މަހިންދަ ރާޖަޕަކްސަ ފޯ ނޭޝަންސް ފުޓްބޯޅަ މުބާރާތުގައި މިއަދު ރާއްޖެ އަތުން ބަންގްލަދޭޝް 2-1 އިން މޮޅުވެއްޖެ އެވެ. މިއީ ފާއިތުވި 18 އަހަރު ތެރޭގައި ބަންގްލަދޭޝް އިން ރާއްޖެ ބަލިކުރި ފުރަތަމަ ފަހަރެވެ.
މި ނަތީޖާއާ އެކު ރާއްޖެ އަށް މުބާރާތުގައި ކުރިއަށް ދިއުމުގެ އަމިއްލަ ބާރު ވަނީ ގެއްލިފަ އެވެ. މި ފަހަރުގެ ފޯ ނޭޝަންސް ކަޕްގެ ކުރިން ގައުމީ ޓީމުގެ ކޯޗުކަމާ ހަވާލުވި އިޓަލީގެ ފްރެންޗެސްކޯ މޮރިއޭރޯގެ ކޯޗުކަމުގައި ރާއްޖެ ކުޅުނު ދެ މެޗުން ވެސް މޮޅެއް ނުލިބެ އެވެ. ފުރަތަަމަ މެޗުގައި ލަންކާއާ 4-4 އިން ރާއްޖެ އެއްވަރުވިއިރު، ދެ ވަނަ މެޗުގައި މިއަދު މި ވަނީ ބަންގްލަދޭޝްގެ އަށްދަށުވެފަ އެވެ.
މިއީ 2003 ވަނަ އަހަރު އަމިއްލަ ގައުމު ކުޅުނު ސާފް ޗެމްޕިއަންޝިޕްގެ ފައިނަލަށް ފަހު ރާއްޖެ އަތުން ބަންގްލަދޭޝް ހޯދި ފުރަތަމަ މޮޅެވެ. އޭގެ ފަހުން ކުޅުނު ހަތަރު މެޗުން ވެސް މޮޅުވީ ރާއްޖެ އެެވެ. އޭގެ ތެރޭގައި މިދިޔަ މަހު ރާއްޖޭގައި ކުޅުނު ސާފް ޗެމްޕިއަންޝިޕްގައި ރާއްޖޭން 2-0 އިން މޮޅުވި މެޗު ހިމެނެ އެވެ.
ބަންގްލަދޭޝް އިން މިއަދު މޮޅުވެ ވަނީ ހަތަރު ޓީމު ވާދަކުރާ ފޯ ނޭޝަންސް ކަޕްގެ ކުރިއަށް ޖެހިލައިފަ އެވެ. އެއީ ދެ މެޗުން ހަތަރު ޕޮއިންޓް ހޯދައިގެންނެވެ. ދެ ވަނައިގައި އޮތް ލަންކާ އާއި ތިން ވަަނައިގައި އޮތް ސީޝެލްސް އަދި ފުލުގައި އޮތް ރާއްޖެ އަށް ވަނީ ޕޮއިންޓެއް ލިބިފަ އެވެ.
ރާއްޖެ އަށް ފައިނަލުގެ ޖާގައެއް އޮތީ ފަހު މެޗުގައި ސީޝެލްސް އަތުން ބޮޑު ތަފާތަކުން މޮޅުވެ، ބަންގްލަދޭޝް އާއި ލަންކާ މެޗުގެ ނަތީޖާ ނުކުންނަ ގޮތަކުންނެވެ. އެކަމަކު، މިރޭ ލަންކާ އިން ސީޝެލްސް ބަލިކޮށްފިނަމަ ފަހު މެޗުގައި ބަންގްލަދޭޝް އާއި ލަންކާ އެއްވަރުކޮށްލައިގެން އެ ދެ ޓީމަށް ފައިނަލް ކުޅެވޭނެ އެވެ.
