މިއުނިކް (ނޮވެމްބަރު 3) - ޔުއެފާ ޗެމްޕިއަންސް ލީގުގައި މިރޭ ރޮބަޓް ލެވަންޑޯސްކީގެ ހެޓްރިކާ އެކު ބަޔާން މިއުނިކުން 5-2 އިން ބެންފީކާ ބަލިކޮށް އަނެއް ބުރުގެ ޖާގައެއް ކަށަވަރުކުރިއިރު، ފަހު ވަގުތު ކްރިސްޓިއާނޯ ރޮނާލްޑޯ ޖެހި ގޯލުން އެޓަލަންޓާއާ 2-2 އިން އެއްވަރުކޮށް، މެންޗެސްޓާ ޔުނައިޓެޑް ބަލިނުވެ ސަލާމަތްވެއްޖެ އެވެ.
ލެވަންޑޯސްކީ ޗެމްޕިއަންސް ލީގުގައި ކުޅުނު 100 ވަނަ މެޗުގައި އޭނާ ހެދި ހެޓްރިކާ އެކު ބަޔާން މޮޅުވިއިރު، އެ ޓީމު އޮތީ ސައްތަ އިން ސައްތަ ރެކޯޑަކާ އެކު ކުޅުނު ހަތަރު މެޗުން މޮޅުވެ 12 ޕޮއިންޓާ އެކު ގްރޫޕް އީގެ އެއް ވަނައިގަ އެވެ.
އެ ގްރޫޕްގެ ދެ ވަަނައިގައި އޮތީ މިރޭ ޑިނަމޯ ކިއޭވް އަތުން ޒުވާން ފޯވާޑް، އަންސޫ ފަޓީގެ ގޯލުން 1-0 މޮޅުވި ބާސެލޯނާ އެެވެ. ބާސެލޯނާ އަށް ހަތަރު މެޗުން ހަ ޕޮއިންޓް ލިބިފައިވާއިރު، ތިނެއްގައި ބެންފީކާ އޮތީ ހަތަރު މެޗުން ފަސް ޕޮއިންޓާ އެކު އެވެ. ފުލުގައި އޮތް ޑިނަމޯ އަށް ވަނީ ހަަތަރު މެޗުން އެއް ޕޮއިންޓް ލިބިފަ އެވެ.
ބެންފީކާ ކޮޅަށް ހެދި ހެޓްރިކާ އެކު ލެވަންޑޯސްކީ ވަނީ ޗެމްޕިއަންސް ލީގުގައި 100 މެޗުން 81 ގޯލު ޖަހައިފަ އެވެ. މިއީ އޭނާގެ ކެރިއަރުގެ 28 ވަނަ ހެޓްރިކެވެ. އޭގެ ތެރެއިން ހަތަރު ހެޓްރިކް ހެދީ ޗެމްޕިއަންސް ލީގުގަ އެވެ.
ލަނޑު ޖެހުމަށް ފަހު ލެވަންޑޯސްކީ އުފާފާޅުކުރަނީ.-- ފޮޓޯ: އޭއެފްޕީ
ބަޔާންގެ ކޯޗު ހޫލިއަން ނާގަލްސްމަން ކޮވިޑުން ރަނގަޅުވެގެން އެނބުރި އައި މި މެޗުގައި އެ ޓީމުގެ އަނެއް ދެ ގޯލު ޖެހީ ސާޖް ގްނަބްރީ އާއި ލެރޯއި ސާނޭ އެވެ. ބެންފީކާގެ ގޯލުތައް ޖެހީ މޮރާޓޯ އާއި އުރުގުއޭގެ ފޯވާޑް ޑާވިން ނޫނޭޒް އެވެ.
އެޓަލަންޓާގެ ދަނޑުގައި ޔޯސިފް އިލިޗިޗްގެ ގޯލުން އެ ޓީމު ލީޑުނަގާފައިވަނިކޮށް ރޮނާލްޑޯ ވަނީ ފުރަތަމަ ހާފުގެ އިތުރު ވަގުތުގައި ޔުނައިޓެޑަށް ފުރަތަމަ ފަހަރަށް އެއްވަރުކޮށްދީފަ އެވެ. ދެ ވަނަ ހާފުގައި ޑުވާން ޒަޕާޓާ ވަނީ މެޗުގައި ދެ ވަނަ ފަހަރަށް އެޓަލަންޓާ އަށް ލީޑުނަގައިދީފަ އެވެ. އެކަމަކު، މެޗުގެ އިތުރު ވަގުތުގައި ރޮނާލްޑޯ ވަނީ މެޗުގެ އިތުރު ވަގުތުގައި ދެ ވަނަ ގޯލެއް ޖަހައި އަނެއްކާ ވެސް ނަތީޖާ ހަމަހަމަކޮށްފަ އެވެ.
