އަހުމަދުއާބާދު، އިންޑިއާ (މާޗް 30) - އިންޑިއަން ޕްރިމިއާ ލީގު (އައިޕީއެލް)ގެ ތާރީހުގައި އެންމެ ކާމިޔާބު އެއް ޓީމު މުމްބާއި އިންޑިއަންސް އިން މި ސީޒަނުގައި ކުޅުނު ދެ ވަނަ މެޗުން ގުޖުރާތު ޓައިޓަންސް އަތުން 36 ލަނޑުން ބަލިވެއްޖެ އެވެ.

ފަސް ފަަހަރު އައިޕީއެލްގެ ތަށި ހޯދި މުމްބާއި އަށް މިދިޔަ އަހަރު ވެސް ފެށުން ދަށްކޮށްދިޔައިރު، މި ފަހަރު ފަށައިގެން ފުރަަތަމަ ދެ މެޗުން މި ވަނީ ބަލިވެފަ އެވެ. ފުރަތަމަ މެޗުގައި، މުމްބާއި ބަލިވީ، ޗެންނާއި ސުޕަ ކިންގްސް އަތުންނެވެ.

ނަރެންދުރަ މޯދީ ސްޓޭޑިއަމްގައި ރޭ ކުޅުނު މެޗުގައި ޓޮސް ދިމާވުމުން މުމްބާއި އިން ނިންމީ ފީލްޑް ކުރުމަށެވެ. އެ ގޮތުން، ގުޖުރާތުން ކުޅެން އަރައި، 20 އޯވަރުގެ ތެރޭގައި، އަށް ކުޅުންތެރިން ނުބައިވެގެން 196 ލަނޑު ހެދި އެވެ. އެންމެ ރަނގަޅު ކުޅުމެއް ދެއްކީ، 41 ބޯޅައިން 63 ލަނޑު ހެދި ސައި ސުދަރުސަން އެވެ. އެ ޓީމުގެ، ޝުބްމަން ގިލް 38 ލަނޑު ހެދިއިރު، ޖޯޝް ބަޓްލާ ވަނީ 39 ލަނޑު ހަދައިފަ އެެވެ.

މި އިނިންސްގައި، މުމްބާއިގެ ހާޑިކް ޕާންޑްޔާ ދެ ވިކެޓް ނެގި އެވެ.

މުމްބާއި އިން ކުޅެން އަރައި، 20 އޯވަރު ހަމަވިއިރު، ހަ ކުޅުންތެރިން ނުބައިވެގެން ހެދުނީ 160 ލަނޑެވެ. ފުރަތަމަ މެޗުގައި ލަނޑެއް ވެސް ނުހެދި ނުބައިވި މުމްބާއިގެ ރޯހިތު ޝަރްމާ މި މެޗުގައި ނުބައިވީ ހަތަރު ބޯޅައިން އަށް ލަނޑު ހަދާފައިވަނިކޮށެވެ. މުމްބާއި އިން އެންމެ ރަނގަޅަށް ކުުޅުނީ 48 ލަނޑު ހެދި ސޫރްޔަކުމާރު ޔާދަވް އެވެ. އެ ޓީމުގެ ތިލަކް ވަރުމާ ވަނީ 39 ލަނޑު ހަދައިފަ އެެވެ.

މި އިނިންގްސްގައި ގުޖުރާތު ޓީމުގެ، މުހައްމަދު ސިރާޖު އާއި ޕްރަސިދު ކްރިޝްނާ ކޮންމެ ކުޅުންތެރިއަކު ދެ ވިކެޓް ނެގި އެެވެ.