މަންދު ކޮލެޖް އިމާރާތް ކުއްލި ގޮތަކަށް ބަންދުކުރި މައްސަލައިގައި ބަދަލުގެ ގޮތުގައި 15 މިލިއަން ރުފިޔާ ދޭން ނިންމުމުން ރައްޔިތުންގެ މަޖިލިހުގައި ތިއްބަވާ އެމްޑީޕީގެ ބައެއް މެމްބަރުންގެ ނުރުހުން ސަރުކާރަށާއި ބަންޑާރަނައިބަށް އަމާޒުކޮށްފި އެވެ.
މި އިމާރާތުގައި ކޮލެޖެއް ހިންގަން ރައްޔިތުންގެ މަޖިލިހުގެ ކުރީގެ މާލެ ދާއިރާގެ މެމްބަރު އިބްރާހިމް އިސްމާއިލް (އިބްރާ) ގެ، މާލެ ހައި ޕްރައިވެޓް ލިމިޓެޑާ އެކު ވެފައިވާ އެއްބަސްވުން 2015 ވަނަ ބާތިލުކުރީ ކުރީގެ ރައީސް އަބްދުﷲ ޔާމީންގެ ސަރުކާރުންނެވެ.
މި މައްސަލަ މަންދު ކޮލެޖުން ސިވިލް ކޯޓަށް ހުށަހެޅުމުން ސަރުކާރާ އެއްކޮޅަށް ނިންމި ނަމަވެސް، ހައި ކޯޓުން އެ ހުކުމް ބާތިލް ކުރި އެވެ. އަދި މި އަހަރު ސުޕްރީމް ކޯޓުން ވަނީ ހައި ކޯޓުގެ ހުކުމް ދަމަހައްޓާފަ އެވެ.
މަންދު ކޮލެޖު މައްސަލައިގައި އެމްޑީޕީ ޕާލިމެންޓްރީ ގުރޫޕުގެ ލީޑަރު އަލީ އާޒިމް ކުރެއްވި ޓްވީޓެއްގައިި ވިދާޅުވީ "ރައްޔިތުން މީހާގެ އަންގަޔާ އަތާ ދިމާ ނުވޭ. ބޮޑުންނަށް މިލިއަނުން ފައިސާ" ކަމަށެވެ.
މިފަހުން އާޒިމް އަންނަނީ ސީދާ ގޮތުންނާއި ނުސީދާ ގޮތުން ސަރުކާރަށާއި ވަޒީރުންނަށް އަމާޒުކޮށް ފާޑު ވިދާޅުވަމުންނެވެ.
މަންދުއަށް ބަދަލު ދިނުމުން ނުރުހުން ފާޅުކޮށް، މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީގެ ޓްވީޓުގައި، ރައީސް އޮފީހާއި ބަންޑާރި ނައިބު ޓެގު ކުރައްވާ ވިދާޅުވީ "އާދައިގެ މުސާރަކޮޅެއްގައި ވަޒީފާގައި އުޅޭ މީހަކު ވަޒީފާއިން ކަނޑައިލީ ސީދާ ޤާނޫނާ ޚިލާފަށްކަމަށް ސްޕްރީމް ކޯޓުން ޙުކުމް ކުރީމާ ވެސް 1 އަހަރަށްވާ މުސާރަކޮޅު އެކަނި ދިނުމަށް ވެސް ދައުލަތަށް ބޮޑު ބުރަޔަކަށް ވެގެން އުޅެނީ ދެން ކީއްވެތޯ؟" އެވެ.
ދައުލަތާ މަންދު ކޮލެޖޭ ދެމެދު އެއްބަސްވުމަކަށް އާދެވުނީ ސިވިލް ކޯޓުގެ ޑިސްޕިއުޓް ރިޒޮލިއުޝަން މަރުހަލާގެ ތެރެއިންނެވެ. މަންދު ކޮލެޖުން މި މައްސަލަ ސިވިލް ކޯޓަށް ހުށައެޅީ، ކޮލެޖު ހިންގަމުން ދިޔަ އިމާރާތް އަތުލި މައްސަލައިގައި ބަދަލު ނަގައިދޭން ވަކިން ހުށައެޅޭނެ ކަމަށް ސުޕްރީމް ކޯޓުން ހުކުމް ކުރުމުންނެވެ.
މަންދު ކޮލެޖުން ފުރަތަމަ ހުށައެޅީ ބަދަލުގެ ގޮތުގައި 18 މިލިއަން ރުފިޔާ ނަގައި ދިނުމަށެވެ. ނަމަވެސް ސަރުކާރުން 15 މިލިއަން ރުފިޔާ ހުށައެޅުމުން އެގޮތަށް އެއްބަސްވީ އެވެ.
ދެ ފަރާތުން އެއްބަސްވުމުން ސިވިލް ކޯޓުން ވަނީ އެގޮތަށް މައްސަލައިގައި ގޮތް ނިންމާފަ އެވެ. އަދި، މަސް ދުވަހުގެ ތެރޭގައި މި 15 މިލިއަން ރުފިޔާ މަންދު ކޮލެޖު ހިންގާ ކުންފުންޏަށް ދިނުމަށް ހުކުމް ކުރި އެވެ.
