ބަންގްލަދޭޝްގެ ޑާކާގައި އަންނަ ހޯމަ ދުވަހު ފަށަން ނިންމާފައިވާ ސާބާ ޗެމްޕިއަންޝިޕް ބާސްކެޓްބޯޅަ މުބާރާތުގައި ރާއްޖޭގެ ކޯޗަކަށް ހުންނާނީ ކުރިން ގައުމީ ކެޕްޓަނެއްގެ ގޮތުގައި މަސައްކަތްކޮށް ފަހުން އެސިސްޓަންޓް ކޯޗެއްގެ ގޮތުގައި ފެނުނު ބާސްކެޓްގެ ކާމިޔާބު ތަރި، އިލްޔާސް އިބްރާހިމް (އިއްލެ) އެވެ.
ގައުމީ ޓީމުގެ ހެޑް ކޯޗުގެ ޒިންމާއާ ހަވާލުވެހުރި، އިއްލެ ދާދި ފަހުން ޕީއެސްއެމްގެ "ކުޅިފަސް" ޕްރޮގްރާމަށް ދިން އިންޓަވިއުއެއްގައި ބުނީ ދިވެހި ކޯޗުންނަށް ފުރުސަތު ދިނުމުން ބައެއް ފަހަރު ބައެއް މީހުންނަށް ހީވަނީ އެއް ފަަހަރުން ނަތީޖާ ނެރެން ޖެހޭނެ ކަމަށެވެ.
"(ދިވެހި ކޯޗަކު ހުރެފިއްޔާ) އެއް ފަހަރުން ގޯލްޑް މެޑަލެއް ނޫނީ މެޑަލެއް ލިބެންޖެހެއޭ. އެއީކީ ފަސޭހަކަމެއް ނޫން. މީގެ ހަގީގަތުގައި މެޓާވަނީ (މުހިއްމު ވަނީ) އަންނަ ރިޒަލްޓް (ނަތީޖާ). ރިޒަލްޓް ގޯސްވިއްޔާ ގޯސްވާނީ ކޯޗާއި ކޯޗިން ޓީމު. އެހެންވީމަ ވަރަށް މުހިއްމު އެބަވޭ ރިޒަލްޓް. އެކްސްޕާޓުން ނޫނީ ކުޅިވަރު އެނގޭ ތަޖުރިބާކާރުން ބަލާނެ ޕްރެޕަރޭޝަނާއި ހުރިހާ ކަމަކަށް،" އިއްލެ ބުންޏެވެ.
ގައުމީ ބާސްކެޓް ޓީމަށް އާންމުކޮށް އަންނަނީ ފެންވަރު ރަނގަޅު ބިދޭސީ ކޯޗުންކަން ފާހަގަކޮށް އިއްލެ ބުނީ މައްސަލަ ދިމާވަނީ އެ އަންނަ ކޯޗެއްގެ ފިލޯސަފީ އެ އިންނަ ގޮތަށް ރާއްޖޭގެ ހާލަތާ ނުބައްދަލު ގޮތަކަށް ކުރިއަށްދާން ވިސްނާތީ ކަމަށް ވެދާނެ ކަމަށެވެ.
އެކަމަކު، ދިވެހި ކުުޅުންތެރިންނަކީ ސެމީ ޕްރޮފެޝަނަލް ބަޔަކަށްވާއިރު، ސީދާ ޕްރޮފެޝަނަލުންގެ ވިސްނުމުގައި ބިދޭސީ ކޯޗު އައިސް ކަންކުރަން އުޅެގެން މީގެ ދޭން ނުޖެހޭ ޕްރެޝަރުތަކެއްގައި ޖެހި ކުޅުންތެރިންނަށް ޕާފޯމް ނުކުރެވޭތަން އަންނަ ކަމަށް އިއްލެ ފާހަގަކޮށްފައިވެ އެވެ.
"އަޅުގަނޑުމެންނަށް ބޭރު ކޯޗުން ކައިރިން ދަސްވެފައި ތަޖުރިބާ ކުރެވިފައި ހުރި އެއްޗެހިން ކުޅުންތެރިންނަށް ޕްރެޝަރެއް ނުދީ އެ އޮތް ޕްރެޝަރަށް ވެސް ލުޔެއް ލިބޭނެ ގޮތަށް (ކުޅުންތެރިންނަށް) މި ކިޔައިދެނީ. މީގެ އެންމެ ބޮޑު ބޭނުމަކީ ގޭމްޕްލޭނެއް ހެދުމާއި އިދިކޮޅުގައި އޮތް ޓީމު ކައިރީގައި ކުޅެވޭނެ ގޮތްތަކުގެ ރޭވުންތަކެއް އެނގިފައި އޮތުން. އެކަން މިކުރެވެނީ،" އިއްލެ ބުންޏެވެ.
