އިންތިގާލީ އިންސާފުގެ ގާނޫނުގެ ދަށުން ހެދި، އިންތިގާލީ އިންސާފުގެ އޮފީހުން ގިނަ ވަޒީފާތަކަކަށް ހުޅުވާލައިފި އެވެ.
މި މަހުގެ 18 ވަނަ ދުވަހު އިންތިގާލީ އިންސާފުގެ އޮފީހުން ވަނީ ޖުމްލަ 20 ވަޒީފާއެއް ހުޅުވާލާފަ އެވެ. އަލަށް އުފެދޭ މި އޮފީހަށް ގިނަ މުވައްޒަފުންތަކެއް ނަގައި، މުވައްޒަފުންނަށް ދޭން ކަނޑައަޅާފައިވާ މުސާރަތައް ޖުމްލަ ގޮތެއްގައި ބޮޑެވެ.
އެގޮތުން، ކޭޝް މެނޭޖްމެންޓް އޮފިސަރުންނާއި ލީގަލް އޮފިސަރުންނާއި ރީސާޗް އޮފިސަރުންނާއި ވިކްޓިމް ސަޕޯޓް އޮފިސަރުންނާއި އިންވެސްޓިގޭޝަން އޮފިސަރުންނަށް ހުޅުވާލާފައިވެ އެވެ. ގިނަ މަގާމުތަކުގެ އަސާސީ މުސާރަ 15،000 ރުފިޔާއަށް އަރާއިރު ސާވިސް އެލެވެންސްގެ ގޮތުގައި ކޮންމެ މަގާމަކަށް ވެސް 5،000ރ. ނުވަތަ 6،000ރ. ލިބެ އެވެ.
އިންތިގާލީ އިންސާފުގެ އޮފީހަށް މުވައްޒަފުން ނަގައި، މަސައްކަތް ފެށުމަށް ތައްޔާރުވަމުންދާއިރު އެތަނަށް އިސްވެރިން ކަނޑައެޅިތާ މިހާރު ވަނީ ދުވަސްތަކެއްވެފަ އެވެ. އެގޮތުން، އެންމެ އިސްވެރިޔާ، ޗީފް އޮމްބަޑްސްޕާސަންގެ މަގާމަށް އައްޔަންކޮށްފައިވަނީ، ނ. މާފަރު، އީޓުޖެހިގެ، އަބްދުއްސަލާމް އާރިފެވެ.
އޭގެ ދަށުން އޮމްބަޑްސްޕާސަންގެ މަގާމަށް ހަމަޖައްސާފައިވަނީ، ޖިހާދާ އަނީސް އާއި މަރްޔަމް ލައިޒާ އެވެ.
އޮމްބަޑްސްޕާސަނުންނަށް 35،000 ރުފިޔާގެ މުސާރައެއް ދޭން ރައްޔިތުންގެ މަޖިލީހުން ފާސްކޮށްފައިވާއިރު، އެ އަދަދު މަދުވެގެން މަޖިލީހަށް ޝަކުވާ ވެސް ހުށަހެޅި އެވެ.
އިންތިގާލީ އިންސާފުގެ އޮފީހުގެ މެންޑޭޓަށް ބޮޑު ޒިންމާއެއް ހަވާލުކޮށްފައިވާއިރު، ރައީސް މުހައްމަދު އަމީންގެ ވެރިކަމުން ފެށިގެން ރައީސް އަބްދުﷲ ޔާމީންގެ ވެރިކަމުގައި ނިޒާމީ ގޮތެއްގައި ރޭވިގެން މީހެއްގެ އިންސާނީ ހައްގަށް އަރައިގެންފައިވާނަމަ، އެ މައްސަލައެއް އެ އޮފީހުން ބަލަން ޖެހޭނެ އެވެ.
މި އޮފީސް ފުރަތަމަ އުފެއްދުމަށް މަޖިލީހަށް ބިލް ހުށަހެޅީ އޮތީ، ހަމައެކަނި ރައީސް މުހައްމަދު ވަހީދާއި ރައީސް ޔާމީންގެ ވެރިކަމުގައި ހިނގި ކަންކަން ބެލުމަށެވެ. ނަމަވެސް، މަޖިލީހުން ބިލް ދިރާސާ ކުރުމަށްފަހު ފަސް ވެރިކަމުގެ ތެރޭގައި ހިނގައިދިޔަ ކަންކަން ވެސް ބެލުމަށް ހިމެނީ އެވެ.
ބޮޑެތި ބާރުތަކެއް ދީފައިވާ މި އޮފީހަށް އަމިއްލަ ނަމުގައި ދައުވާ ކުރުމާއި ދައުވާ ލިބިގަތުމާއި މުއާމަލާތް ކުރުމުގެ ބާރު އޮވެ އެވެ. އަދި، މައްސަލަތައް ތަހުގީގު ކުރުމާއި މީހުން ހާޒިރުކުރުން ފަދަ ކަންކަން ވެސް މެންޑޭޓްގެ ތެރޭގައި އޮވެ އެވެ.
އެމްޑީޕީގެ މެނިފެސްޓޯގައި ހިމެނޭ މި އޮފީސް އެކުލަވާލައި، ބޮޑު ހޭދައެއް ކުރުމަކީ އިދިކޮޅުން ފާޑުކިޔަމުން އަންނަ ކަމަކަށްވާއިރު، އެ ފަރާތްތަކުން ބުނާ ގޮތުގައި މިއީ އެމްޑީޕީން ބަދަލު ހިފުމުގައި ރޫހުގައި ކުރާ ކަމެކެވެ.
މި ސަރުކާރުގައި ވަނީ އެކިއެކި މައްސަލަތައް ބެލުމަށް ތަފާތު ރިޔާސީ ކޮމިޝަންތައް ވެސް އުފައްދައި، މަގާމުތައް އެކި ފަރާތްތަކަށް ދީފަ އެވެ. ނަމަވެސް، މިހާތަނަށް އެއިން ކޮމިޝަނެއްގެ މަސައްކަތްތައް ނިމި، އެކަށީގެންވާ ނަތީޖާތަކެއް ނެރެވިފައެއް ނުވެ އެވެ. އޭގެ ތެރޭގައި މަރު ކޮމިޝަނާއި އެސެޓް ރިކަވަރީ ކޮމިޝަން ވެސް ހިމެނެ އެވެ.
