ދުބާއީ (ނޮބެމްބަރު 11) - ފަހު ވަގުތު މެތިއު ވޭޑް ހަޔަކަށް ޖެހި ބޯޅަތަކާ އެކު އޮސްޓްރޭލިއާ އިން ޕާކިސްތާން ބަލިކޮށް ޓީ20 ކްރިކެޓް ވޯލްޑް ކަޕް ފައިނަލުގެ ފަހު ޖާގަ މިރޭ ހޯދައިފި އެވެ.
ޕާކިސްތާން އަތުން މިރޭ ފަސް ވިކެޓުން މޮޅުވި އޮސްޓްރޭލިއާ ފައިނަލުގައި އަންނަ އާދިއްތަ ދުވަހު ބައްދަލުކުރާނީ ނިއު ޒީލެންޑާ އެވެ. ނިއު ޒީލެންޑުން ވަނީ ފުރަތަމަ ސެމީގައި އިންގްލެންޑް ބަލިކޮށްފަ އެވެ. ސެމީގައި ނިއު ޒީލެންޑް ވެސް މޮޅުވީ ފަސް ވިކެޓުންނެވެ.
ޓޮސް ދިމާވުމުން އިތުބާރާ އެކު އޮސްޓްރޭލިއާ އިން ނިންމީ ފީލްޑު ކުރާށެވެ. ޕާކިސްތާނުން ކުޅެން އަރައި 20 އޯވަރު ހަމަވިއިރު ހަތަރު ކުޅުންތެރިން ނުބައިވެގެން ހެދުނީ 176 ލަނޑެވެ. އެ ޓީމުގެ އޯޕަނިން ބެޓްސްމަނުން ކަމަށްވާ މުހައްމަދު ރިޒްވާނާއި ބާބަރު އާޒަމްގެ ޕެއާ އަށް ބޭނުންވި ތަފާތު ނުދެއްކުނެވެ. ރިޒްވާން ހެދީ 52 ބޯޅައިން 67 ލަނޑެވެ. އަދި ބާބަރު ވަނީ 34 ބޯޅައިން 39 ލަނޑު އެއްކޮށްފަ އެވެ. އެ ދެ ކުޅުންތެރިން ނުބައިވުމުން ދެން ކުޅެން އެރި ފަހާރު ޒަމާން ވަނީ ނުބައި ނުވެ 32 ބޯޅައިން 55 ލަނޑު ހަދައިފަ އެވެ.
އޮސްޓްރޭލިއާ އިން ކުޅެން އެރިއިރު، ޓާގެޓް އޮތީ އަތްލެވޭ ހިސާބުގަ އެވެ. އެކަމަކު، ޕާކިސްތާނުން އިތުބާރުގައި ފަށައިގެން ކުޅެ އޮސްޓްރޭލިއާ ހާސްކޮށްލި އެވެ. އޮސްޓްރޭލިއާގެ ފުރަތަމަ ފަސް ކުޅުންތެރިން ނުބައިވިއިރު، ޕާކިސްތާނަށް މެޗުން މޮޅުވެވޭނެ ކަމަށް ބެލެވުނެވެ.
އެކަމަކު، ވޭޑް އާއި މާކަސް ސްޓޮއީނީސްގެ ޕާޓްނަޝިޕް ކުޅެން އެރި ހިސާބުން މަންޒަރު ބަދަލުވެ، ޕާކިސްތާނަށް ޕްރެޝަރު ބޮޑުވާން ފެށި އެވެ. ވޭޑް އާއި ސްޓޮއީނީސްގެ ޕާޓްނަޝިޕުން ވަނީ ޖުމްލަ އެއްކޮށް 48 ބޯޅައިން 81 ލަނޑު ހަދައިފަ އެވެ.
ވޭޑް ނުބައިކޮށްލަން ޕާކިސްތާންގެ ހަސަން އަލީ އަށް ލިބި އަތުން ބޯޅަ ދޫވެގެން ފުރުސަތު ގެއްލުނުއިރު، އެއީ މެޗުގައި ޕާކިސްތާނަށް ނަަސީބު ދެރަކޮށްދާން ފެށި ހިސާބެވެ. އޭގެ ފަހުން ވޭޑް ވަނީ ދެ އައި ތިން ބޯޅަ ހަޔަކަށް ޖަހައި އޮސްޓްރޭލިއާ އަށް ފައިނަލުގެ ޖާގަ ކަށަވަރުކޮށްދީފަ އެވެ.
އޮސްޓްރޭލިއާ މޮޅުވީ 19 އޯވަރު ތެރޭ 177 ލަނޑު ހަމަކޮށްގެންނެެވެ.
"އަހަރެން ގައުމީ ޓީމާ ދުރުގައި ދުވަސްތަކެއް ހޭދަކުރަން ޖެހުނު. އޭރު އެންމެ ބޭނުންވީ މި ކަހަލަ ދުވަހެއް ގައުމީ ޓީމުގައި ހުރެ ތަޖުރިބާ ކޮށްލަން. މި ގޮތަށް އެ ފަދަ ދުވަހެއް އަންނާނެ ކަމަށް ހިއެއްނުކުރަން. ވަރަށް އުފާވެފައި މި ހުރީ،" މެޗަށް ފަހު ވޭޑް، 33، ބުންޏެވެ.
އޮސްޓްރޭލިއާ ވަނީ 2010 ވަަނަ އަހަރުގެ ޓީ20 ފައިނަލުގައި އިންޑިއާ އަތުން ބަލިވެފަ އެވެ. މިއީ އޭގެ ފަހުން އެ ޓީމުގެ ފުރަތަމަ ފައިނަލެވެ. އަނެއްކޮޅުން މިއީ ނިއު ޒީލެންޑުން މުބާރާތުގެ ފައިނަލުގައި ކުޅޭ ފުރަތަމަ ފަހަރެވެ.
