ސައޮޮ ޕައޮލޯ، ބްރެޒިލް (ނޮވެމްބަރު 12) - ދެކުނު އެމެރިކާގެ ވޯލްޑް ކަޕް ކޮލިފައިންގައި ރޭ ކޮލަމްބިއާ އަތުން 1-0 އިން މޮޅުވެ، ކޮލިފައިންގައި ބާކީ ހަ މެޗު އޮއްވައި ބްރެޒިލުން އަންނަ އަހަރު ގަތަރުގައި ބާއްވާ ފީފާ ވޯލްޑް ކަޕްގެ ޖާގައެއް ކަށަވަރުކޮށްފި އެވެ.
އަންނަ އަހަރުގެ ވޯލްޑް ކަޕް ހޯސްޓެއްގެ ގޮތުގައި އޮތް ގަތަރާ އެކު މިހާތަނަށް ކޮލިފައިން ބުރުން ވޯލްޑް ކަޕްގެ ޖާގަ ޔަގީންކޮށްފައިވަނީ ބްރެޒިލްގެ އިތުރުން ޔޫރަޕްގެ ކޮލިފައިން އިން ޖަރުމަނާއި ޑެންމާކް އެވެ.
ބްރެޒިލް ކޮލިފައިވީ ކޮލިފައިންގައި މިހާތަނަށް ކުޅުނު 12 މެޗުގެ ތެރެއިން 11 މެޗުން މޮޅުވެގެންނެވެ. ދެކުނު އެމެރިކާ ކޮލިފައިންގެ ގަދަ ހަތަރު ޓީމަށް ވޯލްޑް ކަޕްގެ ޖާގަ ލިބޭއިރު، ދެ ވަނައިގައި އޮތީ 11 މެޗުން 25 ޕޮއިންޓް ހޯދާފައިވާ އާޖެންޓީނާ އެވެ. ތިން ވަނައިގައި 13 މެޗުން 20 ޕޮއިންޓާ އެކު އޮތީ އެކުއެޑޯ އެވެ. އަދި ހަތަރެއްގައި އޮތް ޗިލީ އާއި ފަހެއްގައި އޮތް ކޮލަމްބިއާ އަށް ވަނީ 13 މެޗުން 16 ޕޮއިންޓް ލިބިފަ އެވެ.
މި ފަހަރުގެ ކޮލިފައިންގައި ބްރެޒިލް މޮޅުވިޔަނުދީ ހުއްޓުވީ މިދިޔަ މަހު ކޮލަމްބިއާ އިންނެވެ. މިދިޔަ މަހު ކޮލަމްބިއާގައި ކުޅުނު މެޗު ނިމުނީ ލަނޑެއް ނުޖެހި އެއްވަރުވެގެންނެވެ. އެ ނަތީޖާގެ ބަދަލު ހިފައި ރޭ އަމިއްލަ ގައުމުގައި ބްރެޒިލް ވަނީ ކޮލަމްބިއާ ބަލިކޮށްފަ އެވެ.
ފުރަތަމަ ހާފުގައި ބްރެޒިލުން ގޯލެއް ޖަހަން ކުރި މަސައްކަތް ކާމިޔާބުވާ ގޮތެއްނުވި އެވެ. އަނެއްކޮޅުން ކޮލަމްބިއާ އިން ރަނގަޅު އެޓޭކްތަކެއް ކުރަން ކުރި މަސައްކަތް ބްރެޒިލް ޑިފެންޑަރުން ވަނީ ހުއްޓުވައިފަ އެވެ.
ބްރެޒިލުން ކޮލަމްބިއާ އަތުން މޮޅުވި ގޯލު ޖެހީ ދެ ވަނަ ހާފުގަ އެވެ، މެޗުގެ 72 ވަނަ މިނިޓްގައި ލޫކަސް ޕަކޭޓާ މި ގޯލު ޖެހީ ނޭމާ ތަނަވަސްކޮށްދިން ފުރުސަތެއްގަ އެވެ. ނޭމާ ދިން ބޯޅަ އޭރިއާތެެރެއިން ޕަކޭޓާ ވަނީ އެއް ފަހަރުން ފޮނުވާލައިފަ އެވެ. ޕަކޭޓާ ފޮނުވާލި ބޯޅަ ގޯލުގެ ދުރު ކަނަށް ވަނީ ކޮލަމްބިއާގެ ކީޕަރު ޑޭވިޑް އޮސްޕީނާ އަތުގައި ޖެހިފަ އެވެ.
ޕަކޭޓާ ބުނީ މި ގޯލު ޖެހުމާ އެކު އޭނާ ގައުމީ ޓީމަށް ބޮޑު ކަމެއް ކޮށްދޭން ކުރަމުން އައި އެއް އުއްމީދު ހާސިލްވިވެފައިވާ ކަމަށެވެ.
