ލިވަޕޫލް (ނޮވެމްބަރު 20) - އިނގިރޭސި ޕްރިމިއާ ލީގުގައި މިރޭ ލިވަޕޫލްއާ ދެކޮޅަށް އާސެނަލް ނުކުންނައިރު، މިއީ އާސެނަލް މިހާރު އޮތް ފެންވަރު ވަޒަންކޮށްލެވޭނެ އިމްތިހާނެކެވެ.
ރަށުން ބޭރުގައި މިރޭ ލިވަޕޫލްއާ ދެކޮޅަށް ނުކުންނައިރު އާސެނަލް އޮތީ ލީގުގައި އެންމެ ފަހުން ކުޅުނު އަށް މެޗުން ވެސް ބަލިނުވެ އެވެ. ސީޒަންގެ ކުރީކޮޅު އާސެނަލްގެ ނަތީޖާތައް ދަށް ނަމަވެސް، މި ފަހަކަށް އައިސް ނަތީޖާތައް ރަނގަޅުކޮށް، އާސެނަލް މިހާރު ވަނީ ތާވަލްގެ ފަސް ވަނަ އަށް ޖެހިލައިފަ އެވެ.
ލިވަޕޫލްގެ ދަނޑުގައި އާސެނަލް އެންމެ ފަހުން މޮޅުވެފައިވަނީ 2012 ވަނަ އަހަރެވެ. އާސެނަލްގެ ކޯޗު މިކޭލް އާޓޭޓާ އަކީ އޭރު އާސެނަލް ޓީމުގެ ކުޅުންތެރިއެކެވެ. އެހެންކަމުން، ލިވަޕޫލްގެ ދަނޑުގައި އެ ޓީމިު ބަލިކުރުމަކީ ކިހާވަރެއްގެ ކަމެއްކަން، އާޓެޓާ އަށް ވަރަށް ރަނގަޅަށް އެނގޭނެ އެވެ.
"ލިވަޕޫލްގެ ދަނޑުގައި ކުޅުމަކީ އަބަދު ވެސް އިމްތިހާނެއް." އާޓޭޓާ ބުންޏެވެ.
"ލިވަޕޫލާ ދެކޮޅަށް ކުޅޭއިރު، ޓީމު އޮންނަންވާނީ އެންމެ މަތީ ފަންތީގައި. ހުރިހާ ގޮތަކުން ވެސް އެންމެ ރަނގަޅަށް ޓީމު އޮންނަންވާނީ."
މި މެޗަށް ނުކުންނައިރު ލިވަޕޫލް އޮތީ 22 ޕޮއިންޓާއެކު ތާވަލްގެ ހަތަރު ވަނައިގަ އެވެ. އާސެނަލް ފަސް ވަނައިގައި އޮތީ 20 ޕޮއިންޓާއެކު އެވެ. މިރޭ ލިވަޕޫލް އަތުން މޮޅުވެގެން ތާވަލުގައި އެ ޓީމުގެ ކުރިއަށް އެރުމުގެ ފުރުސަތު އާސެނަލަށް އެބައޮތެވެ.
ލިވަޕޫލް ލީގުގައި އެންމެ ފަހުން ކުޅުނު މެޗުގައި ވެސްޓް ހޭމް އަތުން ވަނީ ބަލިވެފަ އެވެ.
މެޗުގެ ކުރިން މީޑިއާއާ ވާހަކަދައްކަމުން ލިވަޕޫލްގެ ކޯޗު ޔާގަން ކްލޮޕް ބުނީ މި މެޗަށް ނުކުންނައިރު، ލިވަޕޫލްގެ ޑިފެންސް ރަނގަޅުކުރަންޖެހޭ ކަމަށެވެ.
"ރަނގަޅުކުރަންޖެހޭ ކަންތައްތަކެއް އެބަހުރި. އަހަރަމެން ޑިފެންސްގައި މިހާރަށްވުރެ ބޮޑަށް "އެގްރެސިވް" ވާންޖެހޭ އެބަ. މިއީ މި ސީޒަންގައި ދިމާވެފައިވާ މައްސަލައެއް،" ކްޕޮޕް ބުންޏެވެ.
އިންޓަނޭޝަނަލް މެޗުތަކުގައި ލިވަޕޫލްގެ ޖޯޑަން ހެންޑަސަން އާއި ސަޑިއޯ މާނޭ އަދި އެންޑީ ރޮބަޓްސަން އަށް ކޮންމެ ވެސް ވަރެއްގެ އަނިޔާއެއް ކުރިމަތިވި އެވެ. ހެންޑަސަން އާއި މާނޭ އަށް އާސެނަލާ ދެކޮޅަށް ކުޅެވޭނެ ކަމުގެ އުއްމީދެއް އެބައޮތެވެ. ރޮބަޓްސަން އަށް ނުކުޅެވިއްޖެނަމަ އެ މަގާމަށް ކުޅޭނީ ގްރީސްގެ ފުލްބެކް ކޮސްޓާސް ސިމިކާސް އެވެ. މި ސީޒަނުގެ ބައެއް މެޗުތަކުން ފުރުސަތު ލިބުނު ސިމިކާސް ވަނީ އެ މެޗުތަކުގައި ރަނގަޅު ކުޅުމެއް ދައްކައިފަ އެވެ.
އާސެނަލާއި ލިވަޕޫލް ކުޅޭ މެޗު ފަށާނީ މިރޭ ރާއްޖެ ގަޑިން 22:30 ގަ އެވެ.
