ލަންޑަން (ނޮވެމްބަރު 13) - ވޯލްޑް ކަޕް ކޮލިފައިންގައި ރޭ އިންގްލެންޑުން ހެރީ ކޭންގެ ހެޓްރިކާ އެކު 5-0 އިން އަލްބޭނިއާ ބަލިކުރިއިރު، ފަހު ވަގުތު ޖޯޖީނިއޯ ފޮނުވާލި ޕެނަލްޓީ ނާކާމިޔާބުވެ އިޓަލީ އާއި ސްވިޒަލެންޑް 1-1 އިން އެއްވަރުވެއްޖެ އެވެ.
ވެމްބްލީ ސްޓޭޑިއަމްގައި ރޭ ކުޅުނު މެޗުގައި އިންގްލެންޑުން ފަސް ގޯލު ޖެހީ ވެސް ފުރަތަަމަ ހާފުގަ އެވެ. މެޗުގެ ނުވަ ވަނަ މިނިޓްގައި ރީސް ޖޭމްސް ދިން ބޯޅައަކުން ހެރީ މެގުއާ އިންގްލެންޑަށް ލިޑުނަގައިދިންއިރު، އޭގެ ނުވަ މިނިޓް ފަހުން ކޭން ވަނީ އިންގްލެންޑްގެ ދެ ވަނަ ގޯލު ޖަހައިފަ އެވެ. ކޭން ދިން ބޯޅަ އަކުން މެޗުގެ 28 ވަނަ މިނިޓްގައި އިންގްލެންޑްގެ ތިން ވަނަ ގޯލު ޖެހި ޖޯޑަން ހެންޑަސަން އެވެ.
އޭގެ ފަހުން ކޭން ވަނީ އިތުރު ދެ ގޯލު ޖަހައި އޭނާގެ ހެޓްރިކް ފުރިހަމަކޮށްފަ އެވެ. މި ސީޒަނުގައި ޓޮޓެންހަމަށް މިހާތަނަށް އެއް ގޯލު ޖެހުނު ނަމަވެސް ކޭން ވަނީ އެންމެ ފަހުން އިންގްލެންޑަށް ކުޅުނު ފަސް މެޗުން ހަ ގޯލު ޖަހައިފަ އެވެ.
މި ނަތީޖާއާ އެކު އިންގްލެންޑް އޮތީ އަންނަ އަހަރު ގަތަރުގައި ކުޅޭ ވޯލްޑް ކަޕްގެ ޖާގައެއް ހޯދުމާ ގާުތުގަ އެވެ. ކޮލިފައިންގައި ބާކީ އެއް މެޗު އޮތްއިރު، އިންގްލެންޑް ގްރޫޕް އައިގެ އެއް ވަނައިގައި އޮތީ ނުވަ މެޗުން 23 ޕޮއިންޓާ އެކު އެވެ. ދެ ވަނައިގައި އޮތް ޕޮލެންޑަށް ނުވަ މެޗުން ވަނީ 20 ޕޮއިންޓް ލިބިފަ އެވެ.
ގްރޫޕްގެ އެއް ވަނަ އަށް ވޯލްޑް ކަޕްގެ ސީދާ ޖާގައެއް ލިބޭއިރު، ދެ ވަނަ ޖެހޭނީ ޕްލޭއޮފް ކުޅޭށެވެ. އިންގްލެންޑް ފަހު މެޗުން ސެން މެރީނޯ އަތުން ބަލިނުވެ ފަރުޖައްސާލައިގެން ވޯލްޑް ކަޕްގެ ޖާގަ ޔަގީންކުރެވޭނެ އެވެ.
ރޭގެ މެޗުގައި ޖޯޖީނިއޯ ފޮނުވާލި ޕެނަލްޓީ.-- ފޮޓޯ: އޭއެފްޕީ
ރޯމްގައި ރޭ ކުޅުނު މެޗުގައި އިޓަލީ ކޮޅަށް ގޯލު ޖަހައި ސިލްވޭން ވިލްޑްމެއާ ވަނީ މެޗުގެ 11 ވަނަ މިނިޓްގައި ސްވިޒަލެންޑަށް ލީޑުނަގައިދީފަ އެވެ. އިޓަލީން އެއްވަރުކުރީ މެޗުގެ 36 ވަަނަ މިނިޓްގައި ލޮރެންޒޯ އިންސީނިއޭ ދިން ބޯޅައަކުން ޖިއޮވާނީ ޑި ލޮރެންޒޯ ޖެހި ގޯލުންނެވެ. މެޗުގެ ފަހު މިނިޓްގައި އިޓަލީގެ ޑޮމެނިކޯ ބެރާޑީ އަށް އޭރިއާތެރެއިން ކުރި ފައުލަކަށް އިޓަލީ އަށް ޕެނަލްޓީ އެއް ލިބުނެވެ. ޖޯޖީނިއޯ ޖެހި ޕެނަލްޓީ ދިޔައީ ހުރަސްދަނޑިމަތިންނެވެ.
މި މެޗުން މޮޅުވިނަމަ އިޓަލީ އަށް ގްރޫޕް ސީގެ އެއް ވަަނައިގައި ލީޑެއް ނަގައި ވޯލްޑް ކަޕްގެ ސީދާ ޖާގައަކާ ގާތަށް ޖެހިލެވޭނެ އެވެ. އެކަމަކު އެއްވަރުވުމުން އިޓަލީ އާއި ސްވިޒަލެންޑަށް އޮތީ އެއްވަރަށް ޕޮއިންޓް ލިބިފަ އެވެ. އެއް ވަަނައިގައި އޮތް އިޓަލީ އާއި ދެ ވަނައިގައި އޮތް ސްވިޒަލެންޑަށް ވަނީ ހަތް މެޗުން 15 ޕޮއިންޓް ލިބިފަ އެވެ. އިޓަލީ ކުރީގައި އޮތީ ފައިދާ ގޯލުންނެވެ. އިޓަލީގެ ފައިދާ 11 ގޯލު އޮތްއިރު، ސްވިޒަލެންޑްގެ އޮތީ ފައިދާ ނުވަ ގޯލެވެ.
ކޮލިފައިން ފަހު މެޗުގައި އިޓަލީ ކުޅޭނީ ރަށުންބޭރުގައި ނޮދަން އަޔަލެންޑާ އެވެ. ސްވިޒަލެންޑް އަމިއްލަ ދަނޑުގައި ބައްދަލުކުރާނީ ބަލްގޭރިއާއާ އެވެ.
