ނެއިބަހުޑް ޑެވެލޮޕްމެންޓް ސަރަހައްދެއްގެ ގޮތުގައި ބަނޑޭރި ކޮށި ހިމެނޭ ސަރަަހައްދު ތަރައްގީ ކުރުމުގެ ވިސްނުމެއް ގެންގުޅޭކަން ސަރުކާރުން މިރޭ ހާމަކޮށްފި އެވެ.
މާލޭ ސިޓީ ކައުންސިލުން މިރޭ ވަނީ ސިޓީގެ ލޭންޑް ޔޫސް ޕްލޭނާ ގުޅޭ ގޮތުން ރައްޔިތުންގެ ހިޔާލު ހޯދުމަށް ބައްދަލުވުމެއް ބާއްވާފަ އެވެ.
ތިން ސައްތޭކައެއްހާ މީހުން ޒޫމް މެދުވެރިކޮށް ބައިވެރިވި އެ ބައްދަލުވުމުގައި ޕްލޭނިން މިނިސްޓްރީން ވަނީ މިހާރު އެ މިނިސްޓްރީން އެކުލަވާލާފައި އޮތް ލޭންޑް ޔޫސް ޕްލޭންގެ ޕްރެޒެންޓޭޝަނެއް ދީފަ އެވެ.
އެ ޕްރެޒެންޓޭޝަނުގައި މީހުން ދިރިއުޅޭ ތަނެއްގެ ގޮތުގައި ބަނޑޭރި ކޮށި ސަރަހައްދު ތަރައްގީ ކުރަން ހިމަނާފައިވެ އެވެ. ބަނޑޭރި ކޮށީގެ އިތުރުން ވެސް އެ ސަރަހައްދުގައި ދައުލަތުގެ ގިނަ ބިންތަކެއް ހުރުމުން އެ ތަނަކީ، ނެއިބަހުޑެއްގެ ގޮތުގައި ތަރައްގީ ކުރެވިދާނެ ކަމެއް ކަމަށް މިނިސްޓްރީން ދެކެ އެވެ.
އެ ތަނަށް ތަފްސީލީ ޕްލޭނެއް އަދި ނެތް ނަމަވެސް، ޕްލޭނިން މިނިސްޓްރީން ވަނީ މިހާރު މަސައްކަތް ކުރަމުންދާ ޕްލޭނުގައި ހުރި ބައެއް ކަންކަން ފާހަގަކޮށްފަ އެވެ.
ނައިބަހުޑެއްގެ ގޮތުގައި ތަރައްގީ ކުރަން ނިންމާފައިވާ ސަރަހައްދު
އެގޮތުން، އެ ސަރަހައްދުގައި މިޑް ރައިސް ރެސިޑެންޝަލް ޓަވަރުތަކެއް އެޅުމަށް ޕްލޭނުގައިވެ އެވެ. އަދި، މަލްޓިލެވެލް ފުޓްސަލް ކޮމްޕްލެކްސްއަކާއި ލޯ އަދި މިޑް ރައިސް އޮފީސް ޓަވަރުތަކަކާއި އެކި ބޭނުންތަކަށް ބޭނުން ކުރެވޭނެ ޓަވަރުތަކާއި އޮފީސް އަދި ފިހާރަތައް ޕްލޭނުގައި ހިމަނާފައިވެ އެވެ. އަދި، ހިނގާ އުޅެވޭނެ މަގުތަކާއި ޕާކްތައް ވެސް ޕްލޭނުގައި ހިމަނާފައިވެ އެވެ.
ޕްލޭނިން މިނިސްޓްރީން އެ ސަރަހައްދު ތަރައްގީ ކުރުމަށް ގެންގުޅޭ ޕްލޭނަށް މާލޭ ސިޓީގެ މޭޔަރު ޑރ. މުހައްމަދު މުއިއްޒު ތާއިދު ކުރެއްވި އެވެ. ކައުންސިލްގެ އެކްޝަން ޕްލޭނުގައި ވެސް މާލޭގައި ބިން ލިބޭ މިންވަރަކުން ގޯތި ދެވޭނެ ގޮތް ހެދުމަށް ހިމަނާފައިވެ އެވެ.
