އޮންލައިން ގޭމް ކުޅޭ ގިނަ ކުޅުންތެރިން އަދިވެސް ލޯބިކުރަނީ ކުރީގެ ގޭމްތަކަށް ކަމަށާއި، އެފަދަ ކުޅުންތެރިން ގިނަ ވަގުތު ވެސް ހޭދަކުރަނީ ކުރީގެ ގޭމްތަކުގައި ކަމަށް އިންޑަސްޓްރީގެ ރިޕޯޓަކުން ހާމަވެއްޖެއެވެ.

މި ހަފްތާގައި ބޭއްވުނު ގޭމްސް ޑިވެލޮޕަ ކޮންފަރެންސްގައި ނިއުޒޫ އިން ވަނީ، 2024 ވަނަ އަހަރުގެ ކުޅުންތެރިންގެ އާދަތަކާއި ހަރަދުކުރުމުގެ ވައްޓަފާޅި ދައްކުވައިދޭ ތިންވަނަ އަހަރީ ރިޕޯޓު ނެރެފައެވެ.

Advertisement

މި ރިޕޯޓުގައި ފާހަގަކޮށްފައިވާ ގޮތުގައި 2024 ވަނަ އަހަރު ނެރުނު ގޭމްތަކަށް ވަރަށް މަދު ވަގުތުކޮޅެއް ހޭދަކުރާއިރު، ގިނަ ކުޅުންތެރިން އަދިވެސް ގިނަ ވަގުތު ހޭދަކުރަނީ ކުރީގެ ގޭމްތަކުގައެވެ.

ޕީސީ ގޭމްތަކުގައި ހޭދަކުރާ ޖުމްލަ ވަގުތުގެ 67 ޕަސެންޓު ހޭދަކުރަނީ 6 އަހަރު ނުވަތަ އެއަށްވުރެ ގިނަ ދުވަސްވީ ގޭމްތަކުގައެވެ. މީގެ ތެރޭގައި އެންމެ މަގުބޫލު ގޭމްތަކަކީ ކައުންޓަ ސްޓްރައިކް 2 އަދި ޖީއޯ (7.1 ޕަސެންޓު)، ލީގް އޮފް ލެޖެންޑްސް (6.4 ޕަސެންޓު)، ރޯބްލޮކްސް (6.2 ޕަސެންޓު)، ޑޯޓާ 2 (5.8 ޕަސެންޓު) އަދި ފޯޓްނައިޓް (5.4 ޕަސެންޓު) އެވެ.

ކޮންސޯލްތަކުގައި މި ތަފާތު ކުޑަ ނަމަވެސް، ޕްލޭސްޓޭޝަންގައި 6 އަހަރަށްވުރެ ގިނަ ދުވަސްވީ ގޭމްތަކުގައި ހޭދަކުރާ ވަގުތަކީ 44 ޕަސެންޓެވެ. އަދި އެކްސްބޮކްސްގައި މިއީ 49 ޕަސެންޓެވެ. ދެ ކޮންސޯލްގައިވެސް 2024 ގައި ނެރުނު ގޭމްތަކުގައި ހޭދަކުރާ ވަގުތަކީ 15 ޕަސެންޓެވެ.

Advertisement

ރިޕޯޓުގައި ބަޔާންކޮށްފައިވާ ގޮތުގައި 2024 ވަނަ އަހަރު ސްޓީމްގައި އެވްރެޖްކޮށް ކޮންމެ މީހަކު 10 ގޭމް ކުޅެފައިވެއެވެ. ޕްލޭސްޓޭޝަންގައި ވެސް މި އެވްރެޖަކީ 10 އެވެ. އެކްސްބޮކްސްގައި މިއަދަދަކީ 9 އެވެ. މި އަދަދު ގުނުމުގައި ކޮންމެ ގޭމެއްގައިވެސް މަދުވެގެން 2 ގަޑިއިރު ކުޅެފައި ވާންޖެހެއެވެ.

"ކުޅުމުގެ އާދަތައް މަދު ގޭމްތަކަކަށް ހަނިވަމުންދާކަމާއި، މިކަމުގެ ސަބަބުން އައު ގޭމްތަކަށް ލިބޭ މާކެޓް ކުޑަވަމުންދާ ކަމަށް" ރިޕޯޓުގައި ބުނެފައިވެއެވެ.

މީގެ އިތުރުން ރިޕޯޓުގައި ބަޔާންކޮށްފައިވާ ގޮތުގައި ފުލް ޕްރައިސް ކޮންސޯލް ގޭމްތަކުން އަހަރެއްގެ މައްޗަށް ލިބޭ އާމްދަނީއަކީ 19.9 ބިލިއަން ޑޮލަރެވެ. މިއީ 2023 އާ އަޅާބަލާއިރު 14 އިންސައްތައިގެ ދަށްވުމެކެވެ.

ނިއުޒޫ އިން މިކަން ނިސްބަތްކުރަނީ 2023 ގައި ނެރުނު ވަރުގަދަ ގޭމްތަކާ އަޅާބަލާއިރު 2024 ގައި ނެރުނު ގޭމްތައް ދެރަވުމަށެވެ. 2023 ގައި ނެރުނު ގޭމްތަކުގެ ތެރޭގައި ދަ ލެޖެންޑް އޮފް ޒެލްޑާ: ޓިއާސް އޮފް ދަ ކިންގްޑަމް، ސްޕައިޑަމޭން 3، ބޯލްޑާސް ގޭޓް 3 އަދި ސުޕަ މާރިއޯ ބްރޯސް ވަންޑަރ ހިމެނެއެވެ.

މި ރިޕޯޓުން ދައްކުވައިދެނީ ގޭމިން އިންޑަސްޓްރީގައި ކުރީގެ ގޭމްތަކުގެ ދައުރު އަދިވެސް ވަރަށް މުހިންމުކަމާއި، އައު ގޭމްތަކަށް ކުޅުންތެރިންގެ ސަމާލުކަން ހޯދުމަކީ ގޮންޖެހުންތަކެއް ހުރި ކަމެއްކަމެވެ.