ޓިއުރިން (ޖޫން 6) - ޔުވެންޓަސްގެ ކޯޗުކަމުން މެސިމޯ އަލެގްރީ އާއި އަންދްރެއާ ޕިރްލޯ ވަކިކުރުމަކީ ރަނގަޅު ވަގުތުގައި އައި ނިންމުންތަކެއް ކަމަށް އެ ކްލަބްގެ ރައީސް އަންދްރެއާ އަގްނެލީ ވިދާޅުވެއްޖެ އެވެ.
މީގެ ދެ އަހަރު ކުރިން 2019 ވަަނަ އަހަރު ޔުވެންޓަސް ކޯޗުކަމުން ފަސް އަހަރަށް ފަހު އަލެގްރީ ވަކިކޮށް އެ ޓީމު ހަވާލުކުރީ މައުރީޒިއޯ ސާރީއާ އެވެ. އެއް ސީޒަނަށް ފަހު ސާރީ އަށް މަގާމު ގެއްލުނެވެ. އަދި މި ފަހަރު ޔުވެންޓަސް އަށް ކޯޗުކޮށްދިން ޕިރްލޯ އަށް ވެސް އެ ޓީމުގެ ކޯޗުކަން ކުރެވުނީ އެއް އަހަރު އެވެ. ޔުވެންޓަސް އިން ވަނީ ޕިރްލޯ ވަކިކޮށް އަލުން އަލެގްރީއާ ޓީމު ހަވާލުކޮށްފަ އެވެ.
"އަލުން އަލެގްރީ ގެންނަން ނިންމުމަކީ މީގެ ދެ އަހަރު ކުރިން އޭނާ ވަކިކުރެވުނީތީ ހިތާމަ ކުރަން ޖެހޭތީ ކުރި ކަމެއް ނޫން. ހާލަތަށް ބަލާއިރު އަލެގްރީ ވެސް އަދި ޕިރްލޯ ވެސް ވަކިކުރީ ރަނގަޅަށް. ހިތާމަކުރަން ޖެހޭ ކަމެއް އެ އަކު ނެތް،" އަގްނެލީ ވިދާޅުވި އެެވެ.
ޔުވެންޓަސްގެ ސްޕޯޓިން ޑިރެކްޓަރު ކަމުން ދާދި ފަހުން ވަކިވި ފަބިއޯ ޕަރަޓީޗީ ވަނީ އެ ކްލަބްގައި 11 އަހަރު ވަންދެން މަސައްކަތް ކޮށްފަ އެވެ. އަގްނެލީ ވިދާޅުވީ ޕަރަޓީޗީ މަގާމުން ވަކިވީ އަލެގްރީ ގެންނަން އުޅޭތީ ކަމަށް ދެކެވޭ ވާހަކަތަކުގައި ހަގީގަތެއް ނެތް ކަމަށެވެ.
"އަހަރެމެން އަލެގްރީ ގެނައީ ދުރަށް ވިސްނާފައި. މި ކްލަބް ދަންނަ ކޯޗަކާ ޓީމު ހަވާލުކުރަން. ޕަރަޓީޗީ ހުރި ނަމަވެސް އަލެގްރީއާ އެކު މަސައްކަތް ކުރުމުގައި މައްސަލައެއް ދިމާނުވާނެ،" އަލެގްރީ ބުންޏެވެ.
ކުރިން އޭސީ މިލާނަށް ވެސް ކޯޗުކޮށްދިން އަލެގްރީ ޔުވެންޓަސްއާ ހަވާލުވީ ހަތަރު އަހަރުގެ ކޮންޓްރެކްޓެއްގަ އެވެ. އަންނަ ސީޒަނަށް ޔުވެންޓަސް ޓީމު ވަރުގަދަ ކުރުމުގެ ގޮތުން މިދިޔަ ހަފްތާގައި ޔުވެންޓަސްގެ މެނޭޖްމަންޓުގެ ބައްދަލުވުންތަކެއް ވަނީ ބާއްވައިފަ އެވެ. ރިޕޯޓްތައް ބުނާގޮތުން ކުރިއަށް އޮތް ޓްރާންސްފާ މާކެޓްގައި ކްރިސްޓިއާނޯ ރޮނާލްޑޯ ޔުވެންޓަސް ދޫކޮށްލުމުގެ ފުރުސަތު އެބައޮތެވެ.
ޕިރްލޯގެ ކޯޗުކަމުގައި ޔުވެންޓަސް އިން ވަނީ މި ސީޒަނުގައި އިޓާލިއަން ކަޕާއި އިޓާލިއަން ސުޕަ ކަޕް ކާމިޔާބުކޮށްފަ އެވެ. ދިހަ އަހަރުތެރޭ ފުރަތަމަ ފަހަރަށް ޔުވެންޓަސް އަށް އިޓާލިއަން ލީގު މި ފަހަރު ގެއްލުނުއިރު، ގަދަ ހަތަރެއް ލިބުނީ ކިރިޔާ އެވެ. އަދި ޗެމްޕިއަންސް ލީގުގެ ކުއާޓާ ފައިނަލުން ވެސް ފުރުސަތު ނުލިބި އެ ޓީމު ކެޓީ އެވެ.
"މި ސީޒަނުގެ ކަންކަން ހިނގާދިޔަ ގޮތް ދިރާސާ ކުރާނަަމަ ޕިރްލޯ ވަކިކުރުން އެއީ ކިހިނެއް އައި ކަމެއްކަން އެނގޭނެ. މީގެ 10 އަހަރު ފަހުން އަހަރެން މި ސީޒަނަށް ބަލާއިރު ދެ ތަށި ހޯދާފައި ލީގުގެ ގަދަ ހަތަރެއްގައި ހަމައެކަނި އޮތުމަކީ ރަނގަޅު ކަމަކަށް ނުވެދާނެ،" އަގްނެލީ ވިދާޅުވި އެވެ.
އަގްލެނީ ވަނީ ޕިރްލޯ ކޮށްދިން ކަންތައްތަކަށް ޝުކުރު އަދާކޮށްފަ އެވެ. އަދި ޕިރްލޯ އަށް ކާމިޔާބަށް އެދޭ ކަމަށް ވިދާޅުވި އެވެ.
