ޕެރިސް (ނޮވެމްބަރު 14) - މެންޗެސްޓާ ޔުނައިޓެޑާ އެކު ޕައުލް ޕޮގްބާ އާ ކޮންޓްރެކްޓެއްގައި ސޮއިކުރާނަމަ ބޭނުންވަނީ ކްރިސްޓިއާނޯ ރޮނާލްޑޯ އަށް ވުރެ ބޮޑު މުސާރައެއް ކަމަށް މީޑިއާ ރިޕޯޓްތައް ބުނެފި އެވެ.
ޕޮގްބާ، 28، ޔުނައިޓެޑްގެ ކޮންޓްރެކްޓްގައި ހުރީ މި ސީޒަނުގެ ނިޔަލަށެވެ. އަންނަ އަހަރުގެ ޖޫން މަހު ޕޮގްބާގެ އެއްބަސްވުން ހަމަވާއިރު، މިހާތަނަށް ޔުނައިޓެޑުން ހުށަހެޅި އާ ކޮންޓްރެކްޓަށް ޕޮގްބާގެ ފަރާތުން އެކަށީގެންވާ އެއްބާރުލުމެއް ނުލިބި އޮތް އެންމެ ބޮޑު ސަބަބަކީ ޕޮގްބާ ބޭނުންވާ ވަރުގެ މުސާރައެއް ދޭން ޔުނައިޓެޑުން ދެކޮޅު ހެދުމެވެ.
ޔުނައިޓެޑުން މި ސީޒަން ފެއްޓުމުގެ ކުރިން ވަނީ އެ ޓީމުގެ ކުރީގެ ތަރި ކްރިސްޓިއާނޯ ރޮނާލްޑޯ އަލުން ގެނެސްފަ އެވެ. ޔުނައިޓެޑުން ރޮނާލްޑޯ އަށް ހަފްތާ އަކު 500،000 ޕައުންޑް (670،000 ޑޮލަރު)ގެ މުސާރައެއް ލިބެ އެވެ. ޕޮގްބާ ޔުނައިޓެޑްގެ ކޮންޓްރެކްޓްގައި މި ވަގުތު ހުރީ ބޯނަހާ އެކު ހަފްތާ އަކު 290،000 ޕައުންޑް (400،000 ޑޮލަރު)ގެ މުސާރައެއް ލިބޭ ގޮތަށެވެ.
ޔުނައިޓެޑާ އެކު އާ ކޮންޓްރެކްޓެއްގައި ސޮއިކުރަން ޕޮގްބާގެ އޭޖެންޓް މިނޯ ރައިއޯލާ ޑިމާންޑްކުރަނީ ރޮނާލްޑޯ އަށް ވުރެ ބޮޑު މުސާރައެއް ހޯދާށެެވެ.
ދާދި ފަހުން ފްރާންސްގެ ޕްރެކްޓިހުގެ ތެރޭގައި ލިބުނު އަނިޔާއެއްގެ ސަބަބުން ޕޮގްބާ މި ވަގުތު ހުރީ ކުޅުމާ ދުރުގަ އެވެ. ޖެނުއަރީ މަހުގެ ކުރިން ޕޮގްބާ އަށް ދެން މެޗެއްްގައި ނުކުޅެވޭނެކަމަށް ބައެއް ރިޕޯޓްތައް ބުނެ އެވެ. ޔުނައިޓެޑް ދޫކޮށްލަން ޕޮގްބާ ބޭނުންނަމަ ޖެނުއަރީ މަހު އެހެން ކްލަބަކާ އެކު ޕްރީ އެގްރީމެންޓެއްގައި ސޮއިކުރެވޭނެ އެވެ.
ޔުނައިޓެޑްގެ ޔޫތު ޓީމުގައި ހުރެ ފުރުސަތު ނުލިބޭތީ 2012 ވަނަ އަހަރު ޕޮގްބާ ޔުވެންޓަސް އަށް ބަދަލުވި އެވެ. ޔުނައިޓެޑުން ޕޮގްބާގެ ސޮއި ހޯދީ 2016 ވަނަ އަހަރު ޔުވެންޓަސް އަށް 116 މިލިއަން ޑޮލަރު ދައްކައިފަ އެވެ. އެއީ އޭރަށް ބަލާނަމަ ދުނިޔޭގެ ރެކޯޑް ފީ އެވެ.
