ސަރުކާރުގެ މައި ހޮސްޕިޓަލު، އައިޖީއެމްއެޗް ގެ އެމެޖެންސީ ރޫމުގައި ފަރުވޭދެނިކޮށް ނުކުޅެދުންތެރިކަން ހުރި މީހަކު މަރުވި މައްސަލައެއް ބަލަމުންދާ ކަމަށް ފުލުހުން ބުނެފި އެވެ.

ފުލުހުންގެ މީޑިއާ ޓީމުން މިއަދު ހިއްސާކުރި މެސެޖެއްގައި ބުނީ އެ މީހާ މަރުވީ އިއްޔެ ކަަމަށެވެ. އަދި އައިޖީއެމްއެޗް އިން އެކަން ފުލުހުންނަށް ރިޕޯޓުކުރީ ރޭ ދަންވަރު 11:30 ހާއިރު ކަމަށްވެސް ފުލުހުން ބުންޏެވެ.

Advertisement

އެ މީހާ ހޮސްޕިޓަލަށް ގެންދިޔަ ވަގުތެއް ނުބުނި ނަމަވެސް އެ މީހާ ގެންދިޔައީ ތަނަކުން ވެއްޓި ލިބުނު އަނިޔާއަކާ ގުޅިގެން ނޫންކަން ފުލުހުން ފާހަގަކޮށްފައިވެ އެވެ. ނަމަވެސް ފަރުވާދެމުން ދަނިކޮށް އެ މީހާ ކުއްލިއަކަށް ތެދުވެ ދުއްވައިގަންނަން އުޅެނިކޮށް ވެއްޓުނު ކަމަށް އައިޖީއެމްއެޗް އާ ހަވާލާދީ ފުލުހުން ބުންޏެވެ.

"ފުލުހުން ބެލި ބެލުމުން ހަށިގަނޑުގައި ފަރުވާ ދިނުމުގެ ތެރޭގައި ހުރި ނިޝާނެއް ފިޔަވައި ހަށިގަނޑަށް ގެއްލުމެއް ލިބިފައި ހުރި ކަމުގެ ނިޝާނެއް ފެންނަން ނެތް. އަދި އާއިލާގެ ފަރާތުން ތުހުމަތުތަކެއް ކޮށް އެފަދަ ޝަކުވާއެއް ފުލުހުންނާ ހިއްސާކޮށްފައެއް ނުވޭ،" ފުލުހުން ބުންޏެވެ.

މީގެއިތުރުން، މިފަދަ މައްސަލައެއް ހުށަހެޅުމުން އާންމު އުސޫލާ އެއްގޮތަށް އެ މީހާގެ ހަށިގަނޑުން ސާމްޕަލް ނެގި ކަމަށްވެސް ފުލުހުން ބުންޏެވެ.

Advertisement

މި މައްސަލައާ ގުޅިގެން ސުވާލުތަކެއް އުފެދިފައިވާ ކަމަށާއި ޖަވާބުތައް ހޯދުމުގެ މަސައްކަތް ކުރަމުންދާ ކަމަށް ފުލުހުން ބުނި ނަމަވެސް، އުފެދިފައިވާ ސުވާލުތައް ހިމެނޭހެން އިތުރު އެއްވެސް ތަފުސީލެއް ފުލުހުން ނުދެ އެވެ.