މަހިންދަ ރާޖަޕަކްސަ ފޯ ނޭޝަންސް ކަޕްގެ ފައިނަލުގެ ޖާގައެއް ރާއްޖެ އަށް ހޯދޭނެ ކަމަށް ގައުމީ ކޯޗު އިޓަލީގެ ފްރެންޗެސްކޯ މޮރިއޭރޯ ބުނެފި އެވެ.
ފޯ ނޭޝަންސް ކަޕްގެ ލީގު ބުރުގެ ފަހު ދެ މެޗަށްދާއިރު، އެއް ވަަނައިގައި އޮތް ބަންގްލަދޭޝާއި ދެ ވަނައިގައި އޮތް ސީޝެލްސް އަށް ވަނީ ހަތަރު ޕޮއިންޓް ލިބިފަ އެވެ. ތިން ވަނައިގައި އޮތް ރާއްޖެ އާއި ހަތަރު ވަނައިގައި އޮތް ލަންކާ އަށް ދެ މެޗުން ވަނީ ޕޮއިންޓެއް ލިބިފަ އެވެ. ކޮންމެ ޓީމަކަށް ވެސް ފައިނަލުގެ ޖާގަ ހޯދުމުގެ ފުރުސަތު އޮތީ ހުޅުވިފަ އެވެ.
ލީގު ބުރުގެ ފަހު ދެ މެޗު މާދަމާ ކުޅޭއިރު، ހަވީރު ކުޅޭނީ ސީޝެލްސް އާއި ރާއްޖެ އެވެ. ދެ ވަނަ މެޗުގައި މާދަމާރޭ ލަންކާ ކުޅޭނީ ބަންގްލަދޭޝްއާ އެވެ. ބަންގްލަދޭޝާއި ސީޝެލްސް އަށް އެ މެޗުތައް އެއްވަރުކޮށްލައިގެން ވެސް ފައިނަލުގެ ޖާގަ ލިބޭނެ އެވެ. ރާއްޖެ އާއި ލަންކާ އަށް ފައިނަލަށް ދެވޭނީ އެ މެޗުތަކުން މޮޅުވެގެންނެވެ. ހަތަރު ޓީމު ޕޮއިންޓް އެއްވަރުވެއްޖެ ހާލަތެއްގައި ބަލާނީ ލަނޑުގެ ތަފާތަށެވެ.
ރާއްޖެ ފުރަތަމަ މެޗުން ލަންކާއާ 4-4 އިން އެއްވަރުވިއިރު، މީގެ ދެ ދުވަސް ކުރިން ބަންގްލަދޭޝް އަތުން ވަނީ 2-1 އިން ބަލިވެފަ އެވެ. މިއީ 18 އަހަރު ތެރޭ ބަންގްލަދޭޝް އަތުން ބަލިވި ފުރަތަމަ ފަހަރެވެ. ބަންގްލަދޭޝް މެޗުގެ އެ ނަތީޖާގެ ސަބަބުން، މާދަމާ ސީޝެލްސް އަތުން މޮޅުވުން ރާއްޖެ އަށް އޮތީ މަޖުބޫރުވެފަ އެވެ.
މާދަމާ މެޗުގެ ކުރިން މިއަދު އޮތް ނޫސްވެރިންގެ ބައްދަލުވުމުގައި މޮރިއޭރޯ ބުނީ ކުޅުންތެރިން ވަނީ އެެންމެ ފަހުން މެޗަށް ފަހު ރަނގަޅަށް ރިކަވާވެފައި ކަމަށެވެ.
"އަހަރެން މީޑިއާ ކައިރީގައި މި ބުނާ ވާހަކަ ކުޅުންތެރިން ގާތުގައި ވެސް ބުނިން. އަހަަރެމެން ކޮންމެ ދުވަހަކު ވެސް މި ކުރިއަރަނީ އާ ކަންތައްތަކެއް ދަސްކޮށްގެން. މަސައްކަތް ކޮށްގެން އަހަރެެމެންނަށް ޓާގެޓަށް ވާސިލްވެވޭނެ،" ފައިނަލަށް ދެވޭނެތޯ ނޫސްވެރިއަކު ސުވާލުކުރުމުން މޮރިއޭރޯ ބުންޏެވެ.
ސީޝެލްސް އަކީ ފިޒިކަލީ އަދި އެތުލެޓިކަލީ ބަލާއިރު ވަރުގަދަ ޓީމެއް ކަމަށް މޮރިއޭރޯ ވަނީ ބުނެފަ އެވެ. ސީޝެލްސްގައި ތިބީ ވަރަށް ހަލުވި ކުޅުންތެރިންކަމަށާއި ކުޅެނީ ވެސް ވަރަށް އޯގަނައިޒިކޮށް ފުޓްބޯޅައެއް ކަމަށް މޮރިއޭރޯ ބުންޏެވެ.
"އަހަރެން ގަބޫލެއް ނުކުރަން މިއީ ފަސޭހަވާނެ މެޗެއް ކަމަށް. އަހަރެމެން ގަބޫލުކުރާ ސިސްޓަމަށް ރަނގަޅަށް މަސައްކަތް ކޮށްގެން މި މެޗުގައި ކުޅެވިދާނެ،" މޮރިއޭރޯ ބުންޏެވެ.