މުއިއްޒު ވިދާޅުވި ގޮތުގައި އެ ސަރަހައްދު ތަރައްގީ ކުރުމުގެ ވިސްނުމެއް ސިޓީ ކައުންސިލްގައި ވެސް އެބަ އޮތް ކަމަށެވެ. ވިސްނުމަކީ މުއިއްޒު ވިދާޅުވި ގޮތުގައި މާލޭގެ ރަށްވެހިންނަށް ގެދޮރު ކަށަވަރުކޮށްދިނުން ކަމަށެވެ.
މާލޭ ސިޓީ ކައުންސިލުން އޮންލައިންކޮށް ބޭއްވި ބައްދަލުވުމުގައި ވެސް އެންމެ ގިނަ ބަޔަކު ހިޔާލު ހުށަހަޅާފައިވަނީ ވީހާވެސް ގިނަ ބިންތަކެއް ގެދޮރާއި ފްލެޓް އެޅުމަށް ހުސްކުރުމަށެވެ. ހިޔާލު ފާޅުކުރި މީހުން ބުނި ގޮތުގައި، މާލޭގެ ރަށްވެހިންނަށް އެންމެ މުހިންމީ ގެދޮރު ކަމާއި އެހެން ކަންކަން އަންނަން ޖެހޭނީ އޭގެ ފަހުން ކަމަށެވެ.
"އަހަރެމެން ބޭނުން ވަނީ ގޯތި، 2.4 މިލިއަން ރުފިޔާއަށް 500 ސްކުއާޕީޓެއް ބޭނުމެއް ނޫން، އެ ވެސް އަދި ރަށްރަށު މީހުންނާ ކިޔުގައި ޖެހިގެން،" މީހަކު ހިޔާލު ފާޅުކުރި އެވެ.
އެހެން މީހަކު ބުނި ގޮތުގައި، މާލޭގެ ރައްޔިތުންގެ ހައްގުތައް ވަނީ ގެއްލިފަ އެވެ. މިހާރު ވެސް ވިސްނުން ހުރީ މާލެއަށް މީހުން ޖަމާވާ ގޮތަށް ތަރައްގީ ކުރުމަށް ކަމަށާއި އޭގެ ބަދަލުގައި މާލޭގެ މީހުންނަށް ބޯހިޔާވަހިކަމުގެ ހައްގު ކަށަވަރުކޮށްދޭން ޖެހޭ ކަމަށެވެ.
"ރާއްޖޭގެ އެންމެންނަށް މާލޭގައި ނޫޅެވޭނެކަން އެބަ ޖެހޭ ގަބޫލުކުރަން،" މީހަކު ބުންޏެވެ.
މި ސަރުކާރުގެ ވިސްނުމަކީ، ގުޅީފަޅަށް ނޯތު ހާބަރު ބަދަލުކޮށް، މިހާރު ނޯތު ހާބަރު އޮތް ސަރަހައްދު، މީހުން ހިތްހަމަޖައްސާލަން ދާ ތަނެއްގެ ގޮތުގައި ތަރައްގީ ކުރުމަށެވެ. ނަމަވެސް، ބައެއް މީހުން ވަނީ އެ ސަރަހައްދު ވެސް ގެދޮރަށް ދޫކުރުމަށް ހިޔާލު ހުށަހަޅާފަ އެވެ.
އަދި، ގުޅީފަޅު ވެސް މާލޭ ރައްޔިތުންނަށް ގެދޮރު ދޫކުރުމަށް އެދިފައިވެ އެވެ. ސިޓީ ކައުންސިލުން ވެސް ބޭނުން ވަނީ ބަނދަރު ތިލަފުށީގައި އަޅައި، ގުޅީފަޅު ގެދޮރަށް ދޫކޮށްލުމެވެ. އެކަމަށް މޭޔަރު މުއިއްޒު ވަނީ ރައީސް އިބްރާހިމް މުހައްމަދު ސޯލިހުގެ ކިބައިން ވެސް އެދިވަޑައިގެންފަ އެވެ. އެއީ، ކުރީ ސަރުކާރުން ގުޅީފަޅާއި ތިލަފުށި ތަރައްގީ ކުރަން ވިސްނާފައި އޮތް ގޮތެވެ.