ގްރޫޕް އެފްގެ އެއް ވަނައިގައި ޔުނައިޓެޑް އޮތީ ދެ ވަނައިގައި އޮތް ވިޔަރެއާލާ އެއްވަރަށް ހަތަރު މެޗުން ހަތް ޕޮއިންޓް ހޯދައިގެންނެވެ. ވިޔަރެއާލް މިރޭ 2-0 އިން ޔަންގް ބޯއީސް ބަލިކުރި ނަމަވެސް ހެޑް ޓު ހެޑް ގަވާއިދުން ކުރި ލިބެނީ ޔުނައިޓެޑަށެވެ. އެޓަލަންޓާ ތިން ވަނައިގައި އޮތީ ހަތަރު މެޗުން ފަސް ޕޮއިންޓާ އެކު އެވެ. އެންމެ ފުލުގައި އޮތް ޔަންގް ބޯއީސް އަށް ވެސް ވަނީ ތިން ޕޮއިންޓް ލިބިފަ އެވެ.
ސްވިޑެންގެ މަލްމޯ ދަނޑުގައި އެންމެ ފަހުގެ ޗެމްޕިއަން ޗެލްސީ 1-0 އިން މޮޅުވިއިރު، އެ ޓީމުގެ ހަމައެކަނި ގޯލު ދެ ވަނަ ހާފުގައި ޖެހީ މޮރޮކޯގެ ވިންގް ހަކީމް ޒިޔެޗް އެވެ. މި ގްރޫޕްގެ އަނެއް މެޗުގައި އިޓަލީގެ ޔުވެންޓަސް ވަނީ ރަޝިއާގެ ޒެނިޓް ޕީޓާސްބާގް އަތުން 4-2 އިން މޮޅުވެފަ އެވެ.
ޔުވެންޓަސްގެ ޕައޮލޯ ޑިބާލާ އެ ޓީމަށް ލީޑުނަގައިދީފައިވަނިކޮށް ލިއޮނާޑޯ ބޮނޫޗީ ބައިކޮޅަށް ޖެހި ގޯލުން ޒެނިޓުން އެއްވަރުކުރި އެވެ. ޑިބާލާގެ ޕެނަލްޓީ އާއި ފެޑެރީކޯ ކިއޭސާ އަދި އަލްވާރޯ މޮރާާޓާ ޖެހި ގޯލުތަކުން ޔުވެންޓަސް ލީޑުފުޅާކޮށްފައި ވަނިކޮށް ޒެނިޓްގެ ދެ ވަނަ ގޯލު ޖެހީ އިތުރު ވަގުތުގައި އީރާންގެ ފޯވާޑް ސަރްދާރް އަޒްމޫން އެވެ.
ގްރޫޕް އެޗްގެ އެއް ވަނައިގައި އޮތް ޔުވެންޓަސް އަށް ހަަތަރު މެޗުން 12 ޕޮއިންޓް ލިބިފައިވާއިރު، އެ ޓީމު ވަނީ އަނެއް ބުރުން ފުރުސަތު ހޯދައިފަ އެވެ. ދެ ވަނައިގައި އޮތް ޗެލްސީ އަށް ހަަތަރު މެޗުން ނުވަ ޕޮއިންޓް ލިބިފައިވާއިރު، ތިން ވަނައިގައި އޮތް ޒެނިޓް އަށް ވަނީ ހަތަރު މެޗުން ތިން ޕޮއިންޓް ލިބިފަ އެވެ. އެންމެ ފުލުގައި އޮތް މަލްމޯ އަށް އަދި ޕޮއިންޓެއް ނުލިބެ އެވެ.
މިރޭ ޖަރުމަނުގެ ވުލްފްސްބާގް އަތުން 2-1 އިން ބަލިވި ނަމަވެސް އޮސްޓްރިއާގެ އާރްބީ ސަލްޒްބާގް އޮތީ ގްރޫޕް ޖީގެ އެއް ވަނައިގަ އެވެ. އެއީ ހަތަރު މެޗުން ހަތް ޕޮއިންޓާ އެކު އެވެ. ދެ ވަނައިގައި އޮތީ މިރޭ ސްޕެއިންގެ ސެވިއްޔާ އަތުން 2-1 އިން މޮޅުވި ފްރާންސްގެ ޗެމްޕިއަން ލިލް އެވެ.
ދެ ވަނައިގައި އޮތް ލިލް އާއި ތިން ވަނައިގައި އޮތް ވުލްފްސްބާގަށް ވަނީ ހަތަރު މެޗުން ފަސް ޕޮއިންޓް ލިބިފަ އެވެ. ސެވިއްޔާ އެންމެ ފުލުގައި އޮތީ ހަތަރު މެޗުން ތިން ޕޮއިންޓާ އެކު އެވެ.