ރާއްޖޭން މިއަދުގެ މެޗަށް ނުކުތީ ފުރަތަމަ މެޗުގައި ލަންކާއާ ދެކޮޅަށް އެއްވަރުވި މެޗުގައި ނެރުނު ފުރަތަމަ އެގާރަ އަށް ބަދަލެއް ނުގެނެސް އެވެ. ބަންގްލަދޭޝް އިން މި މެޗަށް ނުކުތީ ދެ ބަދަލެއް ގެނެސްގެންނެވެ. އެއީ ކަނާތު ފުލްބެކް، ޔާސީން އަރަފާތާއި ވިންގަށް ކުޅޭ ސާދު އުއްދީންގެ ބަދަލުގައި ރަހުމަތު މިއާ އާއި މުހައްމަދު ރިޑޯއި ކުޅެން އަރުވައިގެންނެވެ.
ކޮލަމްބޯގެ ރޭސްކޯސް ސްޓޭޑިއަމްގައި މިއަދު ކުޅުނު މެޗު ފަށައިގެން ދެ ޓީމުން ވެސް މަސައްކަތްކުރީ ބޯޅަ ހިފަހައްޓައިގެން ކުޅެ އެޓޭކް ކުރާށެވެ. މެޗުގެ 12 ވަނަ މިނިޓްގައި ބަންގްލަދޭޝް އިން ވަނީ ލީޑު ނަަގައިފަ އެވެ. ބަންގްލަދޭޝް އިން އޭރިއާތެރެއަށް އެއްލި ދިގު އެއްލުމެއްގައި ރާއްޖޭގެ ޑިފެންސްތެރެއިން ދިޔަ ބޯޅަ ފަހަތުގައި ހުރި ބަންގްލަދޭޝްގެ ކެޕްޓަން ޖަމާލް ބުޔާން އަށް ލިބުމުން އޭނާ ވަނީ ގޯލުުގެ ތެެރެއަށް ފޮނުވާލައިފަ އެވެ. ފުރަތަމަ އޮފްސައިޑް ކަމަށް ނިންމި ނަމަވެސް ރެފްރީއާ މަޝްވަރާ ކުރުމަށް ފަހު މި ގޯލު ބަލައިގަންނަން ވަނީ ނިންމައިފަ އެވެ
ލަނޑު ޖެހުމަށް ފަހު ރާއްޖޭގެ އުމެއިރު އުފާފާޅުކުރަނީ.--
.ރާއްޖޭން މަޑުމަޑުން އެޓޭކް ގިނަ ކުރަން މަސައްކަތް ކުރަމުންދިޔައިރު، މެޗުގެ 26 ވަނަ މިނިޓްގައި އިބްރާހިމް މަހުދީ (ފޭދޫ އިއްބެ) ނެގި ހުރަސް ބަންގްލަދޭޝްގެ ކީޕަރު އަނީސުރްރަހްމާން ޒީކޯ ވަނީ ސަލާމަތްކޮށްފަ އެވެ.
ރާއްޖޭން އެއްވަރުކުރީ މެޗުގެ 32 ވަނަ މިނިޓްގައި މުހައްމަދު އުމެއިރު އެވެ. އަލީ އަޝްފާގު (ދަގަނޑޭ) ކޯނަރަކުން ނެގި ބޯޅަ ބަންގްލަދޭޝް ޑިފެންޑަރުންގެ ތެރެއިން ގޮސް ކެޕްޓަން އަކުރަމް އަބްދުލް ގަނީ (އަކޫ) އަށް ލިބުމުން އޭނާ ޖައްސާލި ބޯޅަ ގޯލު ކުރިމަތީގައި ހުރި އުމެއިރު ވަނީ ބަންގްލަދޭޝްގެ ކީޕަރު ޒީކޯ އަށް ލިބުމުގެ ކުރިން ބޯޅަ ގޯލުގެ ތެރެއަށް ފޮނުވާލައިފަ އެވެ.
