މެޑްރިޑް (ނޮވެމްބަރު 6) - މި ފަހަރުގެ ޓްރާންސްފާ މާކެޓްގައި ޕީއެސްޖީ އަށް ބަދަލުވި ލިއޮނަލް މެސީގެ އެ ނިންމުމާ އެކު އޭނާ ކުރިން ކުޅެމުން އައި ސްޕެއިނުގެ ބާސެލޯނާ އަށް 150 މިިލިއަން ޑޮލަރުގެ ގެއްލުމެއް ލިބުނު ކަމަށް ސްޕެއިނުގެ މީޑިއާ ރިޕޯޓްތައް ބުނެފި އެވެ.
ސްޕެއިނުގެ މަޝްހޫރު ނޫސް އެޖެންސީ އީއެފްއީ އިން އިއްޔެ ރިޕޯޓްކޮށްފައިވާ ގޮތުގައި މެސީ އަށް ބާސެލޯނާގެ ކޮންޓްރެކްޓް އާނުކުރެވުމުގެ ސަބަބުން އެ ކްލަބަށް ވަނީ 150 މިލިއަން ޑޮލަރުގެ އަގުހުރި ދެ ސްޕޮންސަޝިޕް ޑީލް ގެއްލިފަ އެވެ.
އެއީ 80 މިލިއަން ޑޮލަރުގެ ކްރިޕްޓޯ ކަރަންސީ ޑީލަކާއި އޮންލައިން އެޑިއުކޭޝަނަށް ހާއްސަ 70 މިލިއަން ޑޮލަރުގެ ޑީލެކެވެ.
މީގެ ތެރެއިން އޮންލައިން އެޑިއުކޭޝަން އަށް ހާއްސަ ޑީލަކީ އިންޑިއަން ސަބް ކޮންޓިނެންޓްގައި ގާއިމްކޮށް މުޅި ދުނިޔެ އަށް އޮންލައިންކޮށް ތައުލީމު ފޯރުކޮށްދޭން ބާސެލޯނާ އިން ގާއިމްކުރަން އުޅުނު ނެޓްވޯކެއްގެ މަސައްކަތް ކަމަށް އީއެފްއީ އިން ރިޕޯޓްކޮށްފައިވެ އެވެ.
މީގެ އިތުރުން ވެސް މެސީ ބާސެލޯނާ އިން ދިއުމުން ސްޕޮންސަރުން އަތުން ބާސެލޯނާ އަށް ލިބެން ޖެހޭ ފައިސާގެ އަދަދުތައް ޕަސެންޓުން ބަލާކަމުގައިވާނަމަ އެ އަށް ވަނީ ބޮޑު ވެއްޓުމެއް ކުރިމަތިވެފަ އެވެ.
އުމުރުން 13 އަހަރުގައި ބާސެލޯނާއާ ގުޅި، އެ ޓީމަށް ޔޫތު ލެވަލްގައި ކުޅެން ފެށި މެސީ، އެ ކްލަބް ދޫކޮށްލަން ޖެހުނީ 21 އަހަރަށް ފަހު ކުރިމަތިވި މަޖުބޫރީ ހާލަތެއްގަ އެވެ.
މެސީ ލައްވައި މި ފަހަރު އާ ކޮންޓްރެކްޓެއްގައި ސޮއިކުރަން ބާސެލޯނާ އިން ބެލިއިރު، އެންމެ ބޮޑު މައްސަލަ އަކަށް ދިމާވީ ބާސެލޯނާގެ ހުރިހާ ކުުޅުންތެރިިންގެ ޖުމްލަ މުސާރަ އިންތިހާ އަށް ބޮޑުވެފައިވުމެވެ. ލަލީގާގެ މުސާރަ އޮނިގަނޑަށް ފައްތައިގެން މެސީ މަޑުކުރެވޭނެ އެއްވެސް ގޮތެއް ނެތިގެން ބާސެލޯނާ އަށް ޖެހުނީ އޭނާ ދޫކޮށްލާށެވެ.
ދުނިޔޭގެ މޮޅު ކުޅުންތެރިޔާގެ މަގާމު ހަ ފަހަރެއްގެ މަތިން ހޯދާފައިވާ މެސީ ޕީއެސްޖީ އަށް ބަދަލުވީ ހިލޭ ޓްރާންސްފާއެއްގައި ތިން އަހަރުގެ ކޮންޓްރެކްޓެއްގަ އެވެ. މެސީ އަށް ޕީއެސްޖީން އަހަރަކު މުސާރައިގެ ގޮތުގައި 35 މިލިއަން ޑޮލަރު ލިބޭނެ އެވެ. ސޮއިކުރިއިރު ވެސް ބޯނަހެއްގެ ގޮތުގައި މެސީ އަށް 35 މިލިއަން ޑޮލަރު ދިނެވެ.
