ދުބާއީ (ނޮވެމްބަރު 2) - ކުޅުނު ހަތަރު ވަނަ މެޗުން މިރޭ ނަމީބިއާ އަތުން 45 ލަނޑުން މޮޅުވެ، ޓީ20 ކްރިކެޓް ވޯލްޑް ކަޕްގައި މި ފަަހަރު ތަފާތު ފޯމެއްގައި އޮތް ޕާކިސްތާން މުބާރާތުގެ ސެމީ ފައިނަލުގެ ޖާގައެއް ކަށަވަރުކޮށްފި އެވެ.
ޕާކިސްތާން ކުޅުނު ފުރަތަމަ މެޗުން ވަނީ އިންޑިއާ އަތުން 10 ވިކެޓުން މޮޅުވެފަ އެވެ. ދެ ވަނަ މެޗުގައި ނިއު ޒީލެންޑް އަތުން ފަސް ވިކެޓުން މޮޅުވިއިރު، ތިން ވަނަ މެޗުން އަފްގާނިސްތާން އަތުން ވެސް މޮޅުވީ ފަސް ވިކެޓުންނެވެ. މިރޭ ނަމީބިއާގެ މައްޗަށް ފަސޭހަކަމާ އެކު ކުރިހޯދިއިރު، ޕާކިސްތާނުން ސެމީގެ ޖާގަ ޔަގީންކުރީ ބާކީ އެއް މެޗު އޮއްވަ އެވެ.
މިއީ ޕާކިސްތާނުން ޓީ20 ވޯލްޑް ކަޕްގެ ސެމީގައި ކުޅޭ ފަސް ވަނަ ފަހަރެވެ. އެ ޓީމަކީ މި މުބާރާތުގެ ތާރީހުގައި އެންމެ ގިނަ ސެމީ ފައިނަލުގައި ކުޅުނު ޓީމެވެ. އެ ޓީމުން ވަނީ 2009 ވަނަ އަހަރުގެ މުބާރާތުގެ ޗެމްޕިއަންކަން ވެސް ހޯދައިފަ އެވެ.
ގްރޫޕް ދޭއްގެ އެއް ވަނައިގައި ޕާކިސްތާން އޮތީ ހަަތަރު މެޗުން އަށް ޕޮއިންޓާ އެކު އެވެ. ޕާކިސްތާން ސެމީގެ ޖާގަ ކަށަވަރުކުރުމާ އެކު މި ގްރޫޕުން ދެން ސެމީގެ ޖާގަ ހޯދުމުގެ ފޯރިގަދަވާނެ އެވެ.
މި ގްރޫޕްގެ ދެ ވަނައިގައި މި ވަގުތު އޮތީ ތިން މެޗުން ހަތަރު ޕޮއިންޓާ އެކު އަފްގާނިސްތާން އެވެ. ތިން ވަނައިގައި އޮތް ނިއު ޒީލެންޑާއި ހަތަރެއްގައި އޮތް ނަމީބިއާ އަށް ވަނީ ދެ ޕޮއިންޓް ލިބިފަ އެވެ. މީގެ ތެރެއިން ނަމީބިއާ ތިން މެޗު ކުޅުނުއިރު، ނިއު ޒީލެންޑް ކުޅުނީ ދެ މެޗެެވެ.
މުބާރާތުގެ ފޭވަރިޓެއްގެ ގޮތުގައި ނުކުތް އިންޑިއާ އޮތީ ފަސް ވަނައިގަ އެވެ. އަދި ހަ ވަނައިގައި އޮތީ ސްކޮޓްލެންޑެވެ. މި ދެ ޓީމުން ވެސް ދެ މެޗު ކުޅުނުއިރު، ޕޮއިންޓެއް ނުލިބެ އެވެ. އިންޑިއާ އަށް ސެމީގެ ޖާގަ ލިބޭނީ ދެން އޮތް ތިން މެޗުން މޮޅުވެގެންނެވެ.
ދުބާއީ އިންޓަނޭޝަނަލް ކްރިކެޓް ސްޓޭޑިއަމްގައި މިރޭ ކުޅުނު މެޗުގައި ޓޮސް ދިމާވުމުން ޕާކިސްތާނުން ނިންމީ ބެޓްކުރާށެވެ. މިރޭ ވެސް ތަފާތު ދެއްކީ މުހައްމަދު ރިޒްވާން އާއި ބާބަރު އާޒަމްގެ ޕާޓްނަޝިޕުންނެވެ.
ރިޒްވާން ނުބައިނުވެ 50 ބޯޅައިން 79 ލަނޑު ހެދިއިރު، ހަތަރަކަށް އަށް ފަހަރު އަދި ހަޔަކަށް ހަތަރު ފަހަރު ޖެހި އެވެ. ޕާކިސްތާން ލީޑުކުރުމުގައި ރަނގަޅު ކުޅުމެއް ދައްކަމުން އަންނަ ބާބަރު ވަނީ 49 ބޯޅައިން 70 ލަނޑު ހަދައިފަ އެވެ. ޕާކިސްތާނުން ވަނީ 20 އޯވަރު ހަމަވިއިރު، ދެ ކުޅުންތެރިން ނުބައިވެގެން 189 ލަނޑު އެއްކޮށްފަ އެވެ.
ޖަވާބުގައި ނަމީބިއާ އިން ކުޅެންއަރައި 20 އޯވަރު ހަމަވިއިރު، ފަސް ކުޅުންތެރިން ނުބައިވެގެން ހެދުނީ 144 ލަނޑެވެ. އެ ޓީމުން އެންމެ ރަނގަޅަށް ކުޅުނީ ނުބައި ނުވެ، 31 ބޯޅައިން 43 ލަނޑު ހެދި ޑޭވިޑް ވެއިސް އެވެ.
ޕާކިސްތާނުގެ އުކުންތެރިންގެ ފަރާތުން ރަނގަޅު ބޯޅަތަކެއް ފެނުނު މި މެޗުގައި ނަމީބިއާ ބެޓްސްމަނުންނަށް އެންމެ ރަނގަޅަށް ފޮނުވާނުލެވި މެޗުން ބަލިވީ އެވެ. ޕާކިސްތާނުން ގްރޫޕްގައި ކުޅޭ ފަހު މެޗުގައި އާދިއްތަ ދުވަހު ސްކޮޓްލެންޑާ ބައްދަލުކުރާނެ އެވެ.