އޭގެ ފަހުން މެޗުގެ 38 ވަނަ މިނިޓްގައި ރާއްޖޭން އުފެއްދި ކައުންޓަ އެޓޭކެއްގައި އޭރިއާބޭރުން ފޭދޫ އިއްބެ ޖެހި ބޯޅަ ދިޔައީ އަރިމަތިން ބޭރުންނެވެ.
ރާއްޖޭން ވަނީ ދެ ވަނަ ހާފްގެ ކުޅުން ފަށައިގެން ފަސް މިނިޓް ތެރޭ ބަދަލެއް ކޮށްފަ އެވެ. ހައިޝަމް ހަސަން (ބިޑި)ގެ ބަދަލުގައި އަހުމަދު ނޫމާން (ހެލްމެޓް) ވަނީ ކުޅެން އަރުވައިފަ އެވެ. އޭގެ ހަތަރު މިނިޓް ފަހުން ދަގަނޑޭ ހިލޭ ޖެހުމަކުން ނެގި ހުރަހެއް ފޮނުވާލަން ހެލްމެޓު މަސައްކަތް ކުރި ނަމަވެސް ބޯޅަ ބޮލުގައި ލައްވާލާ ގޮތެއްނުވި އެވެ.
އޭގެ ފަހުން އުމެއިރުގެ ބަދަލުގައި ވަނީ އަސްހަދު އަލީ (އަޑުބަރޭ) ކުޅެން އަރުވައިފަ އެވެ.
މެޗުގެ 74 ވަަނަ މިނިޓްގައި ހެލްމެޓު އަރިމަތިން ހުސްކޮށްލާފައި ފޭދޫ އިއްބެ އަށް ދިން ބޯޅަ އޭރިއާތެރެއަށް ވަދެ އޭނާ މަސައްކަތްކުރީ ދަގަނޑޭ އަށް ދޭށެެވެ، އޭގެ ކުރިން ބަންގްލަދޭޝް ޑިފެންޑަރުން ވަނީ އެ ބޯޅަ ސަލާމަތްކޮށްފަ އެވެ.
ފަހު 15 މިނިޓަށް ފޭދޫ އިއްބެ އާއި ހުސެއިން ނިހާން (ނިހާޓް)ގެ ބަދަލުގައި ހަމްޒާ މުހައްމަދު (ހަމްޕު) އާއި އިސްމާއިލް އީސާ (މެސީ) ވަނީ ކުޅެން އަރުވައިފަ އެވެ.
ރާއްޖޭން ކުރިއަށް ޖެހިގެން ކުޅެމުން ދަނިކޮށް ރާއްޖޭގެ އަކޫ އަތުން ގެއްލުނު ބޯޅައެއް ހޯދައި ބަންގްލަދޭޝް އިން ކައުންޓަ އެޓޭކެއްގައި ކުރިއަށް ޖެހިލި ބޯޅައެއްގައި ރާއްޖޭގެ ކީޕަރު އަލީ ނާޖިހު (ނާޖީ) ކުރި ފައުލަކަށް ވަނީ ޕެނަލްޓީއެއް ދީފަ އެވެ. އެ ޕެނަލްޓީން ބަންގްލަދޭޝްގެ އިތުބާރު ޑިފެންޑަރު ޓޯޕޫ ބަރްމަން ވަނީ ކާމިޔާބުކޮށް އެ ޓީމަށް އަލުން ލީޑުނަގައިދީފަ އެވެ.
މެޗުގެ ފަހު ކޮޅުގައި ރާއްޖޭން ނަތީޖާ ހަމަހަމަކުރަން މަސައްކަތް ކުރި ނަމަވެސް އެ ކަން ކާމިޔާބެއްނުވި އެވެ. ސަމޫހު އަލީ (ސަމުއްޓެ) ބޮލުން ފޮނުވާލި ބޯޅަ ކީޕަރު ޒީކޯ ވަނީ މަތަކޮށްފަ އެވެ. މެޗުން މޮޅުވުމުން ބަންގްލަދޭޝް ކުޅުންތެރިން ވަނީ ވަރަށް ބޮޑަށް އުފާފާޅުކޮށްފަ އެވެ.
