ރާއްޖޭގެ ގައުމީ ފުޓްބޯޅަ ޓީމާ ހަވާލުވެ މިވީ ކުރު މުއްދަތުގެ ތެރޭގައި ކުރެވުނު މަސައްކަތާ މެދު ހިތްހަމަ ޖެހޭ ކަމަށާއި އެކަމަކު، ކުޑަ ވަގުތުކޮޅެއްގެ ތެރޭގައި ހުރިހާ ކަމެއް ބަދަލުކޮށްލަން އޭނާ އަކީ ޖާދޫ ހަދާ މީހެއް ނޫން ކަމަށް ގައުމީ ޓީމުގެ ކޯޗު އިޓަލީގެ ފްރެންޗެސްކޯ މޮރިއޭރޯ ބުނެފި އެވެ.
ގައުމީ ޓީމުގެ ކޯޗުކަމާ މިދިޔަ މަހު 21 ވަނަ ދުވަހު ހަވާލުވި މޮރިއޭރޯ، ރާއްޖެ ގޮވައިގެން ކުޅޭ ފުރަތަމަ މުބާރާތަކީ މި މަހު 8-17 އަށް ސްރީ ލަންކާގައި ބާއްވާ މަހިންދުރަ ރާޖަޕަކްސަަ ފޯ ނޭޝަންސް ކަޕް އެވެ.
ފޯ ނޭޝަންސް ކަޕުގައި ވާދަކުރަން ގައުމީ ޓީމުގެ ފުރުމުގެ ކުރިން މިިއަދު ގްރޭޓާ މާލެ ބަސް ޓާމިނަލުގައި ހުރެ މޮރިއޭރޯ ވަނީ މީޑިއާ އަށް އިންޓަވިއުއެއް ދީފަ އެވެ.
އިޓަލީ ގައުމީ ޓީމާއި އިންޓަ މިލާނަށް ކުރިން ކުޅުނު މޮރިއޭރޯ ބުނީ ގައުމީ ޓީމާ އެކު ޓްރެއިނިންތައް ފަށައި މިވީ ދުވަސްތަކުގައި ވަރަށް ރަނގަޅަށް މަސައްކަތް ކުރަމުން އަންނަ ކަމަށެވެ.
"ޓެކްޓިކަލް ކަންކަމާއި ފިޒިކަލް ކަންކަމަށް މި މަސައްކަތް ކުރަނީ. (އެހާ އަވަހަށް ހުރިހާ ކަމެއް ބަދަލުކޮށްލަން) އަހަންނަކީ ޖާދޫ ހަދާ މީހެއް ނޫން. އެކަމަކު، ވަރަށް މުހިއްމު ކަމެއް ފާހަގަކުރަން. އެއީ މި ޓީމު ވަރަށް ރަނގަޅަށް އަހަންނާ އެކު މި މަސައްކަތް ކުރަނީ. 100 ޕަސެންޓް އެބަދޭ މި ކުޅުންތެރިން އަހަންނަށް،" ހިތްހަމަ ޖެހިފައި ހުރެ މޮރިއޭރޯ ބުންޏެވެ.
މޮރިއޭރޯ ބުނީ އޭނާއާ ރާއްޖޭގެ ގައުމީ ޓީމުގެ ކޯޗުކަން ހަވާލުކުރަން ރާއްޖޭގެ ފުޓްބޯޅަ އެސޯސިއޭޝަން، އެފްއޭއެމުން ނިންމީ އޭނާގެ މަސައްކަތް ކަމުދާތީ ކަަން ޔަގީންވާ ކަމަށެވެ.
ގައުމީ ޓީމުގެ ކުޅުންތެރިންނާއި އޮފިޝަލުން ފޮޓޯ އަކަށް ހުއްޓިގެން.-- ފޮޓޯ: އާއިމް ޒަމީރު/ އަދަދު
"މި ޓީމުގެ ކޮންމެ ކުޅުންތެރިއަކު އަބަދު ވެސް ވިސްނަންވީ އިމްޕްރޫވް ކުރަން،" ކުޅުންތެރިންނަށް ދޭން އޮތް މެސެޖެއްގެ ގޮތުގައި މޮރިއޭރޯ ބުނީ މިހެންނެވެ.
ކޯޗިންގައި ވެސް މޮރިއޭރޯ އެންމެ ގިނައިން މަސައްކަތްކޮށްފައި ހުރީ އުފަން ގައުމު އިޓަލީގަ އެވެ. މޮރިއޭރޯ ބުނީ އޭނާ އައީ ފުޓްބޯޅައިގެ ތަފާތު ސަގާފަތެއްގެ ތެރެެއިން ކަމަށާއި މަސައްކަތް ކުރަނީ އޭނާގެ ވިސްނުމުގައި ހުރި ކަންތައްތައް އުނގަނައިދީގެން ދިވެހި ކުޅުންތެރިން ރަނގަޅު ކުރުމަށް ކަމަށެވެ.
