ނޭޕްލްސް (އޮކްޓޫބަރު 29) - އިޓާލިއަން ލީގުގައި ރޭ ލޮރެންޒޯ އިންސީނިއޭގެ ދެ ގޯލާ އެކު 3-0 އިން ބޮލޯނިއާ ބަލިކޮށް ނަޕޯލީ ލީގުގެ އެއް ވަަނަ މަގާމަށް ޖެހިލައިފި އެވެ.
ރޭގެ މެޗަށް ނަޕޯލީ ނުކުތްއިރު އެ ޓީމު ދެ ވަނައިގައި އޮތީ މި ހަފްތާގައި އޭސީ މިލާން ކުޅުނު މެޗުން މޮޅުވެފައި އޮތުމުންނެވެ. ރޭގެ ނަތީޖާ އަށް ފަހު ނަޕޯލީ އާއި މިލާނަށް ވެސް ލިބިފައިވަނީ 10 މެޗުން 28 ޕޮއިންޓެވެ. ނަޕޯލީ އަށް ކުރި ލިބެނީ ލަނޑުގެ ތަފާތުންނެވެ.
ނޭޕްލްސްގެ މަރަޑޯނާ ސްޓޭޑިއަމްގައި ރޭ ކުޅުނު މެޗު ފަށައިގެން ނަޕޯލީގެ ވިކްޓަ އޮސީމެން ހުސްކޮށްލާފައި ދިން ބޯޅައަކުން އިންސީނިއޭ ޖެހި ބޯޅަ ގޯލަށް ވަންނަން ދަނިކޮށް ހުއްޓުވީ ބޮލޯނިއާގެ ޑިފެންޑަރު ގެރީ މެޑަލް އެވެ.
ނަޕޯލީ އަށް ލީޑުނަގައިިދިނީ މެޗުގެ 19 މިނިޓްގައި ސްޕެއިންގެ މިޑްފީލްޑަރު ފަބިއާން ރުއީޒް އެވެ. އެލްޔިފް އެލްމާސް ދިން ބޯޅަ ކޮންޓްރޯލް ކޮށްލުމަށް ފަހު އޭރިއާބޭރުން ރުއީޒް ޖެހި ބޯޅަ އަމާޒުވީ ގޯލުގެ މަތީ ކަނަށެވެ.
މެޗުގެ 41 ވަނަ މިނިޓްގައި އިންސީނިއޭ ވަނީ ޕެނަލްޓީ އަކުން ނަޕޯލީގެ ލީޑުފުޅާކޮށްދީފަ އެވެ. މިއީ އޭރިއާތެރެއިން ބޮލޯނިއާގެ ކުޅުންތެރިއަކު ބޯޅައިގައި އަތްލުމުން ރެފްރީ ދިން ޕެނަލްޓީ އެކެވެ. ބޮލޯނިއާގެ ކުޅުންތެރިއަކު ބޯޅައިގައި އަތްލީ ނަޕޯލީގެ އޮސީމެން ބޮލުން ޖަހަން އެރި ވަގުތު އެވެެ.
ދެ ވަނަ ހާފްގެ ކުޅުން ފަށައިގެން ނަޕޯލީގެ ތިން ވަނަ ގޯލު ޖަހައިދޭން އޮސީމެން ޖެހި ބޯޅަ ދިޔައީ ދަނޑިކައިރިން ބޭރުންނެވެ. މެޗުގެ 62 ވަނަ މިނިޓްގައި ބޮލޯނިއާ ކުޅުންތެރިއަކު އޭރިއާތެރެއިން އޮސީމެން އަށް ކުރި ފައުލަކަށް ދިން ޕެނަލްޓީ ކާމިޔާބުކޮށް އިންސީނިއޭ ވަނީ ނަޕޯލީގެ ތިން ވަނަ ގޯލު ޖަހައިފަ އެވެ.
ނަޕޯލީ އަށް ހަތަރު ވަނަ ގޯލެއް ޖަހައިދޭން ޒަމްބޯ އަންގީސާ އޭރިއާބޭރުން ޖެހި ބާރު ބޯޅަ ބޭރުވީ ހުރަސްދަނޑީގައި ޖެހިފަ އެވެ. ކުރިން ފުލަމް އަށް ކުޅުނު އަންގީސާ މި ސީޒަނުގައި ނަޕޯލީ އަށް ކުޅެނީ ލޯން އެއްބަސްވުމެއްގެ ދަށުންނެވެ.
