އުރީދޫ ސާފް ޗެމްޕިއަންޝިޕްގައި ބަންގްލަދޭޝްގެ ކޯޗުކަން ކުރި ސްޕެއިންގެ އޮސްކާ ބްރުޒޮން، ބަންގްލަދޭޝް ޓީމާ އެކު ކުރިއަށްދާން ލިބުނު ފުރުސަތު ދޫކޮށްލުމުން، އަންނަ މަހު ސްރީ ލަންކާގައި ބާއްވާ ފޯ ނޭޝަންސް ކަޕްގައި ބަންގްލަދޭޝް ޓީމަށް ކޯޗުކޮށްދިނުމުގެ ފުރުސަތު ޕޯޗުގީސް ކޯޗު މާރިއޯ ލެމޯސް އަށް ދީފި އެވެ.
ބަންގްލަދޭޝް ގައުމީ ފުޓްބޯޅަ ޓީމުގެ ކޯޗުކަމުން ޖެމީ ޑޭ ވަގުތީ ގޮތުން ދުރުކޮށް އެ ގައުމުގެ ޗެމްޕިއަން ކްލަބް، ބަންޝުންދުރާ ކިންގްސްގެ ކޯޗު އަދި ނިއު ރޭޑިއަންޓް ގޮވައިގެން ދިވެހި ފުޓްބޯޅައިގައި ބޮޑެތި ކާމިޔާބީތަކެއް ހޯދާފައިވާ އޮސްކާ ވަނީ ސާފަށް ބަންގްލަދޭޝާ ހަވާލުވެ، ރަނގަޅު މަސައްކަތްތަކެއް ކޮށްފަ އެވެ. އެ ގޮތުން އެ ޓީމަށް ލީގު ބުރުގެ ހަތަރު ވަނަ ހޯދައިދީ ފައިނަލާ ގާތަށް ގެންގޮސްދިނެވެ.
ސާފް ޗެމްޕިއަންޝިޕްގައި އެއް ކުޅުންތެރިއަކު މަދުކޮށް ބަންގްލަދޭޝް އިން އިންޑިއާއާ އެއްވަރުކުރި އެވެ. މިއީ ބަންގްލަދޭޝްގައި އޮސްކާގެ މަސައްކަތް އެންމެ ބޮޑަށް ފާހަގަވި މެޗެވެ. ސާފްގައި ބަންގްލަދޭޝް އިން ކުޅުނު ފަހު މެޗަށް ފަހު އޮތް ނޫސްވެރިންގެ ބައްދަލުވުމުގައި އޮސްކާއާ ވަނީ އޭނާގެ މުސްތަގުބަލާ ބެހޭގޮތުން ސުވާލުކޮށްފަ އެވެ.
ބަންގްލަދޭޝް ޓީމާ އެކު ކުރިއަށް ދިއުމުގެ ފުރުސަތު ދީފިނަމަ ބޭނުން ހިފާނެތޯ ސުވާލުކުރުމުން އޮސްކާ ބުނީ އެ ނިންމުމަކީ އޭނާ އަތްމަތީގައި އޮތް ކަމެއް ނޫން ކަމަށެވެ. އަދި އެކަމާ މަޝްވަރާކުރަން ޖެހޭނީ ބަޝުންދަރާގެ ރައީސް އިމްރުލް ހަސަން އާއި ބަންގްލަދޭޝް ފުޓްބޯޅަ ފެޑެރޭޝަނުން ކަމަށް އޮސްކާ ބުނެފައިވެ އެވެ.
އޮސްކާ ވަނީ ބަންގްލަދޭޝް ގައުމީ ކޯޗުގެ މަގާމުގައި ދެމިހުންނަން ބޭނުންނުވާ ކަމަށް ބުނެ، ޗުއްޓީ އަކަށް ސްޕެއިނަށް ގޮސްފަ އެވެ.
އެހެންވެ، އަންނަ މަހު 7-18 އަށް ލަންކާގައި ބާއްވާ ފޯ ނޭޝަންސް ކަޕްގައި ބަންގްލަދޭޝް ޓީމަށް އިރުޝާދު ދިނުމުގެ ޒިންމާ ހަވާލުކުރީ ބަންގްލަދޭޝްގެ ޕްރިމިއާ ލީގުގެ ކްލަބް، ޑާކާ އަބަހާނީ ޓީމުގެ ކޯޗަކަށް ހުރި ލެމޯސް އެވެ. އަބަހާނީގެ ކޯޗުކަން 2018 ވަނަ އަހަރުން ފެށިގެން ކުރަމުން އަންނަ ލެމޯސް، ބަންގްލަދޭޝް ޓީމަށް އިރުޝާދުދޭނީ ހަމައެކަނި ފޯ ނޭޝަންސް ކަޕްގަ އެވެ.
ކުރިން މެލޭޝިއާގެ ނެގްރީ ސެމްބިލާން އަށް ކޯޗުކޮށްދިން ލެމޯސް ވަނީ އޭނާގެ އުފަން ގައުމު ޕޯޗުގަލް އާއި ދެކުނު ކޮރެއާ އަދި ތައިލެންޑް ލީގުގައި ވެސް ކޯޗިންގެ މަސައްކަތްތަކެއް ކޮށްފަ އެވެ. އަދި އޭއެފްސީ ކަޕްގައި އަބަހާނީ ގޮވައިގެން ވާދަކޮށް ރަނގަޅު ނަތީޖާތަކެއް ނެރެފައިވެ އެވެ.
ފޯ ނޭޝަންސް ކަޕްގައި ބަންގްލަދޭޝާއި ލަންކާގެ އިތުރުން ދެން އޮތީ ރާއްޖެ އާއި ސީޝެެލްސް އެވެ. ފޯ ނޭޝަންސް ކަޕަށް ރާއްޖޭން ތައްޔާރުވަމުން އަންނަނީ ދާދި ފަހުން ގައުމީ ޓީމާ ހަވާލުވި އިޓަލީގެ ކޯޗު ފްރެންޗެސްކޯ މޮރިއޭރޯގެ އިރުޝާދުގެ ދަށުންނެވެ.