ރާއްޖޭން އެންމެ ފަހުން ސީޝެލްސްއާ ދެކޮޅަށް ކުޅުނީ 2015 ވަނަ އަހަރުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގަ އެވެ. އެ ފަހަރު ރާއްޖެ ވަނީ މުހައްމަދު އުމެއިރާއި އަހުމަދު އިމާޒް (އާއްކޮ)ގެ ދެ ގޯލާ އެކު 2-1 އިން ސީޝެލްސް ބަލިކޮށްފަ އެވެ.
ސީޝެލްސް އިން ފޯ ނޭޝަންސް ކަޕްގައި ކުޅުނު ފުރަތަމަަ މެޗުގައި ފަހަތުން އަރައި 1-1 އިން ބަންގްލަދޭޝާ އެއްވަރުކުރިއިރު، ދެ ވަނަ މެޗުން ވަނީ 1-0 އިން ލަންކާ ބަލިކޮށްފަ އެވެ. މުބާރާތުގައި އެންމެ ރަނގަޅަށް ކުޅޭ އެއް ޓީމަކީ ސީޝެލްސް އެވެ.
ރާއްޖޭން ފުރަތަމަ ދެ މެޗުގައި ބޭނުންކުރީ އެއް ފުރަތަމަ އެގާރަ އެވެ. މާދަމާ ސީޝެލްސްއާ ދެކޮޅަށް ބަދަލެއް ފެނިދާނެތޯ އެހުމުން މޮރިއޭރޯ ބުނީ އޭނާ މެޗުތަކަށް އެގާރަ ކުޅުންތެރިން ކަނޑައަޅަނީ މެޗު ފެށެން 20 މިނިޓަށް ވުމުން ކަމަށެވެ.
"އެއީ އަހަރެން ބޭނުންވޭ 23 ކުޅުންތެރިން ވެސް މެޗަށް ތައްޔާރުވެގެން ހުންނަން،" މޮރިއޭރޯ ބުންޏެވެ.
ގައުމީ ޓީމާ މޮރިއޭރޯ ހަވާލުވިތާ އަދި މަހެއް ނުވެ އެވެ. އޭނާ މި ފަހަރުގެ ފޯ ނޭޝަންސް ކަޕަށް ތައްޔާރުވީ ދެ ހަފްތާއެއްހާ ދުވަހުގެ ޕްރެކްޓިހަށް ފަހު އެވެ. މޮރިއޭރޯ ބުނީ އޭނާ ރާއްޖެ ގޮވައިގެން މި މުބާރާތުގައި ކުރި މަސައްކަތް ނަތީޖާ އަށް ބަލަންޏާ ފެންނާނީ ނެގެޓިވްކޮށް ކަމަށެވެ.
"އަހަރެމެން ކުރާ މަސައްކަތް ހުއްޓާލަން ނުޖެހޭ. އެކަން މި ކުރިއަށް މި ގެންދަނީ. އަހަރެމެންނަށް މި ދެ މެޗުން ވަރަށް ގިނަ ކަންކަން ދަސްވެއްޖެ،" މޮރިއޭރޯ ބުންޏެވެ.
މޮރިއޭރޯ ބުނީ ކޮންމެ މެޗެއް ވެސް އެއީ ތާރީހުގައި ލިޔެވޭނެ ކަމަށެވެ. އެ ގޮތަށް ވިސްނާއިރު ކޮންމެ މެޗަކަށް ވެސް ތައްޔާރުވާނީ އާ ވިސްނުމެއްގައި އިދިކޮޅަށް ނުކުންނަ ޓީމު ދަސްކޮށްގެން ކަމަށް މޮރިއޭރޯ ވަނީ ބުނެފަ އެވެ.
"ހަމައެކަނި ތުހުމަތުގެ އިނގިލި ދިއްކުރުމަކުން ނުފުދޭ. އަހަރެމެން މޮޅުނުވަނީ ކީއްވެތޯ ބަލަން އަދި ނުޖެހޭ މުޅި މަސައްކަތަށް ނުބަލައި. އަހަރެމެން ވަރަށް ބުރަކޮށް މަސައްކަތް އެބަކުރަން. މި ޓިީމު އެބަ ކުރިއަރާ. އަހަންނަށް އެނގޭ އިތުރަށް ވެސް ކުރިއަރާނެކަން،" އިޓަލީގެ ދެ ވަނަ އަދި ތިން ވަނަ ޑިވިޝަނުގައި ކުރިން ކޯޗުކަން ކުރި މޮރިއޭރޯ ބުންޏެވެ.
"އަހަންނަކީ ކުރިން ފުޓްބޯޅަ ކުޅުންތެރިއެއް. މީގެ 13 އަހަރު ކުރިން އަހަރެން ކޯޗިންގެ މަސައްކަތް ފަށައިފިން. އެހެންވީމަ މި ކުރެވޭ ކަންކަން އަހަންނަށް ވެސް އެނގޭ،"
ރާއްޖެ އާއި ސީޝެލްސް ކުޅޭ މެޗު ފަށާނީ މާދަމާ ހަވީރު ރާއްޖެ ގަޑިން 15:30 ގަ އެވެ.