"އަހަރެންގެ މި މެންޓަލިޓީ މި ކުޅުންތެރިންނަށް ފޯރުކޮށްދޭން ބޭނުމީ. މި މުބާރާތުން (ފޯ ނޭޝަންސް ކަޕް އިން) އަހަންނަށް އެނގޭނެ ކަމެއް އެއީ މި ވަގުތު އަހަރެމެންގެ މި ހުރި ލެވަލް،" އިޓަލީގެ އެކި ޑިވިޝަންތަކުގައި ކޯޗުކޮށްފައިވާ މޮރިއޭރޯ ބުންޏެވެ.
ހޮޓެލް ޖެންގައި ނައިބު ރައީސް ފައިސަލް ނަސީމް އާއި ޔޫތު މިނިސްޓްރީން ދާދި ފަހުން ބޭއްވި އިވެންޓްގައި ވާހަކަ ދައްކަމުން މޮރިއޭރޯ ވަނީ އޭނާގެ ޓާގެޓަކީ ފޯ ނޭޝަންސް ކަޕް ކާމިޔާބު ކުރުން ކަމަށް ބުނެފަ އެވެ. މޮރިއޭރޯ މިއަދު ބުނީ މުބާރާތުގައި ރަނގަޅު ނަތީޖާ ނެރުމުގެ އިތުރުން މި މުބާރާތުގައި ރާއްޖެ ވަރުގަދަ ޓީމަކަށް ވާން ވެސް މަސައްކަތް ކުރާނެ ކަމަށެވެ.
"އަހަރެމެން މި ކުޅެނީ ވަރުގަދަ ޓީމަކަށް ވާން. ހަގީގަތަކީ އަހަރެމެން އެބަޖެހޭ އިދިކޮޅު ޓީމަށް ވުރެ ބާރަށް ދުވަން. އަހަރެމެން އެބަޖެހޭ އޮފެންސާއި ޑިފެންސްގެ ބެލެންސް ވެސް ރަނގަޅު ކުރަން،" މޮރިއޭރޯ ބުންޏެވެ.
"މީގެ ކުރަން ޖެހޭނެ ކަމަކީ އިދިކޮޅު ޓީމަށް ވުރެ ބާރަށް ދުވެ މަސައްކަތްކޮށް އަބަދު ވެސް އިދިކޮޅު ޓީމަށް ވުރެ އިތުރަށް އެއް ގޯލު ޖަހަންވީ,"
މިދިޔަ މަހު 1-16 އަށް މާލޭގައި ބޭއްވި އުރީދޫ ސާފް ޗެމްޕިއަންޝިޕް ފުޓްބޯޅަ މުބާރާތަށް ނެގި ފައިނަލް ސްކޮޑަށް ބަލާއިރު، ފޯ ނޭޝަންސް ކަޕްގެ ފައިނަލް ސްކޮޑަށް އައިސްފައިވަނީ ދެ ބަދަލެކެވެ. އެއީ އަނިޔާގެ ސަބަބުން ގައުމީ ޓީމާ ވަކިވާން ޖެހުނު އެއް ވަނަ ކީޕަރު މުހައްމަދު ފައިސަލް އާއި އާއިލީ ސަބަބެއްގައި ޓީމާ ދުުރުގައި މި ވަގުތު ހުރި ފުލްބެކް މޫސާ ޔާމީން (ޔާމްބެ)ގެ ބަދަލުގައި ކީޕަރު ޔޫސުފާއި މުލަކޭ ހިމެނުމެވެ. މިއަދު ގައުމީ ޓީމު ފުރިއިރު، ކެޕްޓަން އަކުރަމް އަބްދުލް ގަނީ (އަކޫ) ވެސް ޓީމާ އެކު ނުދާނެ އެވެ. އާއިލީ ކަމެއްގައި މާލޭގައި މަޑުކުރުމަށް ފަހު އަކޫ ފަހުން ޓީމާ ގުޅޭނެ އެވެ.
ލަންކާ މުބާރާތުގައި އަންނަ ހަފްތާގެ ހޯމަ ދުވަހުގެރޭ ރާއްޖެ ކުޅޭނީ ލަންކާއާ އެވެ. ދެ ވަނަ މެޗުގައި 11 ވަނަ ދުވަހު ބަންގްލަދޭޝްއާ ބައްދަލުކުރާނެ އެވެ. އަދި ތިން ވަނަ މެޗުގައި ސީޝެލްސްއާ ކުޅޭނީ މި މަހު 14 ވަނަ ދުވަހު އެވެ. ފައިނަލަށް ގޮސްފިނަމަ އެ މެޗު އޮންނާނީ މި މަހު 17 ވަނަ ދުވަހު އެވެ.
ރާއްޖޭން ވަނީ 2012 ވަނަ އަހަރު ލަންކާގައި ބޭއްވި މަހިންދުރަ ރާޖަޕަކްސަ މުބާރާތް ކާމިޔާބު ކޮށްފަ އެވެ. އެ ފަހަރުގެ މުބާރާތް ބޭއްވީ 23 އަހަރުން ދަށަށް ހާއްސަކޮށްގެންނެވެ.
