މުމްބާއި، އިންޑިއާ (އޭޕްރީލް 1) - ކަލްކަތާ ނައިޓް ރައިޑާސްގެ މައްޗަށް އަށް ވިކެޓުން ކުރިހޯދައި، އިންޑިއަން ޕްރިމިއާ ލީގު (އައިޕީއެލް) މި ފަހަރުގެ ސީޒަނުގައި، މުމްބާއި އިންޑިއަންސް އިން ފުރަތަަމަ މޮޅު ހޯދައިފި އެވެ.

ފަސް ފަަަހަރު މި މުބާރާތުގެ ޗެމްޕިއަންކަން ހޯދި މުމްބާއި، މި ސީޒަނުގައި ކުޅުނު ފުރަތަމަ ދެ މެޗުން ވަނީ، ގުޖުރާތު ޓައިޓަންސް އާއި ޗެންނާއި ސުޕަ ކިންގްސް އަތުން ބަލިވެފަ އެވެ.

ވަންކެޑޭ ސްޓޭޑިއަމްގައި ރޭ ކުޅުނު މެޗުގައި، މުމްބާއި އިންޑިއަންސް އަށް ޓޮސް ދިމާވުމުން އެ ޓީމުން ނިންމީ ފީލްޑް ކުރުމަށެވެ.

ކަލްކަތާ އިން ކުޅެން އަރައި، 16.2 އޯވަރުގެ ތެރޭގައި ހުރިހާ ކުޅުންތެރިން ނުބައިވިއިރު، ހެދުނީ 116 ލަނޑެވެ. އެ ޓީމުގެ އެންމެ ސްކޯރިން ރަނގަޅީ، 26 ލަނޑު ހެދި، އަންގްރިޝް ރަގުވަންޝީ އާއި 22 ލަނޑު ހެދި ރަމަންދީޕު ސިންގް އެވެ. މި އިނިންގްސްގައި މުމްބާއި ޓީމުގެ ތަފާތަކީ، 23 އަހަރުގެ އަޝްވަނީ ކުމާރު އެވެ. އޭނާ ވަނީ އައިޕީއެލްގައި ކުޅުނު ފުރަތަމަ މެޗުގައި ހަތަރު ވިކެޓް ނެގި ހަމައެކަނި ކުޅުންތެރިޔާގެ ޝަރަފް ހޯދައިފަ އެވެ.

ޖަވާބުގައި ކުޅެން އަަރައި މުމްބާއި މޮޅުވީ، 12.5 އޯވަރުގެ ތެރޭގައި ދެ ކުޅުންްތެރިން ނުބައިވެގެން، 121 ލަނޑު ހަދައިގެންނެވެ. މުމްބައި ޓީމަށް އެންމެ ރަނގަޅު ސްކޯއެއް ހަދައިދިނީ، ނުބައިނުވެ، 41 ބޯޅައިން 62 ލަނޑު ހެދި ރިޔާން ރިކެލްޓަން އެވެ.

އެންމެ ފަހުގެ ޗެމްޕިއަން، ކަލްކަތާ އަށް މި ފަހަރުގެ ފެށުން އެންމެ ރަނގަޅެއް ނޫނެވެ. ފުރަތަމަ މެޗުގައި، އެ ޓީމު ވަނީ ރޯޔަލް ޗެލެންޖާސް ބެންގަލޫރު އަތުން ބަލިވެފަ އެވެ. އެކަމަކު، ދެ ވަނަ މެޗުގައި، ރާޖަސްތާން ރޯޔަލްސް އަތުން މޮޅުވި ނަމަވެސް، ތިން ވަނަ މެޗުގައި އަނެއްކާ ވެސް ނާކާމިޔާބީއާ ކުރިމަތިލާން ޖެހުނީ އެވެ.