މި މަހު 7-18 އަށް ސްޜީ ލަންކާގައި ބާއްވާ މަހިންދުރަ ރާޖަޕަކްސަ ފޯ ނޭޝަންސް ކަޕަށް ރާއްޖޭގެ ގައުމީ ފުޓްބޯޅަ ޓީމުން ކުރިމަތިލާނީ މުބާރާތް ކާމިޔާބުކުރުމުގެ ޓާގެޓާ އެކުގައި ކަމަށް ގައުމީ ޓީމާ ދާދި ފަހުން ހަވާލުވި އިޓަލީގެ ކޯޗު ފްރެންޗެސްކޯ މޮރިއޭރޯ ބުނެފި އެވެ.
ލަންކާ އާއި ރާއްޖޭގެ އިތުރުން ދެން ފޯ ނޭޝަންސް ކަޕްގައި އޮތީ ބަންގްލަދޭޝް އާއި ސީޝެލްސް އެވެ.
އިޓަލީ ގައުމީ ޓީމާއި އިންޓަ މިލާނަށް ކުރިން ކުޅުނު މޮރިއޭރޯ މިހެން ބުނީ މިއަދު މެންދުރު ފަހު ހޮޓެލް ޖެންގައި ބޭއްވި އިވެންޓެއްގައި ވާހަކަ ދައްކަމުންނެވެ. މިއީ ޔޫތު މިނިސްޓްރީގެ އިސް ވެރިންނާއި ނައިބު ރައީސް ފައިސަލް ނަސީމް ބައިވެރިވެވަޑައިގެން ގައުމީ ޓީމަށް ހިތްވަރު ދެއްވުމަށް ބޭއްވި އިވެންޓެކެވެ.
މީގެ 12 ވަަރަކަށް ދުވަސް ކުރިން ރަސްމީކޮށް ގައުމީ ޓީމާ ހަވާލުވި މޮރިއޭރޯ މިއަދުގެ އިވެންޓްގައި ވާހަކަ ދައްކަމުން ބުނީ އޭނާ ރާއްޖެ އައިސް ގައުމީ ޓީމާ ހަވާލުވެ، މިހާތަނަށް ކުރެވުނު މަސައްކަތަށް ބަލާއިރު، ހުރިހާ ކަމެއް ކުރިއަށްގޮސްފައިވަނީ ވަރަށް އެކުވެރި މާހައުލެއްގައި ކަމަށެވެ. އަދި އެކަމަށްޓަކައި އެންމެނަށް މޮރިއޭރޯ ވަނީ ޝުކުރު އަދާކޮށްފަ އެވެ.
މޮރިއޭރޯ ރާއްޖެ ގޮވައިގެން ފުރަތަމަ ނުކުންނަ މުބާރާތަކީ ލަންކާގައި އަންނަ ހަފްތާގައި ފަށާ ފޯ ނޭޝަންސް ކަޕް އެވެ. މޮރިއޭރޯ ގައުމީ ޓީމުގެ ބެންޗުގައި ހުރެ ކުރިމަތިލި ފުރަތަމަ މެޗަކީ ކުރެއްދޫ ޓީމާ ދެކޮޅަށް ކުޅުނު އެގްޒިބިޝަން މެޗުގަ އެވެ. އެ މެޗުން ރާއްޖެ މޮޅުވީ 7-1 އިންނެވެ.
މިއަދު ޖެންގައި ބޭއްވި އިވެންޓްގެ ތެރެއިން މޮރިއޭރޯ.-- ފޮޓޯ: ހުސެއިން ޝަޔާހު/ އަދަދު
މޮރިއޭރޯ މިއަދު ބުނީ ކުޅުންތެރިންގެ ރޫހަށް ބަލާއިރު، ޓާގެޓަކީ ކުރިއަށް އޮތް ފޯ ނޭޝަންސް ކަޕް ކާމިޔާބު ކުރުން ކަމަށެވެ.
"އެ މީހުން (ކުޅުންތެރިން) ވެސް ބޭނުންވަނީ އަހަރެން މި ވިސްނާގޮތަށް ވަރަށް ބޮޑު ގޯލުތަކެއް (ޓާގެޓްތަކެއް) ހާސިލްކުރަން. މިތަނުގައި (ރާއްޖޭގައި) އަހަރެން ކުރާ ކޮންމެ މަސައްކަތެއްގައި 100 ޕަސެންޓް ފޯކަސް އަކީ ރާއްޖޭގެ ފުޓްބޯޅަ މިހާރަށް ވުރެ މައްޗަށް ގެންދިއުން. ކުރިއަށް އޮތް މުބާރާތަށް (ލަންކާ އަށް) އަހަރެމެން މިދަނީ މުބާރާތް ކާމިޔާބު ކުރުމުގެ އަމާޒުގައި،" މޮރިއޭރޯ ބުންޏެވެ.
މިހާތަނަށް ފެނުނު މަންޒަރަށް ބަލާއިރު، ރާއްޖޭގެ ފުޓްބޯޅައިގެ މާހައުލާ މެދު ވަރަށް ބޮޑަށް ހިތްހަމަޖެހޭކަމަށް މޮރިއޭރޯ ވަނީ ބުނެފަ އެވެ. އަދި އޭގެ އަލީގައި އޭނާ އަށް ވެސް ރާއްޖޭގައި ރަނގަޅު މަސައްކަތްތަކެއް ކުރެވޭނެ ކަމުގެ އުއްމީދު އެބައޮތް ކަމަށް މޮރިއޭރޯ ބުންޏެވެ.
"އަހަރެމެން ކުޅުންތެރިންގެ ވެސް ވިސްނުމަކަށް ވާން ޖެހޭނީ ޓީމުގެ ޖޯޒީ އަށް އިހުތިރާމްކޮށް ދެން އަންނަން އޮތް ޖީލަށް ރީތި މިސާލެއް ދެއްކޭނެ ފަދަ ކާމިޔާބު ހޯދުން. އެ މީހުންނަށް ދައްކައިދޭން ޖެހޭނެ މި ޓީމަށް (ގައުމީ ޓީމަށް) ސަޕޯޓް ކޮށްދޭން ޖެހޭ ފަދަ ހިތްވަރެއް،" މޮރިއޭރޯ ބުންޏެވެ.
ލަންކާ މުބާރާތަށް ގައުމީ ޓީމު ފުރާގޮތަށް މި ވަގުތު ހަމަޖެހިފައި އޮތީ އަންނަ ބުރާސްފަތި ދުވަހު އެވެ.
ފޯ ނޭޝަންސް ކަޕްގައި ރާއްޖޭގެ ޓީމުން ފުރަތަމަ މެޗުގައި އަށް ވަނަ ދުވަހުގެރޭ ލަންކާއާ ދެކޮޅަށް ކުޅުމަށް ފަހު 11 ވަނަ ދުވަހު ހަވީރު ބަންގްލަދޭޝްއާ ބައްދަލުކުރާނެ އެވެ. އަދި ލީގު ބުރުގެ ފަހު މެޗުގައި ސީޝެލްސްއާ ކުޅޭނީ 14 ވަނަ ދުވަހު އެވެ. ފައިނަލަށް ގޮސްފިނަމަ އެ މެޗު އޮންނާނީ މި މަހު 17 ވަނަ ދުވަހުގެރޭގަ އެވެ.