ގައުމީ ޓީމުގެ ޕްރެކްޓިހުގެ ތެރެއިން އިއްލެ ކުޅުންތެރިއަކަށް ބުނެދެނީ.-- ފޮޓޯ: ހުސެއިން ޝަޔާހު/ އަދަދު
ސާބާ މުބާރާތަށް ތައްޔާރުވާން މިހާރު އޮތް ކޯޗިން ޓީމަށް ލިބުނީ ދެ މަހާއި ތިން މަހާ ދޭތެރޭގެ މުއްދަތެކެވެ. މުބާރާތަށް ތައްޔާރީތައް ފެށިިއިރު، ތިބި 50 ގެ ސްކޮޑުން މިހާރު ވަނީ 12 ކުޅުންތެރިންނަށް ކުޑަކޮށްފަ އެވެ. ފައިނަލް ސްކޮޑު އެކުލަވާލީ ފިޒިކަލް ޓެސްޓްތަކާއި ޕްރެކްޓިސް އާއި ދުބާއީ ޓުއާގެ މެޗުތަކުން ކަންކަން ދަސްކޮށްގެން އެ އަށް ބަލާފަ އެވެ. މިހާރު އޮތީ ރަނގަޅު ހިސާބަކަށް ގޮސް ކާމިޔާބެއް ހޯދޭނެ ޓީމެއް ކަމަށް އިއްލެ ގަބޫލުކުރެ އެވެ.
"މެޑަލެއް ހިފައިގެން ގައުމަށް އަންނަން ޓާގެޓްކުރަނީ. އިންޑިއާ އަކީ މި މުބާރާތުގައި ބައިވެރިވާ ކޮންމެ ފަހަރަކު ގޯލްޑް މެޑަލް ނަގާ ޓީމެއް. އިންޑިއާ ބައިވެރިވިޔަސް އަޅުގަނޑުމެންގެ ޓާގެޓަކީ މެޑަލެއް ހިފައިގެން އައުން،" އިއްލެ ބުންޏެވެ.
އަނިޔާގެ ސަބަބުން ރިޝްފާން ރަޝީދު (ކޮކީ) އާއި އަހުމަދު ފިރާޝް އަށް ވަނީ ސާބާ މުބާރާތް ގެއްލިފަ އެވެ. ކޮކީ އަށް އަނިޔާވީ ދުބާއީގަ އެވެ. ފިރާޝަށް އަނިޔާވީ މާލޭގައި ޕްރެކްޓިސް ކުރަނިކޮށެވެ.
އިއްލެގެ އެސިސްޓަންޓް ކޯޗުންނަށް ހަމަޖެއްސި ކޯޗުންނަކީ އޭނާއާ އެކު ގައުމީ ޓީމަށް ކުޅުނު ކުޅުންތެރިންނެވެ. އޭގެ ތެރޭގައި 2019 ވަނަ އަހަރު ގައުމީ ޓީމަށް ކުޅުން ހުއްޓާލި މުހައްމަދު ޒިލާލް (ޒިލާ) އާއި އަލީ ފަޒްލީގެ އިތުރުން ބާސްކެޓް ކޯޗު މުހައްމަދު ނަސީރު (މޮއްޑެ) ހިމެނެ އެވެ.
"މިދިޔަ 16 ނޫނީ 17 އަހަރު ގައުމީ ޓީމުގައި ހިނގާފައިވާ ހުރިހާ ހާދިސާއެއް އަޅުގަނޑާއި ޒިލާ އަށް އެނގޭނެ. ވަރަށް ގާތުން އެނގޭނެ ޗެލެންޖަސްތަކާއި ގޯސްކޮށް ކުރެވޭ ކަންތައްތަކާއި ރަނގަޅުކުރަން ޖެހޭ ކަންކަން. އިރާދަކުރެއްވިއްޔާ އަޅުގަނޑުމެންގެ ޓީމުގައި އިތުރަށް ހުރި އެސިސްޓަންޓް ކޯޗު ފަޒްލީއާ އެކީ ގައުމަށް (ކޯޗިންގައި ވެސް) އެކުގައި ހިދުމަތް ކޮށްދޭން ބޭނުމީ،"
ސާބާ މުބާރާތުގައި ވާދަކުރަން ގައުމީ ޓީމު މިއަދު ވަނީ ބަންގްލަދޭޝަށް ފުރައިފަ އެވެ. ފުރަތަމަ މެޗުގައި ރާއްޖެ ކުޅޭނީ އަންނަ އަންގާރަ ދުވަހު އިންޑިއާއާ ދެކޮޅަށެވެ. ދެ ވަނަ މެޗުގައި ބުދަ ދުވަހު ބަންގްލަދޭޝާ ކުޅުމަށް ފަހު ތިން ވަނަ މެޗުގައި ބުރާސްފަތި ދުވަހު ލަންކާއާ ކުޅޭނެ އެވެ.
އިއްލެ ބުނީ މުބާރާތް ފަށަން މި ޖެހެނީ އެންމެ ވަރުގަދަ ޓީމު، އިންޑިއާ ދެކޮޅަށް ކަމަށާއި ޝެޑިއުލް ކޮންމެ ގޮތަކަށް އޮތަސް މެޑަލެއް ހޯދުމުގެ ޓާގެޓަށް ދާނަމަ މީގެ ނަތީޖާ ނެރެން ޖެހޭނީ ބަންގްލަދޭޝާއި ލަންކާ މެޗުން ކަމަށެވެ. އެ ދެ ޓީމު ބަލިކުރެވިއްޖިއްޔާ ބޭނުންވާ ރިޒަލްޓް ލިބޭނެ ކަމަށް އިއްލެ ގަބޫލުކުރެ އެވެ. އަދި ފުރަަތަމަ މެޗުގައި އިންޑިއާއާ ދެކޮޅަށް ނުކުންނާނީ ވެސް މޮޅުވާން މަސައްކަތް ކުރުމުގެ ނިޔަތުގައި ކަމަށް އިއްލެ ބުނެފައިވެ އެވެ.
