މެޑްރިޑް (ނޮވެމްބަރު 7) - ސްޕެނިޝް ލީގުގައި ރޭ ސެލްޓަ ވީގޯ އިން ފަހު ވަގުތު ލަނޑު ޖަހައި ބާސެލޯނާއާ 3-3 އިން އެއްވަރު ކުރިއިރު، އަމިއްލަ ދަނޑުގައި 2-1 އިން ރަޔޯ ވަޔެކާނޯ ބަލިކޮށް ރެއާލް މެޑްރިޑް އެއް ވަނަ އަށް ޖެހިލައިފި އެވެ.
ރެއާލް އެއް ވަަނަ އަށް އެރީ 12 މެޗުން 27 ޕޮއިންޓާ އެކު އެވެ. ދެ ވަނައިގައި އޮތް ރެއާލް ސޮސިއެޑާޑަށް ވަނީ 12 މެޗުން 25 ޕޮއިންޓް ލިބިފަ އެވެ. ތިން ވަނައިގައި ސެވިއްޔާ އޮތީ 11 މެޗުން 24 ޕޮއިންޓް ހޯދައިގެންނެވެ.
ސެލްޓަ ދަނޑުގައި ރޭ ކުޅުނު މެޗުގެ ފުރަތަަމަ 34 މިނިޓް ތެރޭ ބާސެލޯނާ އިން ތިން ގޯލު ޖެހި އެވެ. މެޗުގެ ފަސް ވަނަ މިނިޓްގައި ބާސެލޯނާ އަށް އޭރިއާތެރެއިން ޖެހި ގޯލަކުން ލީޑުނަގައިދިނީ އަންސޫ ފާޓީ އެވެ. މެޗުގެ 18 ވަނަ މިނިޓްގައި ބާސެލޯނާގެ ކެޕްޓަން ސާޖީ ބުސްކެޓްސް ބާސެލޯނާގެ ލީޑުފުޅާކޮށްދިން ގޯލު ޖެހީ އޭރިއާބޭރުންނެެވެ. އަދި 34 ވަނަ މިނިޓްގައި ޖޯޑީ އަލްބާ ނެގި ހުރަހަކުން މެމްފިސް ޑިޕާއި ބޮލުން ޖެހި ގޯލުން ބާސެލޯނާ އިން ތިން ވަނަ ގޯލެއް ޖެހި އެވެ.
ތިން ގޯލުގެ ލީޑަކާ އެކު ފުރަތަމަ ހާފު ނިންމާލި ނަމަވެސް ދެ ވަނަ ހާފު ފަށައިގެން ހަ މިނިޓް ތެރޭ ބާސެލޯނާގެ ކީިޕަރު ޓާ ސްޓެގެން ހެދި ގޯހެއްގެ ފައިދާނަގައި ސެލްޓަގެ ކެޕްޓަން އިއާގޯ އަސްޕާސް ވަނީ ގޯލެއް ޖަހައި އެ ޓީމަށް އުއްމީދެއް ހޯދައިދީފަ އެވެ.
މެޗުގެ 74 ވަނަ މިނިޓްގައި ނޮލީޓޯ ބޮލުން ޖެހި ގޯލުން ސެލްޓަ އިން ފަރަގު ކުޑަކުރިއިރު، އަސްޕާސް އެ ޓީމަށް އެއްވަރުކޮށްދިން ލަނޑު ޖެހީ އިތުރު ވަގުތުގެ ގޮތުގައި ދެއްކި ފަސް ވަނަ މިނިޓް ތެރޭގަ އެވެ.
މި ނަތީޖާއާ އެކު ބާސެލޯނާ އޮތީ 12 މެޗުން 17 ޕޮއިންޓާ އެކު 19 ވަނައިގަ އެވެ. އެންމެ ފަހުން ލީގުގައި ކުޅުނު ހަތަރު މެޗުން ވެސް ބާސެލޯނާ އަށް މޮޅެއް ނުލިބެ އެވެ. ލީގުގައި ދެން ބާސެލޯނާ ކުޅޭ މެޗުގައި އެ ޓީމަށް އިރުޝާދުދޭނީ ދާދި ފަހުން އެ ޓީމާ ހަވާލުވި ކޯޗު އަދި ކުރީގެ ކެޕްޓަން ޒަވީ ހެނާންޑޭޒް އެވެ.
ލީގުގައި ރޭ ރެއާލުން ވަނީ ފުރަތަމަ ހާފުގައި ޓޯނީ ކްރޫސް އާއި ކަރިމް ބެންޒެމާގެ ލަނޑުތަކުން ދެ ގޯލުގެ ލީޑެއް ނަގައިފަ އެވެ. ދެ ވަނަ ހާފުގައި ރަޑަމެލް ފަލްކާއޯ ވަނީ ރަޔޯ ވަޔެކާނޯ އަށް ގޯލެއް ޖަހައިދީފަ އެވެ. ވަޔެކާނޯ އިން ނަތީޖާ ހަމަހަމަ ކުރަން ފޮނުވާލި ބޯޅަތައް ރެއާލުން ވަނީ ހުއްޓުވައިފަ އެވެ.
