ސްރީ ލަންކާގައި މިހާރު ކުރިއަށްދާ މަހިންދަ ރާޖަޕަކްސަ ފޯ ނޭޝަންސް ފުޓްބޯޅަ މުބާރާތުގައި ފުރަތަމަ ކުޅުނު ދެ މެޗުން މޮޅެއް ނުލިބި، މުބާރާތުގައި ކުރިއަށް ދިއުމުގެ އަމިއްލަ ބާރު ރާއްޖެ އަށް ގެއްލިފައިވާއިރު، އެ ދެ މެޗުގެ ނަތީޖާ އިން ގައުމީ ޓީމުގައި އޭނާ ކުރަމުން އަންނަ މަަސައްކަތުގެ މުޅި މަންޒަރު ސާފުނުވާނެ ކަމަށް ގައުމީ ކޯޗު އިޓަލީގެ ފްރެންޗެސްކޯ މޮރިއޭރޯ ބުނެފި އެވެ.
މޮރިއޭރޯ ހަވާލުވިތާ ދެ ހަފްތާއެއްހާ ދުވަސްތެރޭގައި ރާއްޖޭން ފޯ ނޭޝަންސް ކަޕަށް ތައްޔާރުވެގެން މުބާރާތަށް އައިސް ފުރަތަމަ މެޗުގައި ވަނީ 4-4 އިން ލަންކާއާ އެއްވަރުވެފަ އެވެ. އެ މެޗުގައި 58 މިނިޓް ތެރޭ ރާއްޖޭން ހަތަރު ގޯލުގެ ލީޑެއް ނެގި ނަމަވެސް ފަހު 25 ވަރަކަށް މިނިޓް ތެރޭ ލަންކާ އިން ވަނީ އެއްވަރުކޮށްފަ އެވެ.
ރާއްޖޭން ކުޅުނު ދެ ވަނަ މެޗުގައި މިއަދު ހަވީރު ބަންގްލަދޭޝް އަތުން ވަނީ 2-1 އިން ބަލިވެފަ އެވެ. މި ނަތީޖާއާ އެކު މުބާރާތުގައި ކުރިއަށް ދިއުމުގެ އަމިއްލަ ބާރު ރާއްޖެ އަށް ވަނީ ގެއްލިފަ އެވެ.
މިދިޔަ މަހު މާލޭގައި ބޭއްވި އުރީދޫ ސާފް ޗެމްޕިއަންޝިޕްގައި ރާއްޖޭން ވަނީ ލަންކާ 1-0 އިން އަދި ބަންގްލަދޭޝް 2-0 އިން ބަލިކޮށްފަ އެވެ، މޮރިއޭރޯގެ ކޯޗުކަމުގައި އެ ދެ ޓީމު އަތުން މޮޅެއް ނުލިބި ޖެހުނީ ޕޮއިންޓަކުން ފުއްދާލާށެވެ.
"އަހަންނަށް އެނގޭ މި ދެ މެޗުން އެއް ޕޮއިންޓް އެއީ ސަޕޯޓަރުން ފަރުޖައްސާލާނެ އަދަދެއް ނޫންކަން. އަހަރެން ތަކުރާރުކޮށް ވެސް ބުނެލަން އޮތީ އެންމެ ވާހަކައެއް. އަހަންނަށް ވަގުތު ދޭށޭ. އަހަންނަކީ މަސައްކަތް ކުރާނެ މީހެކޭ މި ހުރިހާ ކަމެއް ރަނގަޅު ކުރަން،" މިއަދުގެ ނަތީޖާ އަށް ފަހު ސަޕޯޓަރުންގެ ހިތްހަމަ ނުޖެހުންތަކާ ބެހޭގޮތުން ދޭނެ މެސެޖަކީ ކޮބައިތޯ އެހުމުން ޓްރާންސްލޭޓަރުގެ އެހީގައި މޮރިއޭރޯ ބުންޏެވެ.
"ހަަމައެކަނި ނަތީޖާ އަށް ބަލަންޏާ. އަހަރެމެން މި ތިބީ ކުށްވެރިންގެ ގޮތުގައި. އެކަމަކު ފުރިހަމަ މަންޒަރު ފެންނާނީ ހަމައެކަނި މި ނަތީޖާތަކަށް ބަލައިގެނެއް ނޫން. ފަރުދާގެ ފުރަގަހުގައި ހިނގާ ކަމެއް ނޭނގި ހަމައެކަނި ނަތީޖާ އަކަށް ގޮތް ނުކިޔޭނެ. އަހަރެމެން ބަލަން ޖެހޭ މުޅި މަންޒަރަށް. މި ޓީމު ވަރަށް ކުރިއަރާނެ،"
މިއަދު ބަންގްލަދޭޝް އިން ރާއްޖެ ބަލިކުރިއިރު، މިއީ ފާއިތުވި 18 އަހަރު ތެރޭ ބަންގްލަދޭޝް އިން ރާއްޖެ ބަލިކުރި ފުރަތަމަ ފަހަރެވެ. މި ވަގުތު ގައުމީ ޓީމުގައި ހިމެނޭ އެއްވެސް ކުޅުންތެރިއަކު މީގެ ކުރިން ބަންގްލަދޭޝް އަތުން ސީނިއާ ފުޓްބޯޅައިގައި ބަލިވެފައި ނުވެ އެވެ. މޮރިއޭރޯ ބުނީ އެ ރެކޯޑަކީ އޭނާ ވެސް ވަރަށް ކަންބޮޑުވާ ކަމެއް ކަމަށެވެ.
