މިލާން (ނޮވެމްބަރު 8) - އިޓާލިއަން ލީގުގައި ރޭ އިންޓަ މިލާނާއި އޭސީ މިލާން ކުޅުނު މެޗު 1-1 އިން އެއްވަރުވިއިރު، ލީގުގެ ކުރީގައި އޮތް ނަޕޯލީ ވެސް ހެލަސް ވެރޯނާއާ 1-1 އިން އެއްވަރުވެ، ޕޮއިންޓަކުން ފުއްދާލަން ޖެހިއްޖެ އެެވެ.
މި ނަތީޖާތަކާ އެކު އިންޓަނޭޝަނަލް ބްރޭކަށްދާއިރު، ނަޕޯލީ އެއް ވަަނައިގައި އޮތީ ދެ ވަނައިގައި އޮތް މިލާނާ އެއްވަރަށް 12 މެޗުން 32 ޕޮއިންޓާ އެކު އެވެ. އެންމެ ފަހުގެ ޗެމްޕިއަން އިންޓަ އޮތީ ދެ ވަނައިގަ އެވެ. އިންޓަ އަށް 12 މެޗުން ލިބިފައިވަނީ 25 ޕޮއިންޓެވެ.
ރޭ ދެ މިލާނުގެ ކުރިމަތިލުމުގައި ފުރަތަމަ ލީޑުނެގީ އިންޓަ އިންނެވެ. މެޗުގެ 11 ވަނަ މިނިޓްގައި އިންޓަ އަށް ލީޑުނަގައިދިނީ ޕެނަލްޓީ އަކުން ތުރުކީގެ މިޑްފީލްޑަރު ހަކަން ޗަނޮނޮގްލޫ އެވެ. އޭނާ އަކީ ކުރިން މިލާނަށް ކުޅުނު ކުޅުންތެރިއެކެެވެ. މިއީ ޗަނޮނޮގްލޫ އަށް އޭރިއާތެރެއިން ފްރޭންކް ކެސިއޭ ކުރި ފައުލަކަށް ދިން ޕެނަލްޓީ އެކެވެ.
އިންޓަ އަށް ލީޑު ހިފަހައްޓައިލެވުނީ ހަ މިނިޓެވެ. މެޗުގެ 17 ވަނަ މިނިޓްގައި މިލާނުން އެއްވަރުކުރި އެވެ. މި ގޯލަކީ މިލާންގެ ސަންޑްރޯ ޓޮނާލީ ނެގި ހިލޭ ޖެހުމެއް ޑިފެންސްކުރަން އުޅުމުގެ ތެރޭގައި އިންޓަގެ ޑިފެންޑަރު ސްޓެފަން ޑި ވްރައި އަތުން ބައިކޮޅަށް ވަން ގޯލެކެވެ.
މެޗުގެ 27 ވަނަ މިނިޓްގައި އިންޓަ އަށް އަލުން ލީޑުނަގަން ރަނުގެ ފުރުސަތެއް ލިބުނެވެ. އެކަމަކު، ލަޓާރޯ މާޓީނޭޒް ފޮނުވާލި ޕެނަލްޓީ މިލާންގެ ކީޕަރު ސިޕްރިއަން ޓަޓަރުސާނޫ ވަނީ މަތަކޮށްފަ އެވެ. އޭގެ ފަހުން މާޓީނޭޒް އަށް އޭރިއާތެރެއިން ހުސްކޮށް ލިބުނު ބޯޅައެއް ފޮނުވާލި ނަމަވެސް ދިޔައީ އަރިމަތިން ބޭރުންނެވެ.
މިލާނުން މެޗު ކާމިޔާބުކުރަން ގިނަ މަސައްކަތްތަކެއް ކޮށް، ހަމަލާތަކެއް ފޮނުވާލި އެވެ. އެ ގޮތުން އަލެކްސިސް ސަލެމެކާ ފޮނުވާލި ހަމަލާއެއް ދަނޑީގައި ޖެހުނުއިރު، ކެސިއޭ ފޮނުވާލި ބޯޅައެއް ދިޔައީ ގޯލާ ސީދާނުވެ އެވެ. އަދި ޒަލަޓާން އިބްރަހިމޮވިޗް ހިލޭޖެހުމަކުން ޖެހި ބާރު ބޯޅަ އިންޓަގެ ކީޕަރު ސާމިރް ހަންޑަނޮވިޗް ވަނީ މަތަކޮށްފަ އެވެ.
ނޮވެމްބަރު މަހުގެ ތިން މެޗު ވެސް ނަޕޯލީން ކުޅެން ނިންމާފައިވަނީ އެ ކްލަބަށް ކުރިން ކުޅުނު ފުޓްބޯޅަ ލެޖެންޑް ޑިއޭގޯ މަރަޑޯނާގެ ހަނދާނުގައި ފަރުމާކޮށްފައިވާ ހާއްސަ ޖޯޒީއެއްގަ އެވެ. ރޭ އެ ޖޯޒީގައި ނަޕޯލީން ކުޅުނުއިރު، މެޗުގެ 13 ވަނަ މިނިޓްގައި ލީޑުނެގީ ހެލަސް ވެރޯނާ އިންނެވެ. މި ގޯލު ޖެހީ އެންޓޯނިން ބަރަކް ދެ ކުޅުންތެރިން ކައިރިން ދެމިގަތުމަށް ފަހު ދިން ބޯޅައަކުން މި ވަގުތު ރަނގަޅު ފޯމެއްގައި ހުރި ޖިއޮވާނީ ސިމިއޯނީ އެވެ. އެތުލެޓިކޯގެ ކޯޗު ޑިއޭގޯ ސިިމިއޯނީގެ ދަރިފުޅު ޖިއޮވާނީ ހުރީ ރަނގަޅު ފޯމެއްގަ އެވެ.
ހެލަސް އިން ލީޑުނެގިތާ އޭގެ ފަސް މިނިޓް ފަހުން ނަޕޯލީގެ ޑި ލޮރެންޒޯ ވަނީ ގޯލެއް ޖަހައި ނަތީޖާ ހަމަހަމަކޮށްފަ އެވެ.
ނަޕޯލީ އަށް ލީޑުނަގައިދޭން ނައިޖީރިއާގެ ފޯވާޑް ވިކްޓަ އޮސީމެން ޖެހި ބޯޅަ އަމާޒުވީ ގޯލުގެ ދަނޑިއަށެވެ. ދެ ވަނަ ހާފުގައި ޑްރީސް މާޓެންސް ޖެހި ހިލޭ ޖެހުން ވެސް އަމާޒުވީ ގޯލުގެ ދަނޑިއަށެވެ. ހެލަސް އިން މެޗު ނިންމާލީ ނުވަ ކުޅުންތެރިންނާ އެކު އެވެ. އެއީ ބަދަލެއްގެ ގޮތުގައި އެރި އެ ޓީމުގެ ޑެނިއަލް ބެސާ އާއި ނިކޯލަ ކަލިނިޗަށް ރަތް ކާޑު ދެއްކުމުންނެވެ.
