ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާއި ވޮލީބޯލް އެސޯސިއޭޝަން (ވީއޭއެމް) އަދި ޕޮލިސް ކްލަބް ގުޅިގެން މައި ހުޅުމާލެ ވޮލީބޯލް ކޭމްޕްގެ ނަމުގައި ކުޑަކުދިންނަށް ހާއްސަ ކޭމްޕެއް ބާއްވަން ނިންމައިފި އެވެ.
މި ކޭމްޕަކީ ވޮލީ ކުޅެން ޝައުގުވެރިކަން ހުންނަ ކުދިންނަށް ހާއްސަ ކޮށްގެން ހުޅުމާލޭގައި ބާއްވަން ނިންމާފައިވާ ކޭމްޕެކެވެ. އަންނަ މަހު (ނޮވެމްބަރު) 11 އިން 18 އަށް ހުޅުމާލޭގައި ކުރިއަށް ގެންދަން ނިންމާފައިވާ ކޭމްޕަގައި ވޮލީގެ ބޭސިކްގެ މުހިއްމު ކަންތައްތައް ކިޔައިދިނުމާއި ވޮލީގައި ދަސްކުރަން ޖެހޭ މުހިއްމު ކަންތައްތައް އުނގަނައިދީ ވޮލީގައި ކުރިއަށްދާއިރު ބޭނުންހިފޭނެ މުހިއްމު ކަންކަން ވެސް އޮޅުންފިލުވައިދޭނެ އެވެ.
ކޭމްޕުގައި ބައިވެރިވުމަށް ވަނީ އުމުރުފުރާ ކެޓަގަރީއެއް ހަމަޖައްސައިފަ އެވެ. އެ ގޮތުން މި ކޭމްޕް ހާއްސަކޮށްފައި އޮތީ އުމުރުން 12 އަހަރާއި 15 އަހަރާ ދެމެދަށެވެ.
ކޭމްޕުގައި ބައިވެރިވުމުގެ ފުރުސަތު ދޭން ނިންމާފައި އޮތީ ޖުމުލަ އެއްކޮށް ދެ ޖިންސު އެއްކޮށްލައިގެން 80 ކުދިންނަށެވެ. އެއީ ފޯމު ހުށަހަޅާ ތަރުތީބުން އެންމެ ކުރިން ފޯމު ހުށަހަޅާ 40 އަންހެން އަދި 40 ފިރިހެން ކުދިންނަށެވެ. މިއީ މި ގޮތަށް ހުޅުވާލެވިގެން މި ފަހުން ބޭއްވޭނެ އެންމެ ބޮޑު ވޮލީ ކޭމްޕް އެވެ.
އެޗްޑީސީން ނިންމާފައި އޮތީ ފެސްޓިވަލެއްގެ ގޮތުގައި ވަރަށް ކުލަގަދަކޮށް ގިނަ ހަރަކާތްތަކެއް ހިމެނޭ ގޮތަށް މި ކޭމްޕު ނިންމާލުމަށެވެ. އަދި އޭގެ ތެރެއިން އެއް ދުވަހުގެ މުބާރާތެއް ބޭއްވުމަށް ވެސް ވަނީ ނިންމައިފަ އެވެ.
ރާއްޖޭގެ ވޮލީބޯލް އެސޯސިއޭޝަންއާ ގުޅިގެން މި ކޭމްޕް ކުރިއަށްގެންދާއިރު، މީގެ ކުރިން ވެސް އެޗްޑީސީން ވަނީ ވީއޭއެމާ ގުޅިގެން ހުޅުމާލޭގައި މުބާރާތްތަކެއް ކުރިއަށް ގެންގޮސްފަ އެވެ.
ކޭމްޕްގައި ބައިވެރިވެވޭނީ ކިހިނެއް؟
ކޭމްޕުގައި ބައިވެރިވުމުގެ ފޯމު ހުޅުމާލޭ އެޗްޑީސީ އޮފީހުގެ ރިސެޕްޝަނުން ބަލައިގަންނާނެ އެވެ. އަދި އެޗްޑީސީން ވަނީ އޮންލައިން ލިންކް މެދުވެރިކޮށް ވެސް ފޯމު ހުށަހެޅޭނެ އިންތިޒާމް ހަމަޖައްސައިފަ އެވެ.
ކޭމްޕުގައި ބައިވެރިވުމުގެ މުއްދަތު ހަމަވާނީ އަންނަ މަހު (ނޮވެމްބަރު) ހަތް ވަނަ ދުވަހު އެވެ. އެ ދުވަހު 15:00 ގައި ފޯމު ހުށަހެޅުމުގެ ސުންގަނޑި ހަމަވާނެ އެވެ.
މައި ހުޅުމާލެ ވޮލީބޯލް ކޭމްޕްގައި ބައިވެރިވާން އެދޭ ފޯމު: ފޯމުގެ ލިންކް