"ވަރަށް ދެރަވޭ ތިކަން އެނގުނީމަ. މިއީ އަހަރެމެން އުއްމީދުކުރި ގޮތެއް ނޫން. އަހަރެމެން މަސައްކަތް ކުރަނީ އަބަދުވެސް އެންމެ ރަނގަޅަށް ކުޅެން. އަހަރެމެން (ރަނގަޅަށް) ކުޅެމުން ދަނިކޮށް މިވީ ކަމެއް ވީ. އަހަރެން ގަބޫލުކުރާ ގޮތުގައި އަހަރެމެން ކުޅުނު ގޮތަށް ބަލާއިރު ދެ މެޗުން އެއް ޕޮއިންޓަކީ އަހަރެމެންނަށް ހައްގު ވަރަށް ވުރެން ކުޑަ އަދަދެއް،" އިޓަލީ ދެ ވަނަ އަދި ތިން ވަނަ ޑިވިޝަންގެ ޓީމުތަކުގެ ކޯޗެއް ގޮތަށް މަސައްކަތް ކޮށްފައިވާ މޮރިއޭރޯ ބުންޏެވެ.
އިޓަލީ ގައުމީ ޓީމަށް ކުރިން ކުޅުނު މޮރިއޭރޯ ބުނީ ކުރު މުއްދަތެއްގެ ތެރޭގައި ވެސް ގައުމީ ޓީމުގައި ވަރަށް މަސައްކަތް ކުރެވިފައިވާ ކަމަށެވެ. އަދި ކުޅުންތެރިން ވެސް ވަރަށް ބުރަކޮށް މަސައްކަތް ކުރާއިރު، ޓެކްނިކަލް ޓީމު ދުވާލަކު 16 ގަޑިއިރު މަސައްކަތް ކުރާ ކަމަށެވެ.
"އެހެންވެ މި ބުނަނީ އަހަރެމެން މި މަސައްކަތް ހުއްޓާނުލައި ކުރާނަމޭ. އަހަރެން ދެކޭ ގޮތުގައި ނަތީޖާ އަންނާނެ. އަހަރެމެން ދަނޑަށް ނުކުމެ މި ތިބެނީ އެއް ނޫން. އަހަރެމެން އެބަ ފުޓްބޯޅަ ކުޅޭ. ނަތީޖާ މި ވަގުތު އެހުރީ މުޅި މަންޒަރު އެނގޭ ގޮތަކަށް ނޫން،" އެއް ވާހަކައެއް ތަކުރާރުކޮށް ފާހަގަކޮށް މޮރިއޭރޯ ބުންޏެވެ.
ރާއްޖެ ކޮޅަށް ބަންގްލަދޭޝް އިން މޮޅުވި ގޯލު ޖެހީ މެޗުގެ 88 ވަނަ މިނިޓްގައި ޕެނަލްޓީ އަކުން ޓޯޕޫ ބަރްމަން އެވެ. މި ޕެނަލްޓީ އަކީ ރާއްޖޭގެ ކީޕަރު ނާޖިހު އަލީ (ނާޖީ) ކުރި ފައުލަކަށް ދިން ޕެނަލްޓީ އެކެވެ. މެޗަށް ފަހު މޮރިއޭރޯ ބުނީ ނާޖީ އަކީ ތަޖުރިބާ ހޯދަމުން އަންނަ ޒުވާން ކީޕަރެއް ކަމަށާއި އޭނާ ބޮލުގައި މިއަދުގެ މެޗުގެ ނަތީޖާ ނޭޅުވޭނެ ކަމަށެވެ.
ބަންގްލަދޭޝް އިން މިއަދު މޮޅުވެ ވަނީ ހަތަރު ޓީމު ވާދަކުރާ ފޯ ނޭޝަންސް ކަޕްގެ ކުރިއަށް ޖެހިލައިފަ އެވެ. އެއީ ދެ މެޗުން ހަތަރު ޕޮއިންޓް ހޯދައިގެންނެވެ. ދެ ވަނައިގައި އޮތް ލަންކާ އާއި ތިން ވަަނައިގައި އޮތް ސީޝެލްސް އަދި ފުލުގައި އޮތް ރާއްޖެ އަށް ވަނީ ޕޮއިންޓެއް ލިބިފަ އެވެ.
ފޯ ނޭޝަންސް ކަޕްގެ ފައިނަލުގެ ޖާގަ ހޯދަން ރާއްޖޭން ޖެހޭނީ އަންގާރަ ދުވަހު ހަވީރު ސީޝެލްސް ބަލިކޮށް، މިރޭ ސީޝެލްސް އާއި ލަންކާ ކުޅޭ މެޗާއި އަންގާރަ ދުވަހުގެރޭ ބަންގްލަދޭޝާއި ލަންކާ ކުޅޭ މެޗުގެ ނަތީޖާ އަށް ބަލާށެވެ.
