޓޮޓެންހަމް ހޮޓްސްޕާސް އިން ލީގުގައި ފުރަތަމަ ފަހަރަށް މޮޅުވެއްޖެ އެެވެ.
ލީގުގެ އެއް ވަނައިގައި ޗެލްސީ އޮތީ 12 މެޗުން 29 ޕޮއިންޓާ އެކު އެވެ. ސިޓީ ދެ ވަނަ އަށް އެރީ 12 މެޗުން 26 ޕޮއިންޓް ހޯދައިގެންނެވެ. ތިން ވަނައިގައި އޮތީ 12 މެޗުން 25 ޕޮއިންޓް ހޯދާފައިވާ ލިވަޕޫލް އެވެ.
ސިޓީގެ ޕްލޭމޭކަރު ކެވިން ޑިބްރޭނާ ކޮވިޑަށް ޕޮޒިޓިވްވެފައިވާތީ މި މެޗުގައި އޭނާ ނުކުޅެ އެވެ. ސިޓީ އަށް މި މެޗުގައި ލީޑުނަގައިދިނީ ފުރަތަމަ ހާފުގެ ފަހު މިނިޓްގައި ރަހީމް ސްޓާލިން އެވެ. މެޗުގެ 44 ވަނަ މިނިޓްގައި ޖާއޯ ކަންސޭލޯ ނެގި މޮޅު ބޯޅައަކުން ސްޓާލިން މި ގޯލު ޖެހީއިރު، މިއީ އޭނާ ލީގުގައި ކުޅުނު 300 ވަނަ މެޗެވެ.
ދެ ވަނަ ހާފުގައި ސިޓީ އަށް ލީޑުފުޅާކޮށްދިން ގޯލު ޖެހީ އޭރިއާބޭރުން ފޮނުވާލި ބޯޅައަކުން ރޮޑްރީ އެވެ. ރޮޑްރީ، މެޗުގެ 55 ވަނަ މިނިޓްގައި ފޮނުވާލި ބޯޅަ ހުއްޓުވަން އެވަޓަންގެ ކީޕަރު ޖޯޑަން ޕިކްފޯޑަށް މާ ބޮޑު ކަމެއް ނުކުރެވުނެވެ. ސިޓީގެ ތިން ވަނަ ގޯލު ޖެހީ މެޗުގެ 86 ވަނަ މިނިޓްގައި ބެނާޑޯ ސިލްވާ އެވެ. މި މެޗުގައި ސިޓީގެ އިލްކާއި ގުންޑޮގާން ފޮނުވާލި ބޯޅައެއް ވަނީ ގޯލުގެ ދަނޑިއަށް އަމާޒުވެފަ އެވެ.
އެވަޓަންގެ ޑެލްފް (ކ) އާއި މައިކަލް ކީން (ވ) ކައިރިން ސިޓީގެ ސްޓާލިން ބޯޅަ ހިފައިގެންދާން މަސައްކަތްކުރަނީ.-- ފޮޓޯ: އޭއެފްޕީ
ޓޮޓެންހަމް ދަނޑުގައި މިރޭ ކުޅުނު މެޗުގެ ފުރަތަމަ ހާފުގައި ލީޑުނެގީ ލީޑްސް އިންނެވެ. މެޗުގެ 44 ވަނަ މިނިޓްގައި ލީޑްސްގެ ޖެކް ހެރިސަން ހުސްކޮށްލާފައި ދިން ބޯޅަ އޭރިއާތެރެއިން ގޯލުގެ ތެރެއަށް ފޮނުވާލީ ޑެނިއަލް ޖޭމްސް އެވެ.
ދެ ވަނަ ހާފުގައި ކުޅެން އަރައި މެޗުގެ 58 ވަނަ މިނިޓްގައި ލޫކަސް މޯރާ ދިން ބޯޅައަކުން ޓޮޓެންހަމަށް އެއްވަރުކޮށްދިނީ ޕިއޭ އެމީލް ހޮއިބިއާ އެވެ.
ގޯލެއް ޖަހައި މެޗުން މޮޅުވާން ޓޮޓެންހަމް އިން ކުރި މަސައްކަތް ކާމިޔާބުވީ މެޗުގެ 69 ވަަނަ މިނިޓްގަ އެވެ. މި ގޯލު ޖެހީ ޓޮޓެންހަމަށް ކުޅޭ ސްޕެއިނުގެ ފުލްބެކް ސާޖީ ރެގީއޯން އެވެ. އެރިކް ޑަޔާ ހިލޭ ޖެހުމަކުން ފޮނުވާލި ބޯޅަ ލީޑްސް ކުޅުންތެރިއަކު ގައިގައި ޖެހިފައި ގޯލުގެ ދަނޑީގައި ވެސް ޖެހިފައި ލިބުމުން ރެގީއޯން ވަނީ ގޯލުގެ ތެެރެއަށް ބޯޅަ ފޮނުވާލައިފަ އެވެ. މިއީ ޓޮޓެންހަމަށް ލީގުގައި ރެގީއޯން ޖެހި ފުރަތަމަ ގޯލެވެ.
މި މެޗުން މޮޅުވެ، ޓޮޓެންހަމް ވަނީ ލީގުގެ ހަތް ވަނަ އަށް ޖެހިލައިފަ އެވެ. އެއީ 12 މެޗުން 19 ޕޮއިންޓް ހޯދައިގެންނެވެ. ޓޮޓެންހަމް މޮޅުވުމުން ޔުނައިޓެޑް ވަނީ އަށް ވަނަ އަށް ވެއްޓިފަ އެވެ. ޔުނައިޓެޑަށް 12 މެޗުން ލިބިފައިވަނީ 17 ޕޮއިންޓެވެ.
